ລັດ ແລະທຸລະກິດຫາລືສືບຕໍ່ແກ້ຄວາມຫຍຸ້ງຍາກ

   ລັດຖະບານ ແລະພາກທຸລະກິດໄດ້ສຸມໃສ່ປຶກສາຫາລື, ແລກປ່ຽນຄໍາຄິດເຫັນ ແລະສ້າງຄວາມເປັນເອກະພາບກັນໃນແຜນປະຕິບັດຕົວຈິງເພື່ອສືບຕໍ່ແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະບັນຫາຄົງຄ້າງຕ່າງໆ ທີ່ເປັນອຸປະສັກຕໍ່ການດໍາເນີນທຸລະກິດຂອງບັນດາຜູ້ປະກອບການທັງພາຍໃນ ແລະຕ່າງປະເທດ ແນໃສ່ເຮັດໃຫ້ແຜນພັດທະນາເສດຖະກິດ-ສັງຄົມແຫ່ງຊາດ ແລະແຜນການຈັດຕັ້ງປະຕິບັດ 2 ວາລະແຫ່ງຊາດໃນເງື່ອນໄຂໂຄວິດ-19 ໄດ້ຮັບການຈັດຕັ້ງປະຕິບັດຕົວຈິງ ແລະປະສົບຜົນສໍາເລັດ.


ກອງປະຊຸມພົບປະລະຫວ່າງຄະນະລັດຖະບານ ແລະພາກທຸລະກິດໄດ້ຈັດຂຶ້ນໃນລະຫວ່າງວັນທີ 16-17 ທັນວານີ້ ທີ່ຫໍປະຊຸມແຫ່ງຊາດໂດຍການເປັນປະທານຂອງ ທ່ານ ພັນຄໍາ ວິພາວັນ ນາຍົກລັດຖະມົນຕີ, ມີຄະນະລັດຖະບານ, ກໍາມາທິການສະພາແຫ່ງຊາດ, ສູນກາງແນວລາວສ້າງຊາດ ແລະອົງການຈັດຕັ້ງມະຫາຊົນຂັ້ນສູນກາງ, ມີຄະນະບໍລິຫານງານສະພາການຄ້າ ແລະອຸດສາຫະກຳແຫ່ງຊາດ ພ້ອມດ້ວຍບັນດານັກທຸລະກິດທີ່ກ່ຽວຂ້ອງເຂົ້າຮ່ວມ.
ທ່ານນາຍົກລັດຖະມົນຕີໄດ້ກ່າວເປີດກອງປະຊຸມວ່າ: ກອງປະຊຸມຄັ້ງນີ້ໄດ້ຮັບຟັງການລາຍງານ ແລະປຶກສາຫາລືໃນ 6 ແຜນການປະຕິບັດຕົວຈິງທີ່ສໍາຄັນຄື: 1 ) ແຜນການປະຕິບັດງານຕົວຈິງກ່ຽວກັບການປັບປຸງການບໍລິການລົງທຶນປະຕູດຽວຕິດພັນກັບການແບ່ງຂັ້ນຄຸ້ມຄອງ; 2) ແຜນການປະຕິບັດຕົວຈິງໃນການຊຸກຍູ້ ແລະ ສົ່ງເສີມການຜະລິດກະ ສິກໍາເປັນສິນຄ້າ; 3) ແຜນການປະຕິ ບັດຕົວຈິງໃນການຊຸກຍູ້ ແລະສົ່ງເສີມອຸດ ສາຫະກໍາປຸງແຕ່ງເພື່ອຊົມໃຊ້ພາຍໃນ ແລະສົ່ງອອກ; 4) ແຜນການຈັດຕັ້ງປະ ຕິບັດຕົວຈິງກ່ຽວກັບການສົ່ງເສີມຊຸກຍູ້ໂຄງການທີ່ຕິດພັນກັບຂົງເຂດການບໍລິ ການ ແລະການສ້າງລາຍຮັບ; 5) ແຜນ ການຈັດຕັ້ງປະຕິບັດຕົວຈິງ ໃນການສໍາຫຼວດທີ່ດິນ ແລະການກໍານົດຂອບເຂດຢູ່ບັນດາແຂວງລຽບຕາມທາງລົດໄຟ ລາວ-ຈີນ ເພື່ອກໍານົດເປັນເຂດກະສິກໍາ, ເຂດອຸດສາຫະກໍາ ແລະເຂດການບໍລິການເພື່ອດຶງດູດການລົງທຶນ; 6) ແຜນການຈັດຕັ້ງປະຕິບັດຕົວຈິງກ່ຽວກັບການພັດທະນາ, ຝຶກອົບຮົມສີມືແຮງງານ,ຈັດຫາວຽກເຮັດງານທໍາໃຫ້ບັນດາແຮງງານທັງພາຍໃນ ແລະ ຕ່າງປະເທດ.


ທ່ານນາຍົກລັດຖະມົນຕີກ່າວຕື່ມວ່າ: ບັນດາຫົວຂໍ້ທີ່ຈະລາຍງານ ແລະ ປຶກສາຫາລືຄັ້ງນີ້ມີຈໍານວນຫຼາຍ ແລະ ສໍາຄັນຫຼາຍເພາະພວກເຮົາຈະປຶກສາກັນໃນແງ່ການຈັດຕັ້ງປະຕິບັດຕົວຈິງກໍຄືການແບ່ງຄວາມຮັບຜິດຊອບລະຫວ່າງຂະແໜງການດ້ວຍກັນ, ລະຫວ່າງພາກລັດກັບພາກທຸລະກິດຫາກຈະບໍ່ເວົ້າຄືນສະພາບຕ່າງໆໃນຜ່ານມາ. ພ້ອມທັງ, ຮຽກຮ້ອງມາຍັງບັນດາທ່ານສະມາຊິກລັດຖະບານກໍຄືຄະນະບໍລິຫານສະພາການຄ້າ-ອຸດສາຫະກໍາຂັ້ນສູນກາງຊຶ່ງເປັນຕົວແທນໃຫ້ແກ່ພາກທຸລະກິດ ຈົ່ງໄດ້ພ້ອມກັນຍົກສູງຄວາມຮັບຜິດຊອບໃນການຄົ້ນຄວ້າ, ປະກອບຄໍາເຫັນຢ່າງກົງໄປກົງມາ, ກະທັດຮັດ, ມີຈຸດສຸມ, ສ້າງສັນ, ມີທາງອອກທີ່ຈະແຈ້ງເພື່ອໃຫ້ກອງປະຊຸມຂອງພວກເຮົາໃນຄັ້ງນີ້ ບັນລຸຕາມຄາດໝາຍທີ່ກໍານົດໄວ້.

แชร์