ຖ່ານຫີນ ຢູ່ເຊກອງ ສົ່ງອອກ 3 ປະເທດຫຼັກ

ຂ່າວ: ສັນຍາ

ໃນວັນທີ 12 ທັນວາ 2021 ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ໄດ້ເຄື່ອນໄຫວຢ້ຽມຢາມໂຄງການຂຸດຄົ້ນບໍ່ຖ່ານຫີນຂອງບໍລິສັດພະລັງງານໄຟຟ້າເຊກອງຈໍາກັດຢູ່ເມືອງກະລຶມ ໂດຍມີທ່ານ ອໍບົວລາ ອ່ອນມະໄລວົງ ເຈົ້າເມືອງກະລຶມ, ຄະນະນໍາຂອງ ແຂວງ-ເມືອງກະລຶມ ແລະພາກສ່ວນກ່ຽວຂ້ອງເຂົ້າຮ່ວມ.

ໃນໂອກາດດັ່ງກ່າວ, ທ່ານ ພອນສັກ ວິໄລສັກ ປະທານ ກຸ່ມບໍລິສັດ ພອນສັກ ຈໍາກັດ ໄດ້ລາຍງານໂດຍຫຍໍ້ສະພາບລວມ ແລະ ການດໍາເນີນກິດຈະການຂອງບໍລິສັດພະລັງງານໄຟຟ້າເຊກອງ ຈຳກັດ ຊຶ່ງແມ່ນບໍລິສັດໃນເຄືອຂອງກຸ່ມບໍລິສັດພອນສັກຈຳກັດໄດ້ສ້າງຕັ້ງຂຶ້ນໃນປີ 2010 ແລະໄດ້ມີສັນຍາລະຫວ່າງບໍລິສັດກັບລັດຖະບານແຫ່ງ ສປປ ລາວວັນທີ່ 10 ກັນຍາ 2010 ໂດຍດໍາເນີນກິດຈະການດ້ານການສໍາຫຼວດ, ຂຸດຄົ້ນ ແລະຜະລິດແຮ່ທາດ (ຖ່ານຫີນ) ເພື່ອຈໍາໜ່າຍພາຍໃນ ແລະສົ່ງອອກຕ່າງປະເທດ. ໃນໄລຍະຜ່ານມາບໍລິສັດໄດ້ປະກອບສ່ວນມອບພັນທະໃຫ້ແກ່ລັດເປັນຈໍານວນຫຼາຍສົມຄວນ, ສະເພາະໃນປີ 2021 ບໍລິສັດໄດ້ມອບພັນທະໃຫ້ແຂວງເຊກອງ 6 ຕື້ກວ່າກີບ, ສວ່ນແຜນການຈໍາໜ່າຍຜະລິດຕະພັນແຮ່ທາດນັບແຕ່ປີ 2022 ເປັນຕົ້ນໄປແມ່ນມີແຜນຕົວເລກແຜນການສົ່ງອອກປະມານ 7-8 ລ້ານໂຕນຕໍ່ປີ, ໂດຍມີ 3 ປະເທດຫຼັກຄື: ຣາຊະອານາຈັກໄທ, ສສ ຫວຽດນາມ ແລະກໍາປູເຈຍ ສ່ວນລາຄາ, ດ່ານສົ່ງອອກ ແລະປະລິມານແມ່ນອີງໃສ່ຄວາມຕ້ອງການ ຕົວຈິງຂອງຕະຫຼາດ, ປະຈຸບັນພວມສຸມໃສ່ເພີ່ມກໍາລັງການຜະລິດດ້ວຍການຕິດຕັ້ງໂຮງລ້າງຖ່ານຫີນເພື່ອນໍາເອົາຖ່ານເກຣດຕໍ່າມາຂັດລ້າງໃຫ້ໄດ້ເກຣດສູງຕາມຄວາມຕ້ອງການຂອງຕະຫຼາດ ແລະຂຸດຄົ້ນ-ປຸງແຕ່ງຖ່ານຫີນໃຫ້ໄດ້ຄຸນນະພາບສົ່ງຂາຍອອກ

ຕ່າງປະເທດເພື່ອສ້າງລາຍຮັບໃຫ້ແກ່ລັດຖະບານກໍ່ຄືອົງການປົກຄອງທ້ອງຖິ່ນ ແລະເປັນການສ້າງລາຍຮັບໃຫ້ແກ່ບໍລິສັດເພື່ອສະໜັບສະໜູນການກໍ່ສ້າງໂຮງໄຟຟ້າພະລັງຄວາມຮ້ອນຖ່ານຫີນທີ່ຈະເລີ່ມລົງມືໃນມໍ່ໆນີ້.

ໂອກາດນີ້, ທ່ານ ເຫຼັກໄຫຼ ສີວິໄລ ໄດ້ມີຄໍາເຫັນໃຫ້ຂະແໜງການກ່ຽວຂ້ອງຂັ້ນແຂວງ-ເມືອງ ແລະບໍລິສັດຕ້ອງໄດ້ປະສານສົມທົບເຊິ່ງກັນແລະກັນໃນການປະຕິບັດວຽກງານຕ່າງໆໃຫ້ມີຄວາມກົມກຽວຫຼາຍຂຶ້ນກວ່າເກົ່າ; ສຸມໃສ່ການຂຸດຄົ້ນ-ປຸງແຕ່ງ ແລະສົ່ງອອກຖ່ານຫີນໃຫ້ໄດ້ຕາມແຜນການ, ຄຽງຄູ່ກັນນີ້ກໍ່ຕ້ອງສົ່ງເສີມອາຊີບ, ສ້າງວຽກເຮັດງານທໍາໃຫ້ປະຊາຊົນພາຍໃນແຂວງກໍ່ຄືເມືອງກະລຶມດ້ວຍການສົ່ງເສີມໃຫ້ປະຊາຊົນເປັນຜູ້ສະໜອງສະບຽງອາຫານໃຫ້ແກ່ພະນັກງານກໍາມະກອນຂອງບໍລິສັດ; ປະກອບສ່ວນມອບພັນທະອາກອນ ແລະຄ່າທໍານຽມຕ່າງໆໃຫ້ຖືກຕ້ອງຕາມລະບຽບກົດໝາຍເພື່ອເປັນການປະກອບສ່ວນເຂົ້າໃນການສ້າງສາ, ພັດທະນາປະເທດຊາດກໍ່ຄືແຂວງເຊກອງ.

แชร์