ເປີດຫ້ອງເສື້ອ ມິນິດສຕຣີ້ ອອຟ ຊິ້ວ ແລະແບຣນນິວນອມ

ຂ່າວ: ບຸນນິກ
   ທ້າຍອາທິດຜ່ານມາໄດ້ມີງານເປີດຕົວຫ້ອງເສື້ອແຫ່ງໃໝ່ຂອງແບຣນດັງຂອງລາວມິນິດສຕຣີ້ ອອຟ ຊິ້ວ (Ministry of Silk) ແລະ ແບຣນນ້ອງໃໝ່ທີ່ຢູ່ໃນເຄືອດຽວກັນຊື່ວ່າ ນິວນອມ (NEWNORM) ໂດຍມີແຂກສຳຄັນຕ່າງໆບໍ່ວ່າຈະເປັນບັນດາເອກອັກຄະລັດຖະທູດ ແລະທູຕານຸທູດຕ່າງໆ, ຫົວໜ້າທຸລະກິດ, ແຂກຈາກວົງການແຟຊັ້ນ ແລະວົງການບັນເທີງ ແລະສື່ມວນຊົນເຂົ້າຮ່ວມ.


   ຫ້ອງເສື້ອ ມິນິດສຕຣີ້ ອອຟ ຊິ້ວ ເປັນຫ້ອງເສື້ອໃຫຍ່ທີ່ມີຊື່ສຽງແນວໜ້າຂອງລາວໂດຍໄດ້ຮັບການຈົດຖະບຽນການຄ້າໃນສາກົນເປັນແບຣນເຄື່ອງນຸ່ງທຳອິດຂອງລາວ ທີ່ຈົດຖະບຽນການຄ້າສາກົນທັງຍັງເປັນສະມາຊິກຜູ້ກໍ່ຕັ້ງ ແລະສະມາຊິກຖາວອນຂອງລາວແຟຊັ້ນວີກ. ເອກະລັກສະເພາະຕົວຂອງມິນິດສຕຣີ້ ອອຟ ຊິ້ວ ແມ່ນສະໄຕການອອກແບບທີ່ເນັ້ນຄວາມລຽບຫລູສະຫງ່າງາມເຮັດໃຫ້ຜູ້ທີ່ສວມໃສ່ມີບຸກຄະລິກທີ່ໂດດເດັ່ນ ແລະແທດເໝາະກັບທຸກໂອກາດ. ສ້າງຕັ້ງຂຶ້ນໃນປີ 2012 ແລະໄດ້ເປັນແບຣນ ທີ່ມີບົດບາດສຳຄັນໃນການພັດທະນາວົງການແຟຊັ້ນໃນລາວເປັນຕົ້ນມາ.


 ໃນປີ 2021, ມິນິດສຕຣີ້ ອອຟ ຊິ້ວ ໄດ້ເປີດຕົວແບຣນນ້ອງໃໝ່ຊື່ວ່າ ນິວນອມ ດ້ວຍນະໂຍບາຍການຕະຫລາດທີ່ແນໃສ່ປັບປ່ຽນຮູບແບບທຸລະກິດໃຫ້ເຂົ້າກັບແບບແຜນດຳລົງຊີວິດປະຈຳວັນຂອງສັງຄົມເນື່ອງຈາກຜົນກະທົບຈາກການແຜ່ລະບາດຂອງພະຍາດໂຄວິດ-19 ທີ່ມີຜົນກະທົບຕໍ່ຮູບແບບການດຳລົງຊີວິດ ແລະ ເສດຖະກິດສັງຄົມ. ແບຣນນິວນອມ ໄດ້ເນັ້ນໃສ່ການອອກແບບທີ່ຮຽບງ່າຍສວມໃສ່ສະບາຍໃຊ້ແຜ່ນແພທີ່ມີຄຸນນະພາບດີແຕ່ລາຄາບໍ່ແພງເຊັ່ນ ຜ້າຝ້າຍ ແລະຜ້າລີນິນ ທີ່ຄົນທົ່ວໄປສາມາດຊື້ຫາໄດ້ສະບາຍສະບາຍ ແລະສາມາດສວມໃສ່ໄດ້ໃນທຸກໂອກາດບໍ່ວ່າຈະເປັນໂອກາດລຳລອງ ຫຼືທາງການ.


ມິນິດສຕຣີ້ ອອຟ ຊິ້ວ ມີແບຣນອຳບາດ ສະເດີ້ ເປັນ 2 ຄົນທີ່ມີຊື່ສຽງໃນວົງການແຟຊັ້ນ ແລະວົງການບັນເທີງຂອງລາວຄືນ. ມິມີ່ ພູນຊັບ ພົນໂຍທາ (ມິດສ ອິນເຕີ ເນເຊັນແນ້ວ ລາວ ປີ 2017) ແລະ ທ. ອາລີ ໄຊຖາວອນ (ມິດສເຕີອິນເຕີ ເນເຊັນແນ້ວ ລາວ ປີ 2019).
ນິວນອມ ກໍ່ເຊັ່ນກັນ ມີແບຣນອຳບາດ ສະເດີ້ ເປັນ 2 ຄົນທີ່ມີຊື່ສຽງໃນວົງການ ແຟຊັ້ນ ແລະ ບັນເທີງຂອງລາວຄື ນ. ຕຸກຕາ ພິລາຄົງ (ນາງແບບທີ່ກຳລັງມາແຮງ) ແລະ ທ. ຊານົນ ມະນີຜົນ (ພະເອກ, ນາຍ ແບບ, ນັກຮ້ອງ ທີ່ມີຊື່ສຽງ).


ຮ້ານໃຫມ່ຂອງທັງສອງຫ້ອງເສື້ອນີ້ຕັ້ງຢູ່ຖະໜົນໜໍ່ແກ້ວກຸມມານ ບ້ານມີໄຊ ກົງກັນຂ້າມກັບໂຮງແຮມດວງເດືອນ. ເປີດໃຫ້ບໍລິການທຸກໆວັນ ແຕ່ 9:00 ໂມງເຊົ້າ ຮອດ 21:00 ໂມງແລງ. ນອກຈາກນັ້ນລາຍຮັບຈາກຍອດຂາຍ 10% ຍັງມອບໃຫ້ໂຄງການສົ່ງເສີມນັກອອກແບບໜຸ່ມນ້ອຍຂອງລາວຂອງລາວແຟຊັ້ນວີກເພື່ອຊຸກຍູ້ ແລະສົ່ງເສີມໃຫ້ໄວໜຸ່ມລາວທີ່ມີພອນສະຫວັນໄດ້ມີໂອກາດສ້າງຄວາມໄຝ່ຝັນຂອງພວກເຂົາເຈົ້າໃນການເປັນດີຊາຍເນີ້ມືອາຊີບ ແລະພັດທະນາວົງການແຟຊັ້ນຂອງລາວ.
ສົນໃຈສອບຖາມລາຍລະອຽດເພີ່ມເຕີມສາມາດຕິດຕໍ່ໄດ້ທີ່ ໂທ: 021 229494. Facebook: Ministry of Silk. Instagram: Ministryofsilk.official

แชร์