ເຜີຍແຜ່ຄວາມເປັນມາ ແລະຜົນການປະຕິບັດທຶນພັດທະນາເມືອງ

ກອງປະຊຸມເຜີຍແຜ່ຄວາມ ເປັນມາ ແລະຜົນສຳເລັດການຈັດ ຕັ້ງປະຕິບັດທຶນພັດທະນາເມືອງ ໃນໄລຍະ 2005-2021 ຢູ່ ສປປ ລາວ ໄດ້ຈັດຂຶ້ນໃນອາທິດຜ່ານມາ ທີ່ນະຄອນຫຼວງວຽງຈັນ ໂດຍ ການເປັນປະທານຮ່ວມຂອງທ່ານ ນິສິດ ແກ້ວປັນຍາ ຮອງລັດຖະມົນຕີກະຊວງພາຍໃນ, ທ່ານ ແມັດ ທີວ ຈອນສັນ ໄອເດິນ (ປະທານ ຮ່ວມ) ນັກເສດຖະສາດອາວຸໂສ, ອົງການສະຫະປະຊາຊາດເພື່ອ ການພັດທະນາ (UNDP), ມີຜູ້ ຕາງໜ້າຫ້ອງການອົງການກອງ ທຶນເພື່ອການພັດທະນາຂອງສະ ຫະປະຊາຊາດ (UNCDF), ຄະນະຮັບຜິດຊອບການຈັດຕັ້ງປະຕິບັດ ທຶນພັດທະນາເມືອງຂັ້ນສູນ ກາງ (IMC) ຈາກກະຊວງແຜນ ການ ແລະການລົງທຶນ, ກະຊວງ ການເງິນ ແລະກະຊວງພາຍໃນ, ຫົວໜ້າພະແນກ, ຮອງຫົວໜ້າພະ ແນກການທີ່ກ່ຽວຂ້ອງຂອງ 14 ແຂວງ ແລະເຈົ້າເມືອງ-ຮອງເຈົ້າ ເມືອງ ຈຳນວນ 33 ເມືອງ.


ກອງປະຊຸມຄັ້ງນີ້ ໄດ້ຮັບຟັງ ການລາຍງານ ໂດຍຫຍໍ້ກ່ຽວກັບ ຜົນສຳເລັດການຈັດຕັ້ງປະຕິບັດ ທຶນພັດທະນາເມືອງ ໃນໄລຍະ 2005-2021 ຢູ່ ສປປ ລາວ ຊຶ່ງ ແມ່ນໄລຍະການຈັດຕັ້ງປະຕິບັດ ທົດລອງໂຄງການ ໂດຍມີຫຼາຍ ກິດຈະກຳຫຼາຍຮູບແບບໃນການ ນຳໃຊ້ທຶນເຂົ້າໃນການພັດທະນາ ພື້ນຖານໂຄງການຂະໜາດນ້ອຍຢູ່ ຂັ້ນຊຸມຊົນຮາກຖານ ແລະຂັ້ນ ເມືອງ ຕາມທິດຊີ້ນຳກ່ຽວກັບການ ຫັນແຂວງເປັນຫົວໜ່ວຍຍຸດທະສາດ, ເມືອງເປັນຫົວໜ່ວຍແຜນການ-ງົບປະມານ ແລະບ້ານເປັນ ຫົວໜ່ວຍຈັດຕັ້ງປະຕິບັດ, ຊຶ່ງທຶນ ພັດທະນາເມືອງ (DDF) ເປັນ ການປະກອບສ່ວນສະໜັບສະໜູນ ໃຫ້ແກ່ປະຕິບັດວຽກງານສາມສ້າງ ຂອງລັດຖະບານ ໂດຍສະເພາະ ແມ່ນການສ້າງຂີດຄວາມສາມາດ ແກ່ອົງການປົກຄອງທ້ອງຖິ່ນຂັ້ນເມືອງ ໃນການຄຸ້ມຄອງ-ບໍລິຫານ ແລະປະຕິບັດໂຄງການພັດທະນາພື້ນຖານໂຄງລ່າງຂະໜາດນ້ອຍ ເພື່ອສະໜອງການບໍລິການແກ່ປະ ຊາຊົນ, ຊຶ່ງໄດ້ຈັດຕັ້ງປະຕິບັດຢູ່ ບັນດາແຂວງທີ່ໄດ້ຖືກເລືອກເຟັ້ນ ເປັນເປົ້າໝາຍໂຄງການຢູ່ 5 ແຂວງ ໃນຈໍານວນ 35 ເມືອງຄື: ແຂວງ ສາລະວັນ, ຫົວພັນ, ອຸດົມໄຊ, ຊຽງ ຂວາງ ແລະແຂວງເຊກອງ ໂດຍ ໃຊ້ງົບປະມານທັງໝົດໃນການຈັດ ຕັ້ງປະຕິບັດ 70 ຕື້ກວ່າກີບ ທີ່ໄດ້ ຮັບການສະໜັບສະໜູນຊ່ວຍເຫຼືອ ທາງດ້ານວິຊາການ ແລະດ້ານການ ເງິນຈາກອົງການຈັດຕັ້ງສາກົນ, ບັນດາປະເທດທີ່ໃຫ້ທຶນ ແລະຄູ່ຮ່ວມພັດທະນາອື່ນໆ ໂດຍສະເພາະ ແມ່ນອົງການສະຫະປະຊາຊາດເພື່ອການພັດທະນາ (ສປຊ - UNDP), ອົງການກອງທຶນເພື່ອການພັດທະນາຂອງສະຫະປະຊາຊາດ (UNCDF), ອົງການຮ່ວມມືສາກົນເພື່ອການພັດທະນາຂອງປະເທດສະວິດເຊີແລນ (SDC), ລັດຖະບານປະເທດລຸກຊໍາບວກ, ລັດຖະບານ ສ.ເກົາຫຼີ ແລະສະຫະພາບເອີຣົບ(EU).
ຜ່ານການຈັດຕັ້ງປະຕິບັດຕົວຈິງ ແລະຜ່ານການປະເມີນຜົນໂຄງການສາມາດຕີລາຄາ ແລະຢັ້ງຢືນ ວ່າການປະຕິບັດໂຄງການດ້ວຍ ການນໍາໃຊ້ທຶນພັດທະນາເມືອງ ເປັນກົນໄກທີ່ມີປະສິດທິພາບໃນ ການສ້າງຂີດຄວາມສາມາດ, ຍົກ ສູງຄວາມເປັນເຈົ້າການຂອງທ້ອງຖິ່ນ, ມີຄວາມໂປ່ງໃສ ແລະເພີ່ມ ຄວາມຮັບຜິດຊອບຂອງອົງການ ປົກຄອງທ້ອງຖິ່ນ, ສອດຄ່ອງກັບ ວຽກງານສາມສ້າງ ແລະການ ລຶບລ້າງຄວາມທຸກຍາກຂອງລັດ ຖະບານ.

 

แชร์