ປະທານປະເທດ ພົບປະໂອ້ລົມການນຳຫຼັກແຫຼ່ງແຂວງຈຳປາສັກ

ວັນທີ 18 ທັນວາ 2021, ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ໄດ້ເຄື່ອນໄຫວຢ້ຽມຢາມ ແລະພົບປະໂອ້ລົມພະນັກງານຫຼັກແຫຼ່ງແຂວງຈໍາປາສັກ ທີ່ສະໂມສອນຂອງແຂວງໂດຍເປັນກຽດຕ້ອນຮັບຂອງທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ, ມີບັນດາສະຫາຍໃນຄະນະປະຈຳພັກແຂວງ, ກຳມະການພັກແຂວງ, ເລຂາພັກເມືອງ, ເຈົ້າເມືອງ, ເລຂາພັກນະຄອນ-ເຈົ້ານະຄອນ, ຫົວໜ້າພະແນກການກົມກອງອ້ອມຂ້າງແຂວງເຂົ້າຮ່ວມ.

ທ່ານ ວິໄລວົງ ບຸດດາຄໍາ ໄດ້ລາຍງານໃຫ້ທ່ານປະທານປະເທດຮັບຊາບກ່ຽວກັບການຜັນຂະຫຍາຍຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ ແຫ່ງຊາດ5 ປີ ຄັ້ງທີ IX ແລະ2 ວາລະແຫ່ງຊາດ, ມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງ, ແຜນພັດທະນາເສດຖະກິດ-ສັງຄົມ 5 ປີ ຄັ້ງ ທີ IX ຂອງແຂວງໂດຍສັງເຂບສໍາລັບການຈັດຕັ້ງປະຕິບັດແຜນພັດທະນາເສດ-ສັງຄົມ ມີທ່ວງທ່າດີຂຶ້ນເປັນກ້າວໆ; ການດູ່ນດ່ຽງເສດຖະກິດມະຫາພາກມູນຄ່າລວມຍອດຜະລິດຕະພັນພາຍໃນ (GDP) ປະຕິບັດໄດ້ທັງໝົດ 19.980,25 ຕື້ ກີບ, ທຽບໃສ່ແຜນປີໄດ້ 85% (ຄາດຄະເນໝົດປີຈະບັນລຸໄດ້ 22.641,6 ຕື້ກີບ ເທົ່າກັບ 96,3%), ອັດຕາການຂະຫຍາຍຕົວຂອງ GDP ຢູ່ໃນລະດັບ 3,08% (ແຜນ 4,82%), ສະເລັ່ຍຕໍ່ຫົວຄົນໄດ້ 2.713 ໂດລາສະຫະລັດຕໍ່ຄົນ (ຄາດຄະເນໝົດປີ ຈະບັນລຸໄດ້ 3.075 ໂດລາສະຫະລັດຕໍ່ຄົນເທົ່າກັບ 90% );

ໃນໂຄງປະກອບເສດຖະກິດເຫັນວ່າຂະແໜງກະສິກໍາມີມູນຄ່າເພີ່ມຂຶ້ນ 44.31% ເມື່ອທຽບໃສ່ແຜນປີ, ເຮັດໃຫ້ຂະແໜງກະສິກໍາຄາດຄະເນໝົດປີຈະກວມ 32.53% ( ແຜນ 20.8% ), ຂະແໜງອຸດສາຫະກໍາຄາດຄະເນໝົດປີຈະກວມ 21.38% (ແຜນ 25.17)  ແລະຂະແໜງບໍລິການຄາດຄະເນໝົດປີຈະກວມ 46.08% (ແຜນ 54.04).

ການລະດົມທຶນເຂົ້າໃນການພັດທະນາເສດຖະກິດ-ສັງຄົມ ໄດ້ທັງໝົດ 5.374,6 ຕື້ກີບ, ທຽບໃສ່ແຜນປີປະຕິບັດໄດ້ 71,96%; ໃນນັ້ນການລົງທຶນຂອງລັດ 271,73 ຕື້ກີບ ກວມ 5,06%; ທຶນຊ່ວຍເຫຼືອ (ODA) 250 ຕື້ກີບ ກວມ 4,65%; ການລົງທຶນພາຍໃນ-ຕ່າງປະເທດ 1.584,18 ຕື້ກີບ ກວມ 29,48% ແລະສິນເຊື່ອທະນາຄານ 3.268,69 ຕື້ກີບ ກວມ 60,81%;

ການສົ່ງອອກປະຕິບັດໄດ້ 278,68 ລ້ານໂດລາສະຫະລັດ, ທຽບໃສ່ແຜນປີໄດ້ 91,93%, ການນໍາເຂົ້າປະຕິບັດໄດ້ 236,15 ລ້ານໂດລາສະຫະລັດ, ທຽບໃສ່ແຜນປີປະຕິບັດໄດ້ 98% (ເຮັດໃຫ້ແຂວງເກີນດູນການຄ້າ).

   ໂອກາດດັ່ງກ່າວ ທ່ານ ທອງລຸນ ສີສຸລິດ ໄດ້ມີຄຳເຫັນໂອ້ລົມ ແລະເນັ້ນໜັກຫຼາຍບັນຫາສໍາຄັນໃຫ້ການນໍາຂອງແຂວງຈໍາປາສັກສືບຕໍ່ເອົາໃຈໃສ່ເຮັດວຽກງານການເມືອງ-ແນວຄິດຢ່າງໜັກແໜ້ນ, ນໍາພາ-ຊີ້ນໍາການພັດທະນາເສດຖະກິດ-ສັງຄົມໃຫ້ເຕີບໃຫຍ່ຂະຫຍາຍຕົວ, ເອົາໃຈໃສ່ຊຸກຍູ້ປະຊາຊົນທໍາການຜະລິດດ້ານກະສິກຳເພື່ອໃຫ້ກຸ້ມຕົນເອງ ແລະສາມາດສ້າງລາຍຮັບເຂົ້າຄອບຄົວໂດຍນໍາໃຊ້ທ່າແຮງທີ່ມີພາຍໃນແຂວງໃຫ້ໄດ້ດີທີ່ສຸດ, ປະຢັດທີ່ສຸດ, ປຸກລະດົມໃຫ້ປະຊາຊົນມີຄວາມຕື່ນຕົວ, ມີຄວາມສາມັກຄີເພື່ອພ້ອມກັນສ້າງສາພັດທະນາປະເທດຊາດກໍ່ຄືແຂວງຈໍາປາສັກນັບມື້ດີຂຶ້ນເທື່ອລະກ້າວ.

แชร์