ເປີດໃຊ້ອາຄານວິຊາຊີບຄຳມ່ວນ

ພິທີເປີດການນຳໃຊ້ອາຄານຝຶກອົບຮົມວິຊາຊີບຊາວໜຸ່ມຢູ່ສູນຝຶກອົບຮົມວິຊາຊີບແຂວງຄຳມ່ວນພາຍໃຕ້ “ໂຄງການເສີມສ້າງໂອກາດທາງດ້ານສັງຄົມ ແລະເສດຖະກິດ ໃຫ້ກັບຊາວໜຸ່ມໃນ ສປປ ລາວ” ໂດຍການສະໜັບສະໜູນຈາກອົງການສະຫະປະຊາຊາດເພື່ອການພັດທະນາ ປະຈຳ ສປປ ລາວ ແລະສະຖານທູດສະຫະພັນລັດເຊຍ ປະຈຳລາວ ຈັດຂຶ້ນໃນວັນທີ 14 ທັນວາ 2021 ໂດຍມີທ່ານ ອາລຸນໄຊ ສູນນະລາດ ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ (ສຊປລ), ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ທ່ານ Vladimir KALANIN ເອກອັກຄະລັດຖະທູດສະຫະພັນລັດເຊຍ ປະຈຳລາວ, ທ່ານ ນາງ Ricarda Rieger ຕາງໜ້າອົງການສະຫະປະຊາຊາດເພື່ອການພັດທະນາ UNDP ປະຈຳລາວ, ພ້ອມດ້ວຍພາກສ່ວນທີ່ກ່ຽວຂ້ອງ ແລະແຂກທີ່ຖືກເຊີນເຂົ້າຮ່ວມ.

ໂຄງການເສີມຂະຫຍາຍໂອກາດທາງດ້ານສັງຄົມ ແລະເສດຖະກິດໃຫ້ກັບຊາວໜຸ່ມໃນ ສປປ ລາວ ເປັນໂຄງການໜຶ່ງທີ່ຜັນຂະຫຍາຍຍຸດທະສາດເພື່ອການພັດທະນາຊາວໜຸ່ມ ແລະເຍົາວະຊົນ 2021-2030 ເຊິ່ງແບ່ງເປັນ 3 ຂົງເຂດຄື: 1. ການສ້າງແຜນພັດທະນາທ້ອງຖິ່ນໂດຍອີງໃສ່ແຜນຜັນຂະຫຍາຍຍຸດທະສາດແຫ່ງຊາດ ການພັດທະນາຊາວໜຸ່ມ ແລະເຍົາວະຊົນ, 2. ການນຳໃຊ້ທ່າແຮງຂອງຊາວໜຸ່ມໃນທ້ອງຖິ່ນເພື່ອພັດທະນາທີ່ມີສ່ວນຮ່ວມຈາກທຸກຂະແໜງການໂດຍຍົກຄຸນນະພາບ ແລະຫຼຸດຜ່ອນຄວາມແຕກໂຕນໃນສູນພັດທະນາຊາວໜຸ່ມ-ເຍົາວະຊົນ, 3. ການເສີມຂະຫຍາຍພັນທະ ແລະການມີສ່ວນຮ່ວມທາງສັງຄົມຂອງຊາວໜຸ່ມໃນລະດັບຜູ້ຕັດສິນບັນຫາ. ເຊິ່ງຈຸດປະສົງແມ່ນເພື່ອສ້າງສະພາບແວດລ້ອມທີ່ເອື້ອອຳນວຍໃຫ້ແກ່ຊາວໜຸ່ມເພື່ອຊຸກຍູ້ທ່າແຮງໃຫ້ເຂົາເຈົ້າປະຕິບັດຕາມພາລະບົດບາດທີ່ສຳຄັນ ແລະ ສຳເລັດຜົນທາງດ້ານເສດຖະກິດ,ສັງຄົມພາຍໃຕ້ກອບນະໂຍບາຍຂອງຊາວໜຸ່ມໃນທົ່ວປະເທດ ແລະປະກອບສ່ວນຢ່າງແຂງແຮງເຂົ້າໃນການປະຕິບັດ 2 ວາລະແຫ່ງຊາດໃຫ້ປະສົບຜົນສຳເລັດເທື່ອລະກ້າວ.

ອາຄານຝຶກອົບຮົມວິຊາຊີບຊາວໜຸ່ມແຂວງຄຳມ່ວນແມ່ນໄດ້ດຳເນີນການກໍ່ສ້າງໃນເດືອນມັງກອນ 2021 ແລະໄດ້ສຳເລັດໃນເດືອນພະຈິກ 2021 ເປັນອາຄານ 2 ຊັ້ນ, ເບຕົງເສີມເຫຼັກ, ມີຂະໜາດ 10x28 ແມັດ ແລະມີ 6 ຫ້ອງ ລວມມູນຄ່າການກໍ່ສ້າງ 220.000 ໂດລາສະຫະລັດ ນອກນັ້ນຍັງມີງົບປະມານສໍາລັບການພັດທະນາຫຼັກສູດຝຶກອົບຮົມ, ການຈັດຊື້ອຸປະກອນ, ງົບປະມານບໍລິຫານ ແລະອື່ນໆ ລວມມູນຄ່າການຊ່ວຍເຫຼືອທັງໝົດ 329.000 ໂດລາສະຫະລັດ ໂດຍການສະໜັບສະໜູນຈາກອົງການສະຫະປະຊາຊາດເພື່ອການພັດທະນາ ແລະສະຖານທູດສະຫະພັນລັດເຊຍ ປະຈຳລາວ. ເຊິ່ງຄະນະຮັບຜິດຊອບຂັ້ນສູນກາງ, ຂັ້ນແຂວງ ແລະພາກສ່ວນທີ່ກ່ຽວຂ້ອງແມ່ນໄດ້ກະກຽມຄວາມພ້ອມທາງດ້ານຫຼັກສູດ, ການຝຶກອົບຮົມວິຊາຊີບ ແລະພັດທະນາຫຼັກສູດວິຊາຊີບໂດຍໄດ້ແຕ່ງຕັ້ງພະນັກງານຂັ້ນແຂວງ,ຄະນະຊາວໜຸ່ມຂັ້ນເມືອງເຂົ້າຮ່ວມຝຶກອົບຮົມເພື່ອມາເປັນຄູຝຶກຢູ່ພາຍໃນສູນດັ່ງກ່າວເຊິ່ງປະກອບມີ 6 ວິຊາຄື: ການລ້ຽງກົບ, ລ້ຽງປາໃນໜອງຜ້າຢາງ, ການລ້ຽງຈີ່ນາຍ, ການຂະຫຍາຍພັນພືດ, ການປູກຜັກໃນຄົວເຮືອນ, ການປູກເຫັດ ແລະໄດ້ສ້າງສະຖານທີ່ສຳລັບສາທິດທົດລອງການປູກພືດ,ລ້ຽງສັດສຳລັບການຝຶກອົບຮົມໃຫ້ແກ່ຊາວໜຸ່ມ-ໄວໜຸ່ມ ໃນກຸ່ມເປົ້າໝາຍຊຸດທຳອິດພາຍຫຼັງທີ່ເປີດນຳໃຊ້ມີຈຳນວນ 20 ຄົນ ເຊິ່ງເປັນການຝຶກອົບຮົມໄລຍະສັ້ນ 3 ເດືອນ ຫຼັງຈາກທີ່ຈົບແລ້ວຈະໄດ້ຮັບໃບຢັ້ງຢືນພ້ອມທັງສ້າງເງື່ອນໄຂອຳນວຍໃຫ້ແກ່ຊາວໜຸ່ມ ໂດຍຜ່ານຄະນະໃຫ້ຄຳປຶກສາ, ຜູ້ຊ່ຽວຊານ, ຜູ້ປະກອບການ, ຫົວໜ່ວຍທຸລະກິດທາງດ້ານກະສິກຳໃຫ້ຄຳແນະນຳ ແລະຈະໄດ້ມີການຕິດຕາມ, ຊຸກຍູ້ໃຫ້ເຂົາເຈົ້າສາມາດນຳໄປປະກອບອາຊີບສາຂາວິຊາກະສິກຳໃນຂັ້ນຕໍ່ໄປ.

   ໂອກາດດັ່ງກ່າວ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນກໍ່ໄດ້ມີຄຳເຫັນສະແດງຄວາມຂອບໃຈມາຍັງສູນກາງ ສຊປ, ອົງການສະຫະປະຊາຊາດເພື່ອການພັດທະນາ ແລະສະຖານທູດສະຫະພັນລັດເຊຍ ປະຈຳລາວ ທີ່ໃຫ້ການຊ່ວຍເຫຼືອເຂົ້າໃນການກໍ່ສ້າງສູນດັ່ງກ່າວເຊິ່ງສອດຄ່ອງກັບຂີດໝາຍຂອງລັດຖະບານກໍ່ຄືແຂວງຄຳມ່ວນໃນການພັດທະນາຊັບພະຍາກອນມະນຸດໂດຍສະເພາະແມ່ນການສ້າງຊາວໜຸ່ມ-ໄວໜຸ່ມໃຫ້ມີຄວາມຮູ້, ທັກສະ, ອາຊີບເພື່ອສ້າງລາຍຮັບໃຫ້ແກ່ຕົນເອງ ແລະ ຄອບຄົວເພື່ອປະກອບສ່ວນເຂົ້າໃນການສ້າງສາພັດທະນາປະເທດຊາດພ້ອມດຽວກັນນີ້ກໍ່ຮຽກຮ້ອງມາຍັງຂະແໜງການກ່ຽວຂ້ອງຈົ່ງໄດ້ເອົາໃຈໃສ່ປົກປັກຮັກສາ ແລະ ພັດທະນາສູນດັ່ງກ່າວໃຫ້ກາຍເປັນຕົວແບບໃນອະນາຄົດ.

ຂ່າວ: ກອງຄຳ

แชร์