ກຽມພັດທະນາດອນກາງຂອງ ເມືອງສັງທອງ

ລັດຖະບານກໍຄືນະຄອນຫຼວງວຽງຈັນ (ນວ) ໄດ້ອະນຸຍາດໃຫ້ເອກະຊົນລົງເກັບກຳຂໍ້ມູນ, ສຶກສາ ແລະສຳຫຼວດຄວາມເປັນໄປໄດ້ໃນການພັດທະນາ ແລະປົກປັກຮັກສາດອນກາງຂອງ,ບ້ານດອນກາງຂອງເມືອງສັງທອງທັງນີ້ຄາດວ່າຫາກການສຶກສາມີຜົນທາງບວກດອນດັ່ງກ່າວຈະໄດ້ຮັບການພັດທະນາດ້ານກະສິກຳ ແລ ະທ່ອງທ່ຽວໄປພ້ອມກັບການປົກປັກຮັກສາບໍ່ໃຫ້ມີການເຊາະເຈື່ອນ ແລະເປັນການສ້າງວຽກສ້າງລາຍຮັບໃຫ້ກັບປະຊາຊົນໄດ້ຫຼຸດພົ້ນຈາກຄວາມທຸກຍາກເທື່ອລະກ້າວ.

  ການອະນຸຍາດດັ່ງກ່າວໄດ້ມີພິທີເຊັນບົດບັນທຶກຄວາມເຂົ້າໃຈໃນວັນທີ 14 ມີນາຜ່ານມາທີ່ນະຄອນຫຼວງວຽງຈັນ ຊຶ່ງຕາງໜ້າລົງນາມລະຫວ່າງ ທ່ານ ພູຂົງ  ບັນນະວົງ ຫົວໜ້າພະແນກແຜນການ ແລະການລົງທຶນ ນວ, ທ່ານ ດາວເພັດ ອາລຸນ ເຈົ້າເມືອງສັງທອງກັບ ທ່ານ ນາງ ອໍລະໄທ ສັນຕິຄົວຄາອຳນວຍການບໍລິ ສັດກຣິດຕະພົງກຣຸບ ຈຳກັດ, ໂດຍມີທ່ານ ແກ້ວພິລາວັນ ອາໄພລາດ ຮອງເຈົ້າຄອງ ນະຄອນຫຼວງວຽງຈັນ ແລະພາກສ່ວນກ່ຽວຂ້ອງທັງສອງຝ່າຍເຂົ້າ ຮ່ວມເປັນສັກຂີພິຍານ.

  ທ່ານ ສິນລະປະກອນ ພົມມະໄຊສີ ຮອງຫົວໜ້າພະແນກແຜນການ ແລະການລົງທຶນກ່າວວ່າ: ດອນກາງຂອງແມ່ນເປັນໜຶ່ງທີ່ຕັ້ງຢູ່ໃນຂອບເຂດຂອງນະ ຄອນຫຼວງວຽງຈັນ ຊຶ່ງມີຄວາມຍາວປະມານ 5-6 ກິໂລແມັດ ແລະ ເປັນດອນໜຶ່ງທີ່ປະຊາຊົນໄດ້ເຂົ້າໄປດໍາລົງຊີວິດທໍາມາຫາກິນ, ປູກຝັງລ້ຽງສັດຫຼາຍຄອບ ຄົວຢູ່ໃນດອນດັ່ງກ່າວ, ໂດຍມີອົງການປົກຄອງບ້ານດອນກາງຂອງເປັນຜູ້ຄຸ້ມຄອງ, ການໄປມາຫາສູ່ສ່ວນຫຼາຍແມ່ນໃຊ້ພາຫະນະເຮືອເປັນສ່ວນໃຫຍ່ ແລະໃນແຕ່ລະປີກໍ່ເກີດມີການເຊາະເຈື່ອນຂອງດິນແຄມນ້ຳທີ່ຢູ່ອ້ອມຮອບດອນດັ່ງກ່າວພໍສົມຄວນ.

  ສະນັ້ນການນໍານະຄອນຫຼວງວຽງຈັນ ຈິ່ງເຫັນໄດ້ຄວາມໝາຍຄວາມສໍາຄັນໃນການພັດທະນາ ແລະປົກປັກຮັກສາດອນດັ່ງກ່າວຈິ່ງເຫັນດີຕົກລົງໃຫ້ມີການ ເກັບກໍາຂໍ້ມູນ, ສຶກສາ ແລະສໍາຫຼວດຄວາມເປັນໄປໄດ້ໃນການພັດທະນາດ້ານກະສິກຳ ແລະເປັນສະຖານທີ່ທ່ອງທ່ຽວໄປພ້ອມກັບການປົກປັກຮັກສາດອນດັ່ງກ່າວເພື່ອບໍ່ໃຫ້ມີການເຊະເຈື່ອນນັບມື້ນັບຫຼາຍຂຶ້ນ ແລະເພື່ອຈະສ້າງລາຍຮັບໃຫ້ແກ່ປະຊາຊົນພາຍໃນດອນກາງຂອງກໍ່ຄືເມືອງສັງທອງ ແລະນະຄອນຫຼວງວຽງຈັນ ກໍ່ຄືປະເທດຊາດບ້ານເມືອງໃຫ້ນັບມື້ນັບຫຼາຍຂຶ້ນກວ່າເກົ່າ.

ຂ່າວ: ວົງມະນີ

แชร์