ບໍ່ແກ້ວ ສຳເລັດກອງປະຊຸມວຽກງານຈັດຕັ້ງ

ກອງປະຊຸມວຽກງານຈັດ ຕັ້ງທົ່ວແຂວງບໍ່ແກ້ວ ຄັ້ງທີ VI ໄດ້ໄຂຂຶ້ນແລະປິດລົງໃນວັນທີ 16 ທັນວາ 2021 ທີ່ແຂວງດັ່ງກ່າວໂດຍການເປັນປະທານຂອງສະຫາຍ ສົມພອນ ແກ້ວມະນີ ຄະນະປະຈໍາພັກແຂວງຫົວໜ້າຄະນະຈັດຕັ້ງແຂວງບໍ່ແກ້ວ, ເຂົ້າຮ່ວມມີ ສະຫາຍ ບົວຄົງ ນາມມະວົງ ກໍາມະການສູນກາງພັກເລຂາພັກແຂວງເຈົ້າແຂວງໆບໍ່ແກ້ວ, ສະຫາຍ ເພັງສອນ ແກ້ວວິໄລ ຮອງເລຂາພັກ ແຂວງຜູ້ຊີ້ນໍາວຽກງານຈັດຕັ້ງພັກ-ພະນັກງານ, ມີຄະນະປະຈໍາພັກແຂວງ, ກໍາມະການພັກແຂວງ, ເຈົ້າເມືອງ 5 ເມືອງ ແລະຫົວໜ້າພະແນກການອ້ອມຂ້າງແຂວງເຂົ້າຮ່ວມ.
ສະຫາຍ ແກ້ວລາ ນໍລະສິງ ຮອງຫົວໜ້າຄະນະຈັດຕັ້ງແຂວງໄດ້ຜ່ານມະຕິຕົກລົງຂອງຄະນະປະຈໍາພັກແຂວງວ່າດ້ວຍການອະນຸມັດເປີດກອງປະຊຸມວຽກງານຈັດຕັ້ງທົ່ວແຂວງບໍ່ແກ້ວ ຄັ້ງທີ VI ຈາກນັ້ນສະຫາຍ ສົມພອນ ແກ້ວມະນີ ໄດ້ຜ່ານຮ່າງບົດລາຍງານກ່ຽວກັບວຽກງານສະພາບການຈັດຕັ້ງກໍ່ສ້າງພັກ-ພະນັກງານຂອງແຂວງແຕ່ປີ 2016-2020 ແລະທິດທາງຄາດໝາຍວຽກງານກໍ່ສ້າງພະນັກງານ 05 ປີ 2021-2025; ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນໃນທົ່ວພັກຕະຫຼອດໄລຍະ 05 ປີ ຜ່ານມາ ແລະທິດທາງກໍ່ສ້າງພັກ-ພະນັກງານ 05 ປີ 2021-2025.
ສະຫາຍ ເພັງສອນ ແກ້ວວິໄລ ໄດ້ສະເໜີຄໍາສັ່ງຂອງຄະນະປະຈໍາພັກແຂວງວ່າດ້ວຍການເພີ່ມທະວີການນໍາພາຂອງພັກເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງໃນທຸກຂອດພະນັກງານ ສະບັບເລກທີ 1394/ຄປພຂ, ລົງວັນທີ 10 ທັນວາ 2021 ແລະ ຄໍາສັ່ງແນະນໍາຂອງຄະນະປະຈໍາພັກແຂວງວ່າດ້ວຍການປັບປຸງກົງຈັກ ການຈັດຕັ້ງຂອງບັນດາພະແນກການ, ເມືອງ ສະບັບເລກທີ 1307/ຄປພຂ, ລົງວັນທີ 17 ພະຈິກ 2021. ຈາກນັ້ນບັນດາຜູ້ແທນເຂົ້າຮ່ວມໄດ້ປະກອບຄໍາຄິດຄໍາເຫັນ ເປັນຕົ້ນແມ່ນ: ການກໍ່ສ້າງພັກ, ສະມາຊິກພັກຢູ່ຂັ້ນຮາກຖານບ້ານ, ອົງການຈັດຕັ້ງລັດ, ແຜນກໍານົດພະນັກງານນໍາພາຄຸ້ມຄອງຂັ້ນເມືອງ, ການຄຸ້ມຄອງກ່ຽວກັບພັກ-ພະນັກງານ, ນາຍ ແລະ ພົນຕໍາຫຼວດແຕ່ລະໜ່ວຍພັກທົ່ວກໍາລັງປ້ອງກັນຄວາມສະຫງົບມີຄວາມຕັ້ງໜ້າ ແລະດ້ານຫຍໍ້ທໍ້, ການຕິດຕາມກວດກາ ແລະ ແກ້ໄຂບັນຫາຫ່າງສຽງສັງຄົມ.
ຈາກນັ້ນ ສະຫາຍ ບົວຄົງ ນາມມະວົງ ເຈົ້າແຂວງບໍ່ແກ້ວກໍ່ໄດ້ມີຄໍາເຫັນຊີ້ນໍາໂດຍສະເພາະແມ່ນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນຮັບປະກັນຄຸນະພາບ, ຄະນະພັກແຕ່ລະຂັ້ນຕ້ອງເອົາໃຈໃສ່ວຽກງານພັກ, ຍົກສູງຄວາມສາມາດນໍາພາຂອງຕົນໃຫ້ສູງ, ຄະນະຈັດຕັ້ງ ແລະ ຄະນະກວດກາພັກແຕ່ລະຂັ້ນຕ້ອງປະ ສານສົມທົບຢ່າງກົມກຽວໃນການຕິດຕາມກວດກາ, ຊຸກຍູ້ປັບປຸງກໍ່ສ້າງ ແລະມີການຕີລາຄາປະເມີນຜົນໜ່ວຍພັກປອດໃສ, ເຂັ້ມແຂງ, ໜັກແໜ້ນຢ່າງແທດເຖິງຄະນະພັກຮາກຖານ, ຄະນະໜ່ວຍພັກຕ້ອງເຂົ້າໃຈ ແລະກໍາແໜ້ນໄດ້ເນື້ອໃນຈັດຕັ້ງພັກ-ພະນັກງານໃນການສ້າງພັກປອດໃສ, ເຂັ້ມແຂງ ແລະໜັກແໜ້ນໃຫ້ຄະນະພັກທຸກຂັ້ນ, ສະມາຊິກພັກທຸກສະຫາຍຕ້ອງເພີ່ມທະວີ ແລະຍົກສູງຄວາມຮັບຜິດຊອບໃນການຄົ້ນຄວ້າ, ເຊື່ອມຊຶມ, ກໍາແໜ້ນຄໍາສັ່ງ ເລກທີ 01 ຂອງກົມການເມືອງສູງກາງພັກ ແລະຄໍາແນະນໍາຂອງຄະນະຈັດຕັ້ງສູນກາງພັກ ເລກທີ 291 ແລະ ຄໍາແນະນໍາຂອງຄະນະປະຈໍາພັກແຂວງກ່ຽວກັບການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນເພື່ອເປັນບ່ອນອີງໃນການເຄື່ອນໄຫວນໍາພາ-ຊີ້ນໍາ ແລະຈັດຕັ້ງປະຕິບັດໃຫ້ຖືກຕ້ອງສອດຄ່ອງຕາມແຕ່ລະໄລຍະ. ກອງປະຊຸມຍັງໄດ້ມອບເງິນສ້າງສູນບໍາບັດຢາເສບຕິດເມືອງລະ 250 ລ້ານກີບ ໃຫ້ 05 ເມືອງ ກ່າວມອບໂດຍສະຫາຍ ບົວຄົງ ນາມມະວົງ ເຈົ້າແຂວງບໍ່ແກ້ວຮັບໂດຍທ່ານເຈົ້າເມືອງ 05 ເມືອງ.

ຂ່າວ-ພາບ: ຄໍາໄຕ ສີສະຫວ່າງ

แชร์