ຜົ້ງສາລີ-ດຽນບຽນ ຫາລືກະກຽມພົບປະຂອງການນຳຂັ້ນສູງ

ຂ່າວ: ແສງຄຳ ສາລີວັນ

ວັນທີ 15 ທັນວາ 2021, ຢູ່ຫຼັກໝາຍ 113 ຊາຍແດນລາວ-ຫວຽດນາມ ໄດ້ມີກອງປະຊຸມປຶກສາຫາລືກ່ຽວກັບການກະກຽມພົບປະຂອງການນຳຂັ້ນສູງສອງແຂວງຜົ້ງສາລີ ສປປ ລາວ ກັບ ແຂວງດຽນບຽນ ສສ ຫວຽດນາມ ໂດຍມີທ່ານ ອູ່ຄຳ ຕຸລາພັນ ຫົວໜ້າຫ້ອງວ່າການແຂວງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 2 ແຂວງຜົ້ງສາລີ, ທ່ານ ລີ້ ແທັງ ຕຽມ ຮອງຫົວໜ້າຫ້ອງວ່າການຄະນະພັກແຂວງດຽນບຽນ ພ້ອມຄະນະເຂົ້າຮ່ວມ.

ໃນກອງປະຊຸມຄັ້ງນີ້, ຄະນະວິຊາການສອງຝ່າຍໄດ້ປຶກສາຫາລືແລກປ່ຽນເນື້ອໃນເອກະສານຕາມທີ່ສອງຝ່າຍໄດ້ກະກຽມ, ກຳນົດວາລະດໍາເນີນກອງປະຊຸມພົບປະການນຳຂັ້ນສູງສອງແຂວງຜ່ານລະບົບທາງໄກ, ກຳນົດພາກສ່ວນທີ່ຈະເຂົ້າຮ່ວມ, ເປັນເອກະພາບເນື້ອໃນບົດຕີລາຄາການຮ່ວມມືໃນເດືອນ 12 ປີ 2016 ຮອດປີ 2021, ເອກະພາບຮ່າງເນື້ອໃນບົດບັນທຶກຊ່ວຍຈຳຂອງສອງແຂວງ ແລະແຜນການຮ່ວມມືແຕ່ ປີ 2022-2024, ລວມເຖິງຮູບແບບການຈັດພົບປະການນຳຂັ້ນສູງສອງແຂວງ ແລະດ້ານພິທີການ.

ສຳລັບເນື້ອໃນຕ່າງໆ ທີ່ຄະນະວິຊາການສອງຝ່າຍໄດ້ປຶກສາຫາລື ແລະແລກປ່ຽນຮ່ວມກັນໃນຄັ້ງນີ້, ແຕ່ລະຝ່າຍຈະໄດ້ລາຍງານການນຳແຂວງຂອງຕົນເພື່ອມີຄຳເຫັນປັບປຸງ, ເປັນເອກະພາບ ແລະສາມາດຈັດກອງປະຊຸມໂດຍໄວ, ພາຍຫຼັງສຳເລັດການພົບປະທາງໄກຂອງການນຳສອງແຂວງແລ້ວ, ແຕ່ລະແຂວງຈະໄດ້ລາຍງານໄປຍັງການນຳຂັ້ນສູນກາງຂອງຕົນຮັບຊາບເພື່ອມີທິດຊີ້ນຳຕື່ມໃນການຈັດຕັ້ງປະຕິບັດ.

ໃນໂອກາດນີ້, ອົງການປົກຄອງແຂວງດຽນບຽນກໍ່ໄດ້ມອບອຸປະກອນການແພດຊຶ່ງປະກອບມີ: ຜ້າອັດປາກການແພດ ຈຳນວນ 4 ແກັດ, ເຈວລ້າງມື 13 ແກັດ, ຊຸດປ້ອງກັນ PPE 6 ແກັດ ແລະເຫຼົ້າ 90 ຈຳນວນ 44 ແກັດ ລວມມູນຄ່າຫຼາຍກວ່າ 99 ລ້ານດົງ ໃຫ້ອົງການປົກຄອງແຂວງຜົ້ງສາລີ ເພື່ອນໍາໄປມອບຕໍ່ໃຫ້ອົງການປົກຄອງແຕ່ລະເມືອງນຳໃຊ້ເຂົ້າໃນການປ້ອງກັນ, ຄວບຄຸມ, ສະກັນກັ້ນ ແລະແກ້ໄຂການລະບາດຂອງພະຍາດໂຄວິດ-19 ຢູ່ແຕ່ລະເມືອງພາຍໃນແຂວງໃຫ້ໄດ້ຮັບຜົນດີ.

แชร์