ເປີດເທສະການ ສະຕາດອັບລາວ ປະຈຳປີ 2021

ວັນທີ 17 ທັນວາ 2021, ກົມສົ່ງເສີມວິສາຫະກິດຂະໜາດນ້ອຍ ແລະກາງ (ກສວ), ກະຊວງອຸດສາຫະກໍາ ແລະການຄ້າຮ່ວມກັບກະຊວງເຕັກໂນໂລຊີ ແລະການສື່ສານ ແລະສະມາຄົມການຄ້າໄອຊີທີລາວ (LICA) ພາຍໃຕ້ການສະໜັບສະໜູນຫຼັກຈາກໂຄງການເຂົ້າເຖິງແຫຼ່ງທຶນຂອງຈຸນລະວິສາຫະກິດ, ວິສາຫະກິດຂະໜາດນ້ອຍ ແລະກາງເພື່ອຮັບມືກັບຜົນກະທົບ ແລະຟື້ນຟູຈາກໂຄວິດ-19 (MSME A2F-ESR) ຂອງທະນາຄານໂລກ, ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ (USAID Laos Business Environment), ກຸ່ມບໍລິສັດ ເອໄອເອັຟ,ບໍລິສັດລາວໂທລະຄົມ, ທະນາຄານມາຣູຮານເຈແປນລາວ ແລະພາກສ່ວນຕ່າງໆໄດ້ຈັດງານເທສະການສະຕາດອັບລາວ ປະຈຳປີ 2021 (Lao Startup Fest 2021) ຂຶ້ນເປັນປະທານໂດຍ ທ່ານ ບຸນເຖິງ ດວງສະຫວັນ ຮອງລັດຖະມົນຕີກະຊວງອຸດສະຫະກຳ ແລະການຄ້າ, ທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີກະຊວງເຕັກໂນໂລຊີ ແລະການສື່ສານ, ທ່ານ ສາ ສິລິພົງ ຮັກສາການຫົວໜ້າກົມສົ່ງເສີມວິສາຫະກິດຂະຫນາດນ້ອຍ ແລະ ກາງ, ທ່ານ ອາເລັກ ເຄຼມເມີ ຫົວໜ້າຫ້ອງການທະນາຄານໂລກ ປະຈໍາ ສປປ ລາວ ພາກພື້ນອາຊີ ແລະ ປາຊີຟິກ, ທ່ານ ຄໍເລິນ ຮີວເກິສ໌, ຫົວໜ້າຫ້ອງການການເຕີບໂຕດ້ານເສດຖະກິດ, ການສຶກສາ ແລະພະລັງງານ, USAID/Laos, ມີບັນດາອົງການຈັດຕັ້ງທັງພາກລັດ, ເອກະຊົນ, ນັກທຸລະກິດ ແລະ ຜູ້ປະກອບກິດຈະການທຸລະກິດ Startup ເຂົ້າຮ່ວມ.

ທຸລະກິດ Startup ມີການຂະຫຍາຍຕົວຢ່າງວ່ອງໄວໃນ ສປປ ລາວ ແລະ ຫຼາຍໆປະເທດທົ່ວໂລກ. ສຳລັບ ສປປ ລາວ ແລ້ວເຖິງຈະພົບບັນຫາທີ່ທ້າທາຍແຕ່ກໍບໍ່ສາມາດຢຸດຢັ້ງການຂະຫຍາຍຕົວຂອງທຸລະກິດ Startup ໄດ້ຊຶ່ງໃນໄລຍະວິກິດການໂຄວິດ-19 ທຸລະກິດສະຕາດອັບໄດ້ສືບຕໍ່ມີບົດບາດສໍາຄັນຕໍ່ເສດຖະກິດຂອງລາວເຮົາຢ່າງຕໍ່ເນື່ອງ.


ທ່ານ ບຸນເຖິງ ດວງສະຫວັນ ໄດ້ກ່າວວ່າ: “ ການຈັດງານ Lao STARTUP FEST 2021 ແມ່ນເປັນການຜັນຂະຫຍາຍ ແລະຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງກ້ານເສດຖະກິດ ແລະການເງິນທີ່ລັດຖະບານປະກາດໃຊ້ໂດຍສະເພາະແມ່ນວຽກສົ່ງເສີມການສ້າງສະຕາດອັບໃຫ້ແກ່ SME ຖືເປັນກິດຈະກໍາໜຶ່ງທີ່ຜັນຂະຫຍາຍແຜນວຽກຂອງກະຊວງອຸດສາຫະກໍາ ແລະ ການຄ້າພາຍໃຕ້ກອບນະໂຍບາຍ “ແຜນແມ່ບົດສຶກສາການຊຸກຍູ້ ແລະ ພັດທະນາທຸລະກິດລິເລີ່ມ (ສະຕາດອັບ)” ໃນໄລຍະກ້າວສູ່ເສດຖະກິດດິຈິຕອນ ທີ່ລັດຖະບານຫາກໍ່ໄດ້ຮອງຮັບຢ່າງເປັນທາງການ ໃນກອງປະຊຸມຄະນະລັດຖະບານ ປະຈຳເດືອນ ສິງຫາ 2021 ແລະ ເພື່ອເປັນການຜັນຂະຫຍາຍວຽກງານການຄຸ້ມຄອງ ແລະ ສົ່ງເສີມທຸລະກິດສະຕາດອັບເພື່ອສາມາດເຂົ້າເຖິງຕະຫຼາດທັງພາຍໃນ ແລະ ຕ່າງປະເທດ, ການເຜີຍແຜ່ສ້າງຈິດສຳນຶກໃຫ້ແກ່ຜູ້ປະກອບກິດ ຈະການທຸລະກິດສະຕາດອັບກ່ຽວກັບກົດໝາຍ ແລະ ລະບຽບການທາງດ້ານສະຕາດອັບ. ຕິດພັນກັນນັ້ນ ການສ້າງ ແລະພັດທະນາຜູ້ປະກອບກິດຈະການໃໝ່ ຫຼືທຸລະກິດສະຕາດອັບກໍ່ເປັນນະໂຍບາຍຈຸດສຸມໜຶ່ງທີ່ນອນໃນແຜນພັດທະນາຈຸນລະວິສາຫະກິດ, ວິສາຫະກິດຂະໜາດນ້ອຍ ແລະກາງ ຫຼືຈວນກ 2021-2025. ສະນັ້ນ, ກະຊວງອຸດສາຫະກໍາ ແລະ ການຄ້າກໍຄືລັດຖະບານຈຶ່ງໃຫ້ຄວາມສຳຄັນໃນການສະໜັບສະໜູນ, ສົ່ງເສີມ ແລະພັດທະນາຜູ້ປະກອບກິດຈະການລວມທັງວຽກງານສະຕາດອັບຢ່າງຕໍ່ເນື່ອງ.


ທ່ານ ອາເລັກ ແຄຣມເມີ ໄດ້ກ່າວສະແດງຄວາມຊົມເຊີຍກັບບັນດາທາ່ນຜູ້ປະກອບການທີ່ຊະນະລາງວັນດີເດັ່ນໃນຄັ້ງນີ້ ພວກທ່ານເປັນຜູ້ປະກອບການທີ່ສາມາດສ້າງວຽກເຮັດງານທໍາ, ສ້າງການດໍາລົງຊີວິດທີ່ດີຂຶ້ນ ແລະ ເປັນຜູ້ນໍາເອົາເທັກໂນໂລຊີມາປະດິດໃຊ້ ແລະ ນໍາເອົານະວະຕະກໍາໃໝ່ມານໍາໃຊ້ພັດທະນາພາຍໃນປະເທດ”.

ທ່ານ ຄໍເລິນ ຮີວ ກ່າວວ່າ: ສະຕາດອັບຈະປະກອບສ່ວນຕໍ່ການພັດທະນາເສດຖະກິດ ດ້ວຍການເພີ່ມນະວັດຕະກໍາ ແລະ ກະຕຸ້ນການແຂ່ງຂັນທີ່ນໍາໄປສູ່ການສ້າງຜະລິດຕະພັນ ແລະ ການບໍລິການໃໝ່ໆ ເພື່ອຊ່ວຍ ໃນການເຕີບໂຕຂອງເສດຖະກິດ.” ທ່ານກ່າວຕື່ມວ່າ, “USAID ມີຄວາມໝາຍໝັ້ນສະໜັບສະໜູນ ສປປ ລາວ ເພື່ອແກ້ໄຂການລະບາດຂອງພະຍາດ COVID-19 ແລະ ການກັບຄືນມາສ້າງສາໃຫ້ດີກວ່າເກົ່າພາຍຫຼັງການລະບາດຂອງພະຍາດ COVID-19”. 

ທ່ານ ນາງ ສຸພາພອນ ສວນນະວົງ ຮອງປະທານຜູ້ປະຈໍາການສະມາຄົມການຄ້າໄອຊີທີລາວໄດ້ກ່າວວ່າ: “ຈາກຜົນສຳເລັດໃນປີຜ່ານມາເຮັດໃຫ້ເຫັນວ່າການເຕີບໃຫຍ່ຂອງບັນດາສະຕາດອັບໃນ ສປປ ລາວ ແມ່ນມີລັກສະນະກ້າວກະໂດດ ແລະມີຄວາມໝາຍຄວາມສໍາຄັນຊຶ່ງເປັນເຫດຜົນທີ່ເຮັດໃຫ້ພວກເຮົາຕ້ອງໄດ້ຮ່ວມກັນສືບຕໍ່ສ້າງສະພາບແວດລ້ອມຂອງສະຕາດອັບໃນ ສປປ ລາວ ໃຫ້ສາມາດປະກອບສ່ວນເຂົ້າໃນການພັດທະນາປະເທດຢ່າງແທ້ຈິງ” ຊຶ່ງງານຄັ້ງນີ້ແມ່ນໄດ້ຈັດຂຶ້ນເປັນປີທີ 2 ເພື່ອເປັນການເຕົ້າໂຮມເອົາບັນດາຫົວໜ່ວຍທຸລະກິດ Startup ທີ່ມີຄວາມໂດດເດັ່ນໃນລາວ ເພື່ອມາສະແດງສັກກະຍະພາບ ແລະຄວາມສາມາດຂອງ ສະຕາດອັບ ໃນລາວ ເຊິ່ງພາຍໃນງານປະກອບມີ 3 ກິດຈະກຳຫຼັກຄື: ການວາງສະແດງກ່ຽວກັບການບໍລິການຂອງບັນດາຜູ້ປະກອບກິດຈະການສະຕາດອັບ ໃນ ສປປ ລາວ; ກອງປະຊຸມສຳມະນາກ່ຽວກັບການລິເລີ່ມທຸລະກິດໃນຂະແໜງການຕ່າງໆ, ການຊອກ ແລະເຂົ້າຫາແຫຼ່ງທຶນບັນຫາ ແລະ ສິ່ງທ້າທາຍ ແລະ ປະເດັນຕ່າງໆທີ່ທຸລະກິດຄວນຮູ້ຈາກຜູ້ປະກອບກິດຈະການສະຕາດອັບຢູ່ພາຍໃນ ແລະຕ່າງປະເທດ; ການແຂ່ງຂັນລາວສະຕາດອັບ Lao Startup Award ເຊິ່ງໃນປີນີ້ມີຜູ້ສະໝັກແຂ່ງຂັນທັງໝົດ 64 ຫົວໜ່ວຍເພື່ອຊິງເງິນລາງວັນເຖິງ 10.000 ໂດລາສະຫະລັດ.

ສຳລັບງານ Lao Startup Fest 2021 ແມ່ນຈັດຂຶ້ນໃນວັນທີ 17-19 ທັນວາ 2021 ແບບອອນລາຍໂດຍຜ່ານການ Live Facebook ຂອງ page ຄູ່ຮ່ວມງານຄື: Lao Startup Fest, ກົມສົ່ງເສີມວິສາຫະກິດຂະຫນາດນ້ອຍ ແລະກາງ (DOSMEP) ແລະ ສະມາຄົມການຄ້າໄອຊີທີ ລາວ (LICA).

แชร์