ປີນີ້ ລາວມ້າງຄະດີຢາເສບຕິດ 3.407 ຄັ້ງ ຈັບຜູ້ຖືກຫາ 4.7 ພັນຄົນ

ຢາເສບຕິດແມ່ນໄພຄຸກຄາມຢ່າງຮ້າຍແຮງຕໍ່ຊີວິດ ແລະຊັບສິນຂອງປະຊາຊົນຕະຫຼອດຮອດຖ່ວງການພັດທະນາປະເທດຊາດເພື່ອແກ້ບັນຫານີ້ໃຫ້ຂາດລັດໄດ້ກຳນົດເປັນວາລະແຫ່ງຊາດໃນການປາບປາມເພື່ອໃຫ້ປະເທດເຮົາມີຈຳນວນຫຼຸດໜ້ອຍຖອຍລົງໂດຍໃນປີ 2021 ນີ້ ເຈົ້າໜ້າທີ່ທົ່ວປະເທດໄດ້ເຂົ້າມ້າງພວກກຸ່ມຄົນບໍ່ດີທີ່ກ່ຽວພັນກັບຢາເສບຕິດປະເພດຕ່າງໆທັງໝົດ 3.407 ຄັ້ງ ພ້ອມສາມາດຈັບກຸມຜູ້ຖືກຫາໄດ້ທັງໝົດ 4.759 ຄົນ.
ຕາມຂໍ້ມູນການລາຍງານຂອງທ່ານ ພົຈວ ຈັນສະແຫວງ ທິບຄູນທອງ ຮອງຫົວໜ້າຫ້ອງວ່າການກະຊວງ ປກສ ຕໍ່ກອງປະຊຸມສະຫຼຸບການຈັດຕັ້ງປະຕິບັດວຽກງານປະຈຳປີ 2021 ແລະ ວາງທິດທາງ ແຜນການປີ 2022 ຂອງກະຊວງດັ່ງກ່າວທີ່ໄດ້ຈັດຂຶ້ນຢູ່ທີ່ຫ້ອງປະຊຸມສະໂມສອນຂອງກະຊວງ (ສະໜາມມ້າ) ໃນວັນທີ 16 ທັນວາຜ່ານມາຊຶ່ງໄດ້ຍົກໃຫ້ເຫັນຫຼາຍບັນຫາທີ່ກຳລັງ ປກສ ສາມາດຍາດມາໄດ້ໃນ 1 ປີຜ່ານມາເປັນຕົ້ນ: ວຽກງານການຮັກສາຄວາມເປັນລະບຽບຮຽບຮ້ອຍໃນສັງຄົມໃນທົ່ວປະເທດມີຄະດີອາຍາເກີດຂຶ້ນທັງໝົດ: 6.554 ຄັ້ງ (ບໍ່ນັບອຸບັດຕິເຫດ ແລະອັກຄີໄພ) ມ້າງໄດ້ 5.066 ຄັ້ງ, ກັກຕົວຜູ້ຖືກຫາ 7.666 ຄົນ ຍິງ 949 ຄົນ, ຄົນຕ່າງປະເທດ 133 ຄົນ ຍິງ 4 ຄົນ (ທຽບໃສ່ປີຜ່ານມາເພີ່ມຂຶ້ນ 345 ຄັ້ງ ເທົ່າກັບ 5,55%), ຄະດີອາຍາທົ່ວໄປ 2.541 ຄັ້ງ, ມ້າງ ໄດ້ 1.639 ຄັ້ງ, ຄະດີຄ້າມະນຸດ 33 ຄັ້ງ, ມ້າງໄດ້ 20 ຄັ້ງ;ເດັ່ນກວ່າໝູ່ແມ່ນບັນຫາຢາເສບຕິດ ມີ 3.407 ຄະດີກັກຜູ້ຖືກຫາໄດ້ 4.759 ຄົນ ຍິງ 484 ຄົນ (ທຽບໃສ່
ປີຜ່ານມາຫຼຸດລົງ 112 ຄັ້ງ ເທົ່າກັບ 0,77%) ສາມາດຢຶດຂອງກາງໄດ້: ເຮໂຣອິນ 3.391,79 ກິໂລກຣາມ, ຢາບ້າ 14.209,53 ກິໂລກຣາມ, ຢາອີ 1.396 ເມັດ, ແປ້ງຝຸ່ນປະສົມຜະລິດຢາເສບຕິດ 10.655,37 ກິໂລກຣາມ, ຝິ່ນ 17,81 ກິໂລກຣາມ, ຢາໄອສ໌ 2.570,88 ກິໂລ ກຣາມ, ນໍ້າຢາເຄມີ 10 ກິໂລກຣາມ, ກັນ ຊາ 5.777,69 ກິໂລກຣາມ, ລົດໃຫຍ່ 120 ຄັນ, ລົດຈັກ 706 ຄັນ, ເຮືອ 2 ລໍາ, ອາວຸດປືນ 27 ກະບອກ, ລູກປືນ 420 ລູກ.
ປະຈຸບັນ, ທົ່ວປະເທດມີນັກໂທດ, ຜູ້ຖືກຫາ ແລະດັດສ້າງທັງໝົດ 33.888 ຄົນ ຍິງ 2.498 ຄົນ, ນັກໂທດພາຍໃນ 16.944 ຄົນ, ຍິງ 1.977 ຄົນ, ນັກ ໂທດຕ່າງປະເທດ 398 ຄົນ ຍິງ 27 ຄົນ, ຜູ້ຖືກດັດສ້າງ 6.532 ຄົນ ຍິງ 112 ຄົນ, ທຽບໃສ່ໄລຍະດຽວກັນຂອງປີ 2020 ເພີ່ມຂຶ້ນ 937 ຄົນ, ຍິງຫຼຸດລົງ 492 ຄົນ.

แชร์