ນາຍົກ ຊີ້ນຳແຜນການ-ການລົງທຶນ ແລະການເງິນ

ກອງປະຊຸມສະຫຼຸບວຽກງານແຜນການ-ການລົງທຶນ ແລະການເງິນ ປະຈໍາປີ 2021 ແລະທິດທາງປະຈຳປີ 2022 ໄດ້ຈັດຂຶ້ນໃນວັນທີ 14 ທັນວາ 2021 ໂດຍໄດ້ຮັບກຽດເຂົ້າຮ່ວມເປັນປະທານ ແລະໂອ້ລົມຂອງທ່ານ ພັນຄຳ ວິພາວັນ ນາຍົກລັດຖະມົນຕີແຫ່ງ ສປປ ລາວ,ໂດຍມີທ່ານ ສອນໄຊ ສີພັນດອນ,ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະການລົງທຶນ, ທ່ານ ບຸນໂຈມ ອຸບົນປະສິດ, ລັດຖະມົນຕີກະຊວງການເງິນ ພ້ອມດ້ວຍບັນດາທ່ານລັດຖະມົນຕີ, ຫົວໜ້າອົງການລັດທຽບເທົ່າກະຊວງຂັ້ນສູນກາງ, ບັນດາທ່ານເຈົ້າ ແຂວງ, ຮອງລັດຖະມົນຕີ,ຮອງຫົວໜ້າອົງການລັດທຽບເທົ່າກະຊວງ,ຮອງເຈົ້າແຂວງ,ຮອງເຈົ້າຄອງນະຄອນຫຼວງວຽງຈັນ, ຫົວໜ້າກົມ, ຮອງຫົວໜ້າກົມ ແລະຫົວໜ້າພະແນກແຜນການ ແລະການລົງທຶນ, ຫົວໜ້າພະແນກການເງິນ ແລະພະນັກງານຫຼັກແຫຼ່ງຂອງຂະແໜງແຜນການ-ການເງິນ ໃນຂອບເຂດທົ່ວປະເທດເຂົ້າຮ່ວມໃນຮູບແບບກອງປະຊຸມປົກກະຕິ ແລະ ຜ່ານລະບົບກອງປະຊຸມທາງໄກ.
ກອງປະຊຸມສະຫຼຸບວຽກງານແຜນການ-ການລົງທຶນ ແລະການເງິນ ປະຈຳ ປີ 2021 ຈັດຂຶ້ນເປັນເວລາ 2 ວັນ, ລະຫວ່າງວັນທີ 13-14 ທັນວາ 2021 ເຊິ່ງມື້ວານນີ້ (ວັນທີ 13 ທັນວາ 2021) ເປັນກອງປະຊຸມວິຊາການຂອງ 2 ຂະແໜງການ-ຂະແໜງແຜນການ ແລະການລົງທຶນ ແລະຂະແໜງການເງິນ ແລະມື້ນີ້ (ວັນທີ 14 ທັນວາ 2021) ເປັນກອງປະຊຸມຮ່ວມຂອງທັງ 2 ຂະແໜງການ.
ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະການລົງທຶນໄດ້ຕາງໜ້າທັງ 2 ຂະແໜງການລາຍງານຜົນກອງປະຊຸມວິຊການຂອງ 2 ຂະແໜງການຊຶ່ງໄດ້ຍົກໃຫ້ເຫັນວ່າກອງປະຊຸມໄດ້ລົງເລິກໃນການສະຫຼຸບຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດປີ 2021 ແລະ ທິດທາງຈຸດສຸມປີ 2022, ປຶກສາຫາລືກ່ຽວກັບເນື້ອໃນດໍາລັດວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະແຜນງົບປະມານແຫ່ງລັດ ປະຈໍາປີ 2022, ບົດແນະນໍາວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະແຜນການລົງທຶນຂອງລັດປະຈໍາປີ 2022, ບົດແນະນຳວ່າດ້ວຍການຜັນຂະຫຍາຍວາລະແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໃນໄລຍະ 2021-2023 ພ້ອມທັງລົງເລິກປຶກສາຫາລືໃນຫົວຂໍ້ສະເພາະຈໍານວນໜຶ່ງເປັນຕົ້ນການປັບປຸງບັນຊີກິດຈະການຄວບຄຸມ-ສໍາປະທານ, ການຄົ້ນຄວ້າການແບ່ງຄວາມຮັບຜິດຊອບໃຫ້ ທ້ອງຖິ່ນໃນວຽກງານສົ່ງເສີມ ແລະຄຸ້ມຄອງການລົງທຶນເອກະຊົນພາຍໃນ ແລະຕ່າງປະເທດ, ການຄຸ້ມຄອງໂຄງ ການບໍ່ແຮ່ທີ່ກະຊວງໄດ້ມອບໃຫ້ທ້ອງຖິ່ນ, ຄວາມຄືບໜ້າໃນການຈັດຕັ້ງປະຕິບັດວຽກງານການຟື້ນຟູເສດຖະກິດຈາກຜົນກະທົບການລະບາດຂອງພະຍາດໂຄວິດ- 19 ຕາມນະໂຍບາຍ ແລະມາດຕະການທີ່ກໍານົດໄວ້, ສະພາບການຄຸ້ມຄອງທຶນຊ່ວຍເຫຼືອທາງການເພື່ອການພັດທະນາ, ການຜະລິດຕົວຊີ້ບອກ ແລະລະບອບການລາຍງານເພື່ອຕິດຕາມ-ປະເມີນແຜນພັດທະນາເສດຖະກິດປະຈໍາປີ 2022, ເອກະສານການກວດຜ່ານສັນຍາໂຄງການ ແລະເອກະສານສະເໜີຊໍາລະຄ່າໂຄງການ, ການຍົກສູງກົນໄກຄຸ້ມຄອງການປະເມີນຜົນໂຄງການລົງທຶນຂອງລັດ, ວຽກງານກວດກາຕາມຜົນການກວດສອບໂຄງການລົງທຶນຂອງລັດ, ວຽກງານປັບປຸງກົງຈັກການຈັດຕັ້ງ ແລະວຽກງານພະນັກງານ.
ໂອກາດດັ່ງກ່າວທ່ານນາຍົກລັດຖະມົນຕີໄດ້ໂອ້ລົມກອງປະຊຸມກ່ອນທ່ານໄດ້ຍ້ອງຍໍຊົມເຊີຍຂະແໜງແຜນການ ແລະການລົງທຶນ ແລະຂະແໜງການເງິນທີ່ໄດ້ເອົາໃຈໃສ່ ບຸກບືນ ແລະຕັດສິນໃຈສູງຕໍ່ການຈັດຕັ້ງປະຕິບັດວຽກງານຂອງທັງສອງຂະແໜງການຢ່າງຕັ້ງໜ້າຈາກນັນທ່ານໄດ້ໄດ້ຊີ້ນຳໃຫ້ 2 ຂະແໜງການຕ້ອງເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ພະນັກງານ-ລັດຖະກອນ ໃຫ້ມີຄວາມຈົ່ງຮັກພັກດີ, ມີຈັນຍາບັນ, ຮັກວິຊາຊີບ, ປະຕິບັດວິໄນທາງດ້ານແຜນການ-ການເງິນຢ່າງເຄັ່ງຄັດ; ຈັດຕັ້ງຜັນຂະຫຍາຍວາລະແຫ່ງຊາດກ່ຽວກັບການແກ້ໄຂຄວາມຫຍຸ້ງ ຍາກດ້ານເສດຖະກິດ-ການເງິນໃຫ້ເປັນຮູບປະທຳ; ສືບຕໍ່ເອົາໃຈໃສ່ປະຕິບັດບັນດາມາດຕະການເຝົ້າລະວັງ, ສະກັດກັ້ນ, ຄວບຄຸມ ແລະຄົ້ນຄວ້າສ້າງມາດຕະການ ແລະນະໂຍບາຍແກ້ໄຂຜົນກະທົບການແຜ່ລະບາດຂອງພະຍາດໂຄວິດ-19 ຕໍ່ເສດຖະກິດຢ່າງມີຈຸດສຸມພ້ອມທັງກຽມຄວາມພ້ອມຮອບດ້ານໃນການເປີດປະເທດຢ່າງລະມັດລະວັງ; ການສ້າງແຜນໃນໄລຍະໃໝ່ຕ້ອງຕິດແທດກັບຕົວຈິງ ແລະມີວິທະຍາສາດຫຼາຍຂຶ້ນ; ແລະ ດຶງຄືນຄວາມໝັ້ນທ່ຽງທາງດ້ານເສດຖະກິດ, ການເງິນ-ເງິນຕາ ໃຫ້ໄດ້ໂດຍໄວ; ປະຕິຮູບລະບົບການລົງທຶນຂອງລັດໃຫ້ມີການຫັນປ່ຽນໃໝ່ຢ່າງແທ້ຈິງ; ປັບປຸງວຽກງານສົ່ງເສີມ ແລະຄຸ້ມຄອງການລົງທຶນຂອງເອກະຊົນພາຍໃນ ແລະ ຕ່າງປະເທດຢ່າງແຂງແຮງ ແລະ ເປັນເຈົ້າການສູງໂດຍການບຸກທະລຸແກ້ໄຂຂອດຂັ້ນການບໍລິການປະຕູດຽວໃຫ້ໄດ້ໄວ; ສືບຕໍ່ຄຸ້ມຄອງ ແລະສົ່ງເສີມ ເຂດເສດຖະກິດພິເສດ ໃຫ້ກາຍເປັນກໍາລັງແຮງສຳຄັນໃນການພັດທະນາເສດຖະກິດ; ເອົາໃຈໃສ່ຊຸກຍູ້ວຽກຮ່ວມມືກັບສາກົນ, ຮ່ວມມືລາວ-ຫວຽດນາມ ແລະຮ່ວມມືລາວ-ຈີນ ເພື່ອໃຫ້ເປັນກຳລັງສຳຄັນໜຶ່ງທີ່ຍູ້ແຮງການຂະຫຍາຍຕົວກໍຄືການພັດທະນາເສດຖະກິດ-ສັງຄົມຂອງປະເທດ; ເລັ່ງລັດປະຕິຮູບວຽກງານການເງິນຕາມທິດຫັນເປັນທັນສະໄໝ ແລະ ເປັນລະບົບຄົບຊຸດຢ່າງຮອບດ້ານ ແລະ ແຂງແຮງບົນພື້ນຖານຍຸດທະສາດທີ່ລັດຖະບານໄດ້ຮັບຮອງໃຫ້ມີຄວາມຄືບໜ້າໄວ ແລະຮັບປະກັນການເກັບລາຍຮັບໃຫ້ໄດ້ຕາມແຜນ ແລະລື່ນແຜນໄດ້ຍິ່ງເປັນການດີ; ປະຕິຮູບກົນໄກການຄຸ້ມຄອງລາຍຮັບງົບປະມານຢ່າງແຂງແຮງ ແລະຄຸ້ມຄອງລາຍຈ່າງຢ່າງຮັດກຸມມີປະສິດທິພາບ ແລະ ປະສິດທິຜົນ, ໂດຍສະເພາະຫັນເອົາການນໍາໃຊ້ເຄື່ອງມືທັນສະໄໝໃຫ້ກວ້າງອອກ; ນຳໃຊ້ມາດຕະການຕ່າງໆທີ່ໄດ້ວາງອອກໃນແຕ່ລະໄລຍະ ແລະ ເປັນລະບົບຄົບຊຸດໃນແກ້ໄຂບັນຫາໜີ້ສິນສາທາລະນະໃຫ້ເບົາບາງລົງ;ເດັດຂາດແກ້ໄຂບັນຫາປະກົດການຫຍໍ້ທໍ້, ໂດຍສະເພາະຕ້ານການຮົ້ວໄຫຼງົບປະມານແຫ່ງລັດ ແລະຄຸ້ມຄອງລາຍຈ່າຍຢ່າງມີຈຸດສຸມ; ປະຕິຮູບການບໍລິຫານລັດວິສາຫະກິດໃຫ້ສໍາເລັດໂດຍໄວ; ເລັ່ງລັດການປະຕິຮູບກົງຈັກການຈັດຕັ້ງຂອງຂະແໜງການເງິນທັງສູນກາງ ແລະທ້ອງຖິ່ນ; ນໍາໃຊ້ເຄື່ອງມືທັນສະໄໝໃນການຄຸ້ມຄອງເກັບລາຍຮັບ ແລະລາຍຈ່າຍງົບປະມານແຫ່ງລັດ, ກໍານົດຄືນການແບ່ງງານ ແລະຄວາມຮັບຜິດຊອບລະຫວ່າງສູນກາງ ແລະທ້ອງຖິ່ນໃຫ້ມີ ຄວາມກົມກຽວ ແລະສອດຄ່ອງກັບວຽກງານຕົວຈິງໃນການຈັດຕັ້ງປະຕິບັດວຽກງານຕາມທິດສາມສ້າງ; ພ້ອມທັງເອົາໃຈໃສ່ປັບປຸງວຽກງານສະຖິຕິ, ວຽກງານຄົ້ນຄວ້າ ແລະ ການຝຶກອົບຮົມໃຫ້ໄດ້ມາດຕະຖານ ແລະ ມີຄຸນນະພາບຮັບປະກັນຕອບສະໜອງໃຫ້ການການຈັດຕັ້ງປະຕິບັດວຽກງານໃນແຕ່ລະໄລຍະ.

แชร์