ເປີດປ້າຍໄຊຍະມຸງຄຸນ ກອງທຶນພັດທະນາໄຊສົມບູນ

ຂ່າວ: ພາພອນ ນະວົງໄຊ

ພິທີເປີດປ້າຍໄຊຍະມຸງຄຸນ ກອງທຶນພັດທະນາໄຊສົມບູນໄດ້ຈັດຂຶ້ນໃນຕອນບ່າຍຂອງວັນທີ14 ທັນວາ 2021 ນີ້ຢູ່ທີ່ສະໂມສອນເມືອງອະນຸວົງ. ໂດຍການເຂົ້າຮ່ວມຂອງທ່ານ ພົຕ ຄໍາລຽງ ອຸທະໄກສອນ ເຈົ້າແຂວງໄຊສົມບູນ ແລະ ທ່ານ ຈັນທະບຸນ ລັດຕະນະວົງ ຜູ້ຊ່ວຍວຽກນາຍົກລັດຖະມົນຕີ, ປະທານສະພາບໍລິຫານກອງທຶນພັດທະນາໄຊສົມບູນຕະຫຼອດຮອດການນໍາແຂວງ, ທະນະຄານແຫ່ງສາທາລະນະລັດ ປະຊາທິປະໄຕປະຊາ ຊົນລາວ ສາຂາພາກເໜືອແຂວງຊຽງຂວາງ, ທະນະຄານທຸລະກິດ-ສະເພາະກິດປະຈໍາແຂວງໄຊສົມບູນພ້ອມດ້ວຍສະມາຊິກສະພາບໍລິຫານກອງທຶນພັດທະນາໄຊສົມບູນ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ໂອກາດດັ່ງກ່າວ ທ່ານ ສີສຸພັນ ໂພໄຊສີ ຫົວໜ້າຫ້ອງການກອງທຶນພັດທະນາໄຊສົມບູນ ໄດ້ລາຍງານຄວາມເປັນມາຂອງກອງທຶນພັດທະນາໄຊສົມບູນ. ໂອກາດດຽວກັນນັ້ນ, ທ່ານ ຈັນທະບຸນ ລັດຕະນະວົງ ຜູ້ຊ່ວຍວຽກນາຍົກລັດຖະມົນຕີ, ປະທານສະພາບໍລິຫານກອງທຶນພັດທະນາໄຊສົມບູນໄດ້ມີຄໍາເຫັນກ່າວເປີດປ້າຍໄຊຍະມຸງຄຸນ ຢ່າງເປັນທາງການ, ຊຶ່ງທ່ານໄດ້ວາງຄາດໝາຍສູ້ຊົນແຕ່ນີ້ຮອດປີ 2025 ສ້າງໃຫ້ກອງທຶນພັດທະນາໄຊສົມບູນກາຍເປັນທະນະຄານພັດທະນາໄຊສົມບູນ. ຈາກນັ້ນ, ທ່ານ ພົຕ ຄໍາລຽງ ອຸທະໄກສອນ ແລະ ທ່ານ ຈັນທະບຸນ ລັດຕະນະວົງ ພ້ອມດ້ວຍສະມາຊິກສະພາບໍລິຫານກອງທຶນໄດ້ຂຶ້ນຕັດແຖບຜ້າພ້ອມທັງເປີດປ້າຍສັນຍາລັກ (ໂລໂກ້) ກອງທຶນພັດທະນາໄຊສົມບູນ ແລະລັ່ນຄ້ອງ 9 ບາດ ເພື່ອເປັນສິລິມຸງຄຸນໃຫ້ແກ່ພິທີເປີດປ້າຍໄຊຍະມຸງຄຸນກອງທຶນພັດທະນາໄຊສົມບູນ. 

ຊຶ່ງຈຸດປະສົງຂອງການສ້າງກອງທຶນພັດທະນໄຊສົມບູນແມ່ນການຜັນຂະຫຍາຍດໍາລັດ 414 ຂອງລັດຖະບານວ່າດ້ວຍນະໂຍບາຍພັດທະນາເສດຖະກິດຂອງແຂວງໄຊສົມບູນເພື່ອແນໃສ່ພັດທະນາເສດຖະກິດ-ສັງຄົມ ຂອງແຂວງຕາມແນວຄວາມຄິດຍຸດທະສາດກໍ່ຄື “ຢາກແກ້ໄຂຄວາມບໍ່ສະຫງົບຕ້ອງມີການພັດທະນາ” ແລະ “ພັດທະນາແບບຍືນຍົງຕາມທິດສີຂຽວ”  ຊຶ່ງທ່ານ ສີສຸພັນ ໂພໄຊສີ ຫົວໜ້າຫ້ອງການກອງທຶນພັດທະນາໄຊສົມບູນໄດ້ໃຫ້ສໍາພາດວ່າໃນໄລຍະຜ່ານມາຫ້ອງການກອງທຶນໄດ້ ເອົາໃຈໃສ່ຈັດຕັ້ງປະຕິບັດວຽກງານສະໜອງສິນເຊື່ອດ້ວຍກົນໄກອັດຕາດອກເບ້ຍຕໍ່າ ແລະມີໄລຍະເວລາຊໍາລະຍາວນານເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຕາມແນວຄິດຍຸດທະສາດ (ສໍາພາດ).

แชร์