ຄັງເງິນຈຳປາສັກ ເອົາໃຈໃສ່ຄຸ້ມຄອງລາຍຮັບ-ລາຍຈ່າຍໃຫ້ຖືກຕ້ອງ

 

ຂ່າວ-ພາບ: ທູນທອງໃຈ​

ຄັງເງິນປະຈໍາແຂວງຈໍາປາສັກ ແມ່ນກົງຈັກການຈັດຕັ້ງໜຶ່ງຂອງພະແນກການເງິນແຂວງ, ມີພາລະບົດບາດເປັນເສນາທິການໃຫ້ຫົວໜ້າພະແນກການເງິນໃນການຄຸ້ມຄອງມະຫາພາກກ່ຽວກັບວຽກງານຄັງເງິນປະຈໍາແຂວງລວມສູນຕາມສາຍຕັ້ງໃນທົ່ວແຂວງ.​
ທ່ານ​ ນາງ​ ບຸດສະດີ ຄໍາມະນີ​ວົງ​ ຫົວໜ້າຄັງເງິນປະຈໍາແຂວງໃຫ້ສໍາພາດ​ວ່າ: ໃນ​ 11​ ເດືອນຜ່ານມາຄັງເງິນປະຈໍາແຂວງໄດ້ເອົາໃຈໃສ່ໂຄສະນາເຜີຍແຜ່ນະໂຍບາຍ, ກົດໝາຍ ແລະນິຕິກໍາລຸ່ມກົດໝາຍກ່ຽວກັບວຽກງານຄັງເງິນໃຫ້ບຸກຄົນ, ນິຕິບຸກຄົນ ແລະການຈັດຕັ້ງ, ນໍາພາ-ຊີ້ນໍາ, ຊຸກຍູ້, ຕິດຕາມ, ກວດກາດ້ານການຈັດຕັ້ງປະຕິບັດວຽກ ງານວິຊາສະເພາະ ແລະການເຄື່ອນໄຫວຂອງບັນດາຂະແໜງການອ້ອມຂ້າງຄັງເງິນປະຈໍາແຂວງ; ກວດກາເອກະສານລາຍຈ່າຍ​ກ່ອນການເບີກຈ່າຍ ແລະຊໍາລະສະສາງລາຍຈ່າຍງົບປະມານ; ສ້າງແຜນ, ຄຸ້ມຄອງ, ຕິດຕາມ,​ ຈັດສັນ, ແບ່ງປັນ ແລະ ສະຫຼຸບລາຍງານລາຍຮັບ-ລາຍຈ່າຍງົບປະມານ, ປະຈຸບັນ,​ ພະນັກງານຄັງເງິນແຂວງ ມີ 27 ທ່ານ,​ ຍິງ 18 ທ່ານ, ພະນັກງານຕາມສັນຍາ 4 ທ່ານ,​ ຍິງ 3 ທ່ານ.​


ທ່ານ​ ນາງ​ ບຸດສະດີ ຄໍາມະນີ​ວົງ​ ກ່າວຕື່ມວ່າ: ວຽກງານຈັດຕັ້ງ,​ ບໍລິຫານ ແລະ​ກວດກາໄດ້ສະເໜີເຖິງຄັງເງິນແຫ່ງຊາດ,​ ກົມຈັດຕັ້ງ​ກະຊວງການເງິນຂໍປັບປຸງ, ສັບ ຊ້ອບ, ແຕ່ງຕັ້ງຈາກ 5 ຂະແໜງມາເປັນ 3 ຂະແໜງຕາມໂຄງປະກອບການຈັດຕັ້ງຂອງຂໍ້ຕົກລົງວ່າດ້ວຍການຈັດຕັ້ງ​ ແລະ ​ການເຄື່ອນໄຫວຄັງເງິນແຫ່ງຊາດ​, ໄດ້ແຕ່ງຕັ້ງຄະນະກຳມະການພາຍໃນຄັງເງິນປະຈໍາແຂວງກວດກາເງິນສົດໃນຄັງໂດຍປະຕິບັດທຸກໆທ້າຍເດືອນ ແລະໄດ້ກວດກາແບບສຸກເສີນເພື່ອບໍ່ໃຫ້ເກີດປາກົດການຍໍ້ທໍ້ຕ່າງໆ, ໃນເດືອນມິຖຸນາ​ 2021​ ກໍໄດ້ກວດກາການຈັດຕັ້ງປະຕິບັດວຽກງານວິຊາສະເພາະຂອງຄັງເງິນປະຈໍາແຂວງ ແລະໄດ້ລົງເຄື່ອນໄຫວ,​ ຕິດຕາມ,​ ຊຸກຍູ້ວຽກງານວິຊາສະ ເພາະ ຢູ່ 9 ເມືອງ,​ 1​ ນະຄອນ ໂດຍສະເພາະແມ່ນກວດກາການເຄື່ອນໄຫວເງິນສົດ, ການຮັກສາເງິນສົດໃນຄັງເຫັນວ່າບັນດາເມືອງໄດ້ປະຕິບັດຕາມນິຕິກຳ ກ່ຽວກັບການຄຸ້ມຄອງເງິນສົດຢູ່ຄັງເງິນປະຈໍາແຂວງທີ່ກະຊວງການເງິນ​ກໍານົດອອກ, ວຽກງານບັນຊີ ແລະ ການລາຍງານການບັນທຶກບັນຊີໃນລະບົບ GFIS ແລະ ລະບົບ RTIS ເຫັນວ່າຈັດຕັ້ງປະຕິບັດໄດ້ຄ່ອງຕົວດີສົມຄວນສາມາດສະຫຼູບປະຈໍາວັນໂດຍສົມທຽບກັບພາກສ່ວນກ່ຽວຂ້ອງ,​ ປະຈຸບັນໄດ້ລົງຄູ່ຂະໜານທັງ 2​ ລະບົບ ແລະສົ່ງບົດລາຍງານ​ໃຫ້ສູນກາງທັນຕາມກຳນົດເວລາ.​
ການປະຕິບັດຕົວເລກລາຍຮັບ-ລາຍຈ່າຍງົບປະມານທ້ອງຖິ່ນນັ້ນ,​ ຫົວໜ້າຄັງເງິນປະຈໍາແຂວງໃຫ້ຮູ້ວ່າ: ມາຮອດເດືອນ 11​ ປີ​ 2021,​ ດ້ານລາຍຮັບງົບປະມານທ້ອງຖິ່ນ ປະຕິບັດໄດ້ ທັງໝົດ 372,54 ຕື້ກີບ ເທົ່າກັບ 49,97% ໃນນັ້ນລາຍຮັບອາກອນໄດ້​ 355,3 ຕື້ກີບ ເທົ່າກັບ 49,65%, ລາຍຮັບຊັບສິນ​ໄດ້​ 16,18 ຕື້ກີບ, ເທົ່າກັບ 46,30%, ລາຍຮັບວິສະຫະກິດໄດ້​ 0,63 ຕື້ກີບ, ເທົ່າກັບ 84,20%, ດ້ານລາຍຈ່າຍງົບປະມານທ້ອງຖິ່ນປະຕິບັດທັງໝົດ 519,03 ຕື້ກີບ ເທົ່າກັບ 73,39% ໃນນັ້ນ​ລາຍຈ່າຍເງິນເດືອນ,​ ເງິນອຸດໜູນ ປະຕິບັດໄດ້ 449,40 ຕື້ກີບ ເທົ່າ ກັບ 85,67%, ເງິນບໍລິຫານ-ດັດ ສົມ​ ປະຕິບັດໄດ້ 45,99 ຕື້ກີບ ເທົ່າ ກັບ 53,23%,​ ເງິນແຮ ແລະລົງທຶນປະຕິບັດໄດ້​ 26,54 ຕຶ້ກີບ, ເທົ່າກັບ 43,84%., ທ້ອງ ຖິ່ນຂາດດູນທັງໝົດ 146,49 ຕື້ກີບ; ຢືມລ່ວງໜ້າຈາກສູນກາງ​ ຈໍານວນ​ 123,42 ຕື້ກີບ,​ ຮັບດຸ່ນດ່ຽງຈາກສູນກາງ ຈໍານວນ 29,22 ຕື້ກີບ.
ສໍາລັບວຽກງານບໍລິຫານແຫຼ່ງເງິນ ແລະ​ເງິນສົດໄດ້ຕິດຕາມຈັດສັນ,​ ບໍລິຫານແຫຼ່ງເງິນທີ່ມີໂດຍສ້າງແຜນລາຍຈ່າຍເປັນວັນ, ອິງໃສ່ລາຍຮັບເຂົ້າຕົວຈິງໃນແຕ່ລະວັນ, ລາຍຈ່າຍແມ່ນເລັງໃສ່ເງິນເດືອນ-ເງິນອຸດໜູນ ເປັນບູລິມະສິດອັນດັບ​ 1, ຖັດມາ​ ກໍແມ່ນເງິນບໍລິຫານທີ່ເປັນເງິນນໍ້າມັນຕິດພັນກັບເງິນເດືອນ ແລະລາຍຈ່າຍອື່ນໆທີ່ຈໍາເປັນ; ການບໍລິຫານເງິນສົດໃນຄັງເງິນປະຈໍາແຂວງມາຮອດປະຈຸບັນສະເພາະການເບີກຈ່າຍເປັນເງິນສົດຢູ່ຄັງເງິນປະຈໍາແຂວງ (ໃບຂໍຖອນ-ແຊັກ) ແມ່ນຫັນໄປເບີກຈ່າຍຜ່ານລະບົບທະນາຄານ.​ ການມອບລາຍຮັບເປັນເງິນສົດກໍຍັງມີຢູ່ແຕ່ເຫັນວ່າຫຼຸດນ້ອຍຖອຍລົງ, ວຽກງານບໍລິການຄັງເງິນ​ໄດ້ຈັດຕັ້ງປະຕິບັດຕາມຄໍາແນະນຳວິຊາການຄັງເງິນແຫ່ງຊາດປັບປຸງກົນໄກ,​ ບາງຂັ້ນຕອນການປ້ອນຂໍ້ມູນລາຍຮັບ-ລາຍຈ່າຍງົບປະມານລົງໃນລະບົບ GFIS, RTIS, ໄດ້ສົມທົບກັບຂະແໜງລາຍຮັບ (ອາກອນ-ຊັບສິນ) ໃນການລົງບັນທຶກບັນຊີດ້ວຍລະບົບອີເລັກໂຕຼນິກ, ລາຍຮັບຂະແໜງອາກອນຢູ່ບັນດາເມືອງ-ນະຄອນ ເຫັນວ່າບັນທຶກບັນຊີຖືກຕ້ອງຊັດເຈນ, ສະຫຼູບຕົວເລກທັນເວລາ, ຄຸ້ມຄອງ,​ ຕິດຕາມ,​ ກວດກາການເຄື່ອນໄຫວບັນຊີຂອງຫົວໜ່ວຍງົບປະມານ, ໄດ້ຈັດຕັ້ງປະຕິບັດການເບີກຈ່າຍແຊັກຈາກບັນຊີເງິນຝາກຄັງເງິນ,​ ນໍາສົ່ງແຊັກຄັງເງິນໄປເບີກຈ່າຍຢູ່ ບັນດາທະນາຄານທຸລະກິດຄື: ທະນາຄານການຄ້າ, ພັດທະນາລາວ ແລະ​ທະນາຄານສົ່ງເສີມກະສິກໍາໂດຍເລີ່ມນໍາໃຊ້ແຕ່ເດືອນ ສິງຫາ 2021, ວຽກງານລາຍຈ່າຍງົບປະມານ,​ ການເບີກຈ່າຍເງິນເດືອນ-ອຸດໜູນ ແລະເງິນນະໂຍບາຍພະນັກງານລັດຖະກອນໄດ້ເບີກຈ່າຍຜ່ານລະບົບທະນາຄານ (ATM),​ ລັດຖະກອນໃນທົ່ວແຂວງທັງໝົດ​ ມີ​ 13.241 ຄົນ, ກວມ 90 % (ບໍ່ລວມທະຫານ ແລະ​ຕໍາຫຼວດ), ມາຮອດປະຈຸບັນໄດ້ປະຕິບັດການເບີກຈ່າຍເດືອນ-ເງິນອຸດໜູນ ເດືອນ 11 ໄດ້ສໍາເລັດ 33 ພະແນກການ, ຍັງ​ 2 ຂະແໜງການ, ເມືອງທີ່ເບີກຈ່າຍເງິນເດືອນ-ເງິນອຸດໜູນສໍາເລັດ 100% ມີ​ເມືອງບາຈຽງຈະເລີນສຸກ ແລະນະຄອນປາກເຊ.​


ທ່ານ​ ນາງ​ ບຸດສະດີ​ ຄໍາມະນີ​ວົງ​ ຫົວໜ້າຄັງເງິນປະຈໍາແຂວງກ່າວຕື່ມວ່າ: ຄຽງຄູ່ກັບດ້ານດີທີ່ກ່າວມານັ້ນ​ພວກເຮົາກໍຍັງມີບາງບັນຫາຂໍ້ຄົງ​ຄ້າງ​ຕົ້ນຕໍ​ແມ່ນການມອບລາຍຮັບເຂົ້າງົບປະມານຂອງ​ບັນດາວິສະຫະກິດ,​ ຜູ້ປະກອບການຈໍານວນໜຶ່ງຍັງນໍາເອົາເງິນສົດມາມອບຢູ່ຄັງເງິນປະຈໍາແຂວງ, ການກວດຜ່ານລາຍຈ່າຍງົບປະມານ​ ຜ່ານມາຍັງບໍ່ທັນເຂັ້ມງວດ, ຍັງບໍ່ໄປຕາມລະບຽບການໃຊ້ຈ່າຍເງິນງົບປະມານການຈັດຊື້-ຈັດຈ້າງ​ ໂດຍສະເພາະລາຍຈ່າຍເງິນບໍລິຫານ, ການປະຕິບັດລາຍຈ່າຍງົບປະມານໂດຍສະເພາະເງິນເດືອນ-ເງິນອຸດໜູນແມ່ນມີຄວາມຫຍຸ້ງຍາກ,ເບີກຈ່າຍບໍ່ໄດ້ພາຍໃນເດືອນຍ້ອນການເກັບລາຍຮັບງົບປະມານທ້ອງຖິ່ນບໍ່ສາມາດຕອບສະໜອງກັບລາຍຈ່າຍໄດ້ເຮັດໃຫ້ການບໍລິຫານແຫຼ່ງເງິນພົບຄວາມຫຍຸ້ງຍາກ, ການປິດສະຫຼູບປີງົບປະມານ​ 2021​ ນີ້ເງິນຮ່ວງບໍລິຫານ-ດັດສົມ ແລະເງິນລົງທຶນຈໍານວນໜຶ່ງຈະຄ້າງຈ່າຍຍ້ອນບໍ່ມີແຫຼ່ງເງິນຈະຊໍາລະ, ການແກ້ໄຂໜີ້ສິນລ່ວງໜ້າຄັງເງິນປະຈໍາແຂວງ ທີ່ມີຍອດຍົກມາຫຼາຍປີ ບໍ່ສາມາດສະສາງໄດ້,​ ສ່ວນໃຫຍ່ແມ່ນໜີ້ທີ່ຄ້າງຄາຄຸມເຄືອແກ່ຍາວມາຫຼາຍປີ​ໃນທີ່ຜ່ານມາ​ກໍໄດ້ສົມທົບກັບຄະນະກໍາມະການຂັ້ນແຂວງ​ເລັ່ງທວງ, ໃນປີ 2021 ເລັ່ງທວງໄດ້ພຽງແຕ່ 8,84 ຕື້ກີບ, ສ່ວນຫຼາຍແມ່ນໜີ້ທີ່ບໍ່ມີແຫຼ່ງທຶນຊໍາລະ.
ສໍາລັບແຜນວຽກຈຸດສຸມໃນເດືອນທັນວາ 2021​,​ ຫົວໜ້າຄັງເງິນປະຈໍາແຂວງ​ກ່າວວ່າ: ຈະເອົາໃຈໃສ່ນໍາພາ-ຊີ້ນໍາພະນັກງານຄັງເງິນປະຈໍາແຂວງ ແລະຄັງເງິນປະຈໍາເມືອງ-ນະຄອນ ສຸມໃສ່ການປິດສະຫຼູບງົບປະມານ-ບັນຊີ, ສະຫຼູບຂາດຕົວງົບປະມານ ແລະກະກຽມການຍົກຍອດບັນຊີ ປະຈໍາປີ 2021, ສືບຕໍ່ເບີກຈ່າຍເງິນເດືອນ ເງິນອຸດໜູນພະນັກງານລັດຖະກອນເດືອນທີ 11​ ປີ​ 2021 ທີ່ຍັງຄ້າງ 2 ຂະແໜງການ ແລະສືນຕໍ່ເດືອນ 12 ໂດຍອິງໃສ່ລາຍຮັບຕົວຈິງເຂົ້າໃນແຕ່ລະວັນ; ປະສານສົມທົບກັບຂະແໜງລາຍຮັບ ແລະຫົວໜ່ວຍງົບປະມານກ່ຽວກັບການມອບລາຍຮັບງົບປະມານ ແລະການຄຸ້ມຄອງລາຍຈ່າຍ ຜ່ານລະບົບຄັງເງິນໃຫ້ຖືກຕ້ອງ ຕາມລະ ບຽບການທີ່ໄດ້ກຳນົດເພື່ອສະດວກໃນການ​ສະຫຼູບລາຍງານຕົວເລກປະຈໍາປີ 2021, ກວດກາການເຄື່ອນໄຫວບັນທຶກບັນຊີຄັງເງິນໃນລະບົບ GFIS ແລະ RTIS ໃຫ້ມີຄວາມຖືກຕ້ອງ,​ ຊັດເຈນ​ເພື່ອກະກຽມໃສ່ການປິດ ສະຫຼູບງົບປະມານ-ບັນຊີ, ສະຫຼູບຂາດຕົວງົບປະມານ ແລະກະກຽມການຍົກຍອດບັນຊີ ປະຈໍາປີ 2021, ກຽມ ເອົາພະນັກງານຄັງເງິນໃນ 4 ເມືອງ ຄື: ເມືອງຊະນະສົມບູນ, ປະທຸມພອນ, ສຸຂຸມາ ແລະ ເມືອງມຸນລະປາໂມກມາຝຶກອົບຮົມການນໍາໃຊ້ລະບົບ (RTIS)​ ເພື່ອເຮັດໃຫ້ການນໍາໃຊ້ມີຄວາມເຂັ້ມແຂງ,​ ປະກອບສ່ວນເຂົ້າໃນການຈັດຕັ້ງປະຕິບັດວຽກງານ​ໃຫ້ມີຜົນສໍາເລັດໃໝ່ໃຫຍ່ຫຼວງກ່ວາເກົ່າ.

แชร์