ນະຄອນປາກເຊ ເປີດຊໍາລະຄ່າບໍລິການຂີ້ເຫຍື່ອຜ່ານລະບົບທັນສະໄໝ່

ຂ່າວ: ໂພທິລາດ

ເພື່ອຮັບປະກັນການຈັດເກັບລາຍຮັບເຂົ້າງົບມານລັດໃຫ້ມີຄວາມສະດວກວ່ອງໄວໂປ່ງໃສ ແລະກວດສອບໄດ້ຫຼ້າສຸດ ນະຄອນປາກເຊ ແຂວງຈໍາປາສັກໄດ້ເປີດໃຫ້ບໍລິການຊໍາລະຄ່າເກັບຂີ້ເຫຍື່ອຜ່ານລະບົບທັນສະໄໝ່ຂຶ້ນກັບບໍລິສັດທີ່ການບໍລິຫານຈັດການ ແລະມີຜົນສໍາເລັດດ້ານນີ້ມາຢ່າງຫຼວງຫຼາຍ.

ພິທີເປີດການນໍາໃຊ້ການຊໍາລະຄ່າບໍລິການເກັບຂີ້ເຫຍື່ອຜ່ານລະບົບທັນສະໄໝໄດ້ມີຂຶ້ນໃນວັນທີ 14 ທັນວາ 2021 ຜ່ານມານີ້ທີ່ສະໂມສອນນະຄອນປາກເຊ, ໂດຍການໃຫ້ກຽດເຂົ້າຮ່ວມເປັນປະທານຂອງທ່ານ ບົວລີ ເພັດສົງຄາມ ເຈົ້ານະຄອນປາກເຊ, ມີທ່ານ ປອ. ບຸນຍະເດດ ທອງສະຫວັນ ຫົວໜ້າພະແນກອຸດສາຫະກໍາ ແລະການຄ້າ, ມີທ່ານ ບຸນເນົາ ຟອງຄໍາແດງ ຮອງເຈົ້ານະຄອນປາກເຊ, ມີປະທານ, ຜູ້ອໍານວຍການບໍລິສັດ ແລະບັນດາພະນັກງານວິຊາການເຂົ້າຮ່ວມ.

ໃນພິທີທ່ານ ໃຈທະໜອມ ພໍລິສິມ ປະທານບໍລິສັດ ອິນຟຣາໂຊລ ຈໍາກັດ, ໄດ້ກ່າວວ່າ: ເຫັນໄດ້ຄວາມສໍາຄັນຕໍ່ການພັດທະນາປະເທດຊາດດ້ວຍການຫັນນໍາໃຊ້ລະບົບໄອທີ ແລະ ເຄື່ອງມືທີ່ທັນສະໄໝເຂົ້າໃນການບໍລິຫານຈັດການຂອງພາກລັດ, ໂດຍສະເພາະແມ່ນການຈັດເກັບລາຍຮັບເຂົ້າງົບປະມານແຫ່ງລັດໃຫ້ມີຄວາມສະດວກ, ວ່ອງໄວ, ໂປ່ງໃສ ແລະສາມາດກວດສອບໄດ້, ດັ່ງນັ້ນທີມງານບໍລິສັດ ອິນຟຣາໂຊລ ຈໍາກັດ ຈຶ່ງເຫັນໄດ້ຄວາມສໍາຄັນໃນການພັດທະນາລະບົບຊໍາລະຄ່າບໍລິການເກັບຂົນຂີ້ ເຫຍື່ອຂຶ້ນ ແລະເຫັນໄດ້ທ່າແຮງທິດທາງການຫັນເປັນເມືອງທັນສະໄໝຂອງນະຄອນປາກເຊບວກກັບວິໄສທັດ ແລະປະສົບການຂອງທິມງານບໍລິສັດທີ່ເຕີບໃຫຍ່ຈາກການພັດທະນາລະບົບຊໍາລະສະສາງຜ່ານທະນາຄານ, ດັ່ງນັ້ນຈຶ່ງໄດ້ປຶກສາກັບບໍລິສັດ ໂຊກມະຫາຊັບ ຈໍາກັດ ສືກສາຄວາມເປັນໄປໄດ້ໃນການລົງທຶນ ແລະໄດ້ສະເໜີຕາມຂັ້ນຕອນການລົງທຶນຜ່ານພະແນກແຜນການ ແລະການລົງທືນແຂວງ, ໂດຍໄດ້ເຊັນບົດບັນທຶກຄວາມເຂົ້າໃຈ (MOU) ຂຶ້ນໃນກາງເດືອນຕຸລາ 2020, ຊຶ່ງຜ່ານການລົງເກັບກໍາຂໍ້ມູນ ແລະພັດທະນາລະບົບໃນໄລຍະ 1 ປີຜ່ານມາຈຶ່ງໄດ້ກ້າວເຂົ້າສູ່ການເຊັນສັນຍາຮ່ວມກັບນະຄອນປາກເຊໃນຕົ້ນເດືອນທັນວາ 2021 ໃນການເລີ່ມນໍາໃຊ້ລະບົບຊໍາລະຄ່າບໍລິການເກັບຂີ້ເຫຍື່ອຜ່ານລະບົບທັນສະໄໝຢ່າງເປັນທາງການ, ຊຶ່ງຖືວ່າເປັນບາດກ້າວທີ່ສໍາຄັນໃນການປະຕິບັດຕາມແນວທາງຂອງພັກ, ນະໂຍບາຍຂອງລັດໃນການຫັນເປັນຕົວເມືອງທັນສະໄໝ.

ທ່ານປະທານບໍລິສັດກ່າວຕື່ມວ່າ: ລະບົບດັ່ງກ່າວຖືກພັດທະນາໂດຍບໍລິສັດອິນຟຣາໂຊລ ຈໍາກັດຜູ້ດຽວ, ຊຶ່ງເປັນບໍລິສັດທີ່ໄດ້ຮັບສິດສໍາປະທານເປັນຕົວແທນຂອງນະຄອນປາກເຊໃນການຄຸ້ມຄອງ ແລະການບໍລິຫານຈັດການລະບົບເກັບຄ່າບໍລິການເກັບຂົນຂີ້ເຫຍື່ອກັບທຸກໆພາກສ່ວນໃນນະຄອນປາກເຊ ຄື: ພາກສ່ວນຄົວເຮືອນ, ຫົວໜ່ວຍທຸລະກິດ ແລະຫ້ອງການລັດ, ສະນັ້ນການຫັນເປັນທັນສະໄໝຂອງນະຄອນປາກເຊ ໃນຄັ້ງນີ້ຈະສົ່ງຜົນດີຕໍ່ທຸກໆພາກສ່ວນບໍ່ວ່າຈະເປັນພາກລັດ ແລະປະຊາຊົນ.

แชร์