ຄາດບໍ່ຫຼຸດ 30 ພັນຄົນມາທ່ຽວຊົມມະຫາກຳອຸດສາຫະກຳປຸງແຕ່ງອາຫານນາໆຊາດ

  ເປີດສາກຂຶ້ນຢ່າງເປັນທາງການແລ້ວງານມະຫະກຳອຸດສາຫະກຳປຸງແຕ່ງອາຫານນາໆຊາດຄັ້ງທຳອິດທັງນີ້ຄະນະຈັດງານຄາດວ່າຈະມີຜູ້ຄົນບໍ່ຫຼຸດ 30 ພັນຄົນມາທ່ຽວຊົມ ແລະຊື້ສິນຄ້າພາຍໃນງານທີ່ເຂົ້າຮ່ວມ 360 ຫ້ອງຈາກພາຍໃນ ແລະຕ່າງປະເທດ.

  ງານຄັ້ງນີ້ຈະດຳເນີນແຕ່ວັນທີ 15-18 ມີນາ ທີ່ສູນການຄ້າລາວ-ໄອເຕັກນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມເປີດງານຂອງ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ພ້ອມນີ້ກໍ່ມີທ່ານລັດຖະມົນຕີ, ຮອງລັດຖະມົນຕີ ແລະແຂກຖືກເຊີນເຂົ້າຮ່ວມ.

  ທ່ານ ໄຊສົມເພັດ ນໍຣະສິງຫ໌ ຫົວໜ້າກົມສົ່ງເສີມການຄ້າກະຊວງອຸດສາຫະກຳ ແລະການຄ້າກ່າວວ່າ: ງານຄັ້ງນີ້ຈັດຂຶ້ນເປັນຄັ້ງທໍາອິດເປັນງານວາງສະແດງລະດັບຊາດ ແລະພາກພື້ນເພື່ອຍົກລະດັບສິນຄ້າທັງເປັນການຜັນຂະຫຍາຍແຜນພັດທະນາເສດຖະກິດ-ສັງຄົມ ຂອງລັດຖະບານວາງອອກໂດຍເນັ້ນການສົ່ງ ເສີມສິນຄ້າທີ່ຕິດພັນໃນໝວດສິນຄ້າກະສິກໍາປຸງແຕ່ງເພື່ອສົ່ງອອກ ແລະສິນຄ້າທ່າແຮງເຊັ່ນ: ຊາ, ກາເຟ, ເຂົ້າ ແລະ ອື່ນໆ, ເພື່ອສ້າງເວທີໃຫ້ຜູ້ປະກອບການພາຍໃນ ແລະຕ່າງປະເທດໄດ້ໂຄສະນາສິນຄ້າ ແລະແລກປ່ຽນການຜະລິດກະກໍາປຸງແຕ່ງຂອງຕົນລວມເຖິງເຄື່ອງມືຮັບໃຊ້ການຜະລິດຂັ້ນທ້ອງຖິ່ນ ແລະຕ່າງປະເທດເພື່ອໃຫ້ສັງຄົມ ແລະຜູ້ເຂົ້າຮ່ວມໄດ້ຮັບຮູ້ ແລະກ້າວໄປເຖິງການສ້າງໂອກາດໃຫ້ຜູ້ປະກອບການສາມາດຈັບຄູ່ຮ່ວມມືການຄ້ານນໍາອີກ.

 ພາຍໃນງານປະກອບດ້ວຍງານວາງສະແດງ ແລະຈໍາໜ່າຍຜະລິດຕະພັນລາວ, ສິນຄ້າກະສິກໍາປຸງແຕ່ງ, ເຄື່ອງອຸປະໂພກ ແລະບໍລິໂພກ, ເຄື່ອງມືຮັບໃຊ້ການຜະລິດ, ເຄື່ອງອຸດສາຫະກໍາກົງຈັກໜັກ, ການແຂ່ງຂັນກິນອາຫານ,ວິທີສອນເຮັດຂະໜົມ,ຊີມອາຫານລາວກັບເຂົ້າໜຽວ,ງານສໍາມະນາດ້ານວິຊາການ, ການສະແດງສິລະປະວັດທະນະທໍາ ແລະກິດຈະກໍາອື່ນໆ, ຊຶ່ງຄາດວ່າຈະມີຜູ້ເຂົ້າຮ່ວມທັງໝົດ 30 ພັນຄົນ ແລະມີຫ້ອງວາງສະແດງສິນຄ້າທັງໝົດ 360 ຫ້ອງຈາກຜູ້ປະກອບການທັງພາຍໃນ ແລະຕ່າງປະເທດ.

ຂ່າວ: ກິ່ງລັດຕະນະ

• 18/03/2019