ເຊັນສັນຍາຊໍາລະຄ່າບໍລິການຜ່ານລະບົບ ທຄຕລ

ກົມຊັບສິນທາງປັນຍາ, ກະຊວງອຸດສາຫະກໍາ ແລະ ການຄ້າ (ອຄ) ໄດ້ເຊັນສັນຍາວ່າດ້ວຍການບໍລິການຊຳລະຄ່າບໍລິການຜ່ານລະບົບລະຫວ່າງກົມຊັບສິນທາງປັນຍາ ແລະທະນາຄານການຄ້າຕ່າງປະເທດລາວມະຫາຊົນ (ທຄຕລ) ໂດຍຕາງໜ້າກົມດັ່ງກ່າວແມ່ນທ່ານ ປອ. ນາງ ຂັນລາສີ ແກ້ວບຸນພັນ ຫົວໜ້າກົມຊັບສິນທາງປັນຍາກະຊວງ ອຄ ແລະທ່ານ ນັນທະລາດ ແກ້ວປະເສີດ ຮອງຜູ້ອຳນວຍການ ທຄຕລ ໂດຍການໃຫ້ກຽດເຂົ້າຮ່ວມເປັນສັກຂີພະຍານຂອງທ່ານ ປະລິນຍາເອກ ຄຳແພງ ໄຊສົມແພງ ລັດຖະມົນຕີກະຊວງ ອຄ ພ້ອມດ້ວຍຄະນະນໍາກະຊວງດັ່ງກ່າວ, ຄະນະກົມຈາກທະນາຄານແຫ່ງ ສປປ ລາວ, ຄະນະອຳນວຍການ ທຄຕລ ແລະພາກສ່ວນກ່ຽວຂ້ອງເຂົ້າຮ່ວມ.
ການບໍລິການຊໍາລະຄ່າສາທາລະນຸປະໂພກຜ່ານລະບົບທະນາຄານ (ຫຼື Bill Payment)ຂອງ ທຄຕລ ໄດ້ເລີ່ມໃຫ້ບໍລິການທໍາອິດໃນປີ 2012 ແລະເປັນບໍລິການທີ່ໄດ້ມີການຊົມໃຊ້ຫຼາຍ. ມາຮອດປະຈຸບັນ, ທຄຕລ ໄດ້ໃຫ້ບໍລິການBill Payment ຮ່ວມກັບຫຼາຍພາກສ່ວນໃນນັ້ນປະກອບມີການໃຫ້ບໍລິການຊຳລະຄ່າສາທາລະນຸປະໂພກພື້ນຖານເຊັ່ນ: ຊຳລະຄ່າໄຟຟ້າ, ນໍ້າປະປາ, ຄ່າໂທລະສັບ, ຄ່າທໍານຽມທາງ, ຄ່າທໍານຽມພາສີທີ່ດິນ, ຄ່າພາສີອາກອນ, ຄ່າສາຍເຊົ່າ, ບັດນໍ້າມັນ, ຄ່າບັດຂ້າມຂົວມິດຕະພາບລາວ-ໄທແຫ່ງທີ 1 ແລະຊຳລະຄ່າງວດເຊົ່າສິນເຊື່ອ, ເຊິ່ງການບໍລິການ Bill Payment ທຄຕລ ໄດ້ພັດທະນາໃຫ້ສາມາດຊຳລະຜ່ານຫຼາຍຊ່ອງທາງຄື: ຜ່ານ ATM, BCEL One,BCEL i-Bank ແລະຜ່ານປ່ອງບໍລິການ ທຄຕລ. ຮອດທ້າຍເດືອນ 11 ປີ 2021, ທຄຕລ ມີຕູ້ ATM ຫຼາຍກວ່າ 400 ຕູ້, ຜູ້ລົງທະ ບຽນນໍາໃຊ້ BCEL One ຫຼາຍຫວ່າ 700.000 Users ແລະ BCELi-Bank ຫຼາຍກວ່າ 25.000 Users ກວມເອົາຕົວເລກຜູ້ນຳໃຊ້ລະບົບຊຳລະແບບອີ ເລັກໂທຣນິກຫຼາຍທີ່ສຸດໃນລະບົບທະນາຄານພາຍໃນປະເທດ, ເຊິ່ງ ທຄຕລ ພວກເຮົາເຊື່ອໝັ້ນວ່າ ຖ້າຂະຫຍາຍການຊຳລະແບບອີເລັກໂທຣນິກນີ້ອອກໄປໃຫ້ກວ້າງ ຂວາງເທົ່າໃດກໍ່ຈະເປັນການສ້າງເງື່ອນ ໄຂອຳນວຍຄວາມສະດວກໃຫ້ລູກຄ້າຂອງທະນາຄານໃນການຊົມໃຊ້ການບໍລິ ການຫຼາກຫຼາຍປະເພດເທົ່ານັ້ນ.
ການຮ່ວມມືລະຫວ່າງກົມຊັບສິນທາງປັນຍາ ແລະ ທຄຕລ ໃນການໃຫ້ບໍລິການຊຳລະຄ່າບໍລິການຜ່ານລະບົບ ທຄຕລ ໃນຄັ້ງນີ້ໄດ້ເລີ່ມມີການຮ່ວມມືກັນພັດທະນາມາຕັ້ງແຕ່ທ້າຍປີ 2020 ທັງນີ້ກໍ່ເພື່ອອໍານວຍຄວາມສະດວກໃນການຊໍາລະຄ່າທໍານຽມ ແລະຄ່າບໍລິການເພື່ອຈົດທະບຽນ, ຕໍ່ທະບຽນ ຫຼືປ່ຽນແປງຂໍ້ມູນກ່ຽວກັບຊັບສິນອຸດສາຫະກຳ, ພັນພືດໃໝ່, ລິຂະສິດ ແລະສິດກ່ຽວຂ້ອງກັບລິຂະສິດທີ່ຕ້ອງຊຳລະໃຫ້ກົມຊັບສິນທາງປັນຍາເພື່ອຊຳລະຜ່ານລະບົບທະນາຄານເຮັດໃຫ້ປະຊາຊົນ, ຜູ້ປະກອບການ ແລະບັນດາຜູ້ຕາງໜ້າສາມາດຊຳລະຄ່າທຳນຽມ ແລະ ຄ່າບໍລິການຕ່າງໆຜ່ານລະບົບທະນາຄານໄດ້ກວ້າງຂວາງ ແລະສະດວກຍິ່ງຂຶ້ນ.
ປະຈຸບັນ ທຄຕລ ໄດ້ດຳເນີນການພັດທະນາລະບົບ ແລະໃຫ້ບໍລິການຊຳລະຄ່າທຳນຽມ ແລະຄ່າບໍລິການໄດ້ຜ່ານຊ່ອງທາງດຽວ ກໍ່ຄືຜ່ານລະບົບ Bill Payment (ຜ່ານຊ່ອງທາງ BCEL i-Bank) ເພື່ອເປັນການລິເລີ່ມໃນການຮັບຊໍາລະຜ່ານລະບົບທະນາຄານ ແລະໃນອານາຄົດຂ້າງໜ້າທຄຕລກໍ່ມີແຜນຈະພັດທະນາການຊຳລະຜ່ານຊ່ອງທາງ BCEL One, ຜ່ານຊ່ອງທາງເຄົາເຕີ້ບໍລິການ ແລະຊ່ອງທາງອື່ນໆເພື່ອອໍານວຍຄວາມສະດວກສະບາຍໃຫ້ກັບບັນດາຕົວແທນ ແລະລູກຄ້າລາຍຍ່ອຍຂອງກົມຊັບສິນທາງປັນຍາ, ກະຊວງອຸດສາຫະກຳ ແລະການຄ້າໃນການຊຳລະຄ່າທຳນຽມ ແລະຄ່າບໍລິການຕ່າງໆ ແລະ ທຄຕລ ຈະສືບຕໍ່ພັດທະນາລະບົບການບໍລິການໃຫ້ມີຄວາມທັນສະໄໝ ແລະສືບຕໍ່ຮ່ວມມືກັບພາກສ່ວນອື່ນໆ ເພື່ອອໍານວຍຄວາມສະດວກໃນການຊຳລະສະສາງຕ່າງໆ ຂອງລູກຄ້າຜ່ານທຄຕລດ້ວຍເຄື່ອງມືທີ່ທັນສະໄໝຫຼືໃນຍຸກແຫ່ງການບໍລິການທະນາຄານແບບດີຈີຕອລ.


ຂ່າວ+ພາບ: ຣັດສະໝີ ດວງສັດຈະ

แชร์