ໄຊສົມບູນ ສຳເລັດສ້າງສຳນັກງານປົກຄອງແຂວງຫຼັງໃໝ່

ຂ່າວ: ພາພອນ ນະວົງໄຊ

ແຂວງໄຊສົມບູນສໍາເລັດໂຄງການກໍ່ສ້າງສໍານັກງານປົກຄອງຫຼັງໃໝ່ ແລະໄດ້ຈັດພິທີມອບ-ຮັບລະຫວ່າງຫ້ອງວ່າການແຂວງກັບບໍລິສັດໄຊສົມບູນ ການລົງທຶນສາກົນຈໍາກັດຜູ້ດຽວຂຶ້ນໃນຕອນເຊົ້າຂອງ 13 ທັນວານີ້ ຢູ່ທີ່ສໍານັກ ງານຫ້ອງວ່າການແຂວງຫຼັງໃໝ່, ໂດຍເຂົ້າຮ່ວມພິທີໃນຄັ້ງນີ້ມີທ່ານ ພົຕ ຄໍາລຽງ ອຸທະໄກສອນ ເຈົ້າແຂວງໄຊສົມບູນ ແລະທ່ານ ຈັ້ງປີ້ນ ຜູ້ຖືຫຸ້ນຂອງບໍລິສັດທັງເປັນຜູ້ຈັດການໂຄງການກໍ່ສ້າງສໍານັກງານປົກຄອງແຂວງໄຊສົມບູນຫຼັງໃໝ່ຕະຫຼອດຮອດປະທານສະພາະຊາຊົນແຂວງ, ຮອງເຈົ້າແຂວງ, ຄະນະປະຈໍາພັກແຂວງພ້ອມດ້ວຍທິມງານຂອງບໍລິສັດຮັບເໝົາ, ບໍລິສັດທີ່ປຶກສາເຂົ້າຮ່ວມ.

ໂອກາດດັ່ງກ່າວ ທ່ານ ຈັ້ງປີ້ນ ຜູ້ຖືຫຸ້ນຂອງບໍລິສັດທັງເປັນຜູ້ຈັດການໂຄງການໄດ້ຂຶ້ນລາຍງານການຈັດຕັ້ງປະຕິບັດໂຄງການກໍ່ສ້າງສໍານັກງານປົກຄອງແຂວງໄຊສົມບູນ ຫຼັງໃໝ່ຊຶ່ງເປັນໂຄງການບູລິມະສິດຂອງລັດຖະບານ ແລະຂອງແຂວງໄຊສົມບູນທີ່ໄດ້ຮັບການອະນຸມັດເຂົ້າແຜນການລົງທຶນຂອງລັດປີ 2015 ຕາມມູນຄ່າສັນຍາຈໍານວນ 129 ຕື້ກີບ, ເປັນຕຶກອາຄານທີ່ສູງເຖິງ 5 ຊັ້ນ, ມີທັງໝົດ 109 ຫ້ອງ ໃນນັ້ນລວມມີຫ້ອງປະຊຸມ 5 ຫ້ອງ ແລະໄດ້ແບ່ງການກໍ່ສ້າງອອກເປັນ 4 ໄລຍະລວມໄລຍະການກໍ່ສ້າງທັງໝົດ 7 ກ່ວາປີ, ມາຮອດປະຈຸບັນໄດ້ແມ່ນສໍາເລັດແລ້ວເກືອບ 100% ສ່ວນທີ່ຍັງເຫຼືອແມ່ນບາງໜ້າວຽກຍ່ອຍເຊັ່ນ: ວຽກຕິດຕັ້ງລິບດ້ານຊ້າຍຂອງຕຶກ, ວຽກຕິດຕັ້ງປະຕູໃຫຍ່ດ້ານໜ້າ ແລະວຽກອະນາໄມທີ່ທາງບໍລິສັດຈະຕ້ອງດ້ສືບຕໍ່ຈັດຕັ້ງປະຕິບັດໃຫ້ສໍາເລັດ. ໂອກາດດຽວກັນນີ້, ທ່ານ ພົຕ ຄໍາລຽງ ອຸທະໄກສອນ ໄດ້ມີຄໍາເຫັນຕໍ່ພິທີຊຶ່ງທ່ານຍົກໃຫ້ເຫັນເຖີງຄວາມໝາຍສໍາຄັນຂອງໂຄງການດັ່ງກ່າວຊຶ່ງເປັນໂຄງການໜຶ່ງທີ່ໄດ້ສໍາເລັດການກໍ່ສ້າງໃນທ່າມກາງບັນຍາກາດທີ່ທົ່ວພັກທົ່ວລັດພວງສະເຫຼີມສະຫຼອງວັນຊາດທີ 2 ທັນວາ ຄົບຮອບ 46 ປີ, ວັນຄ້າຍວັນເກີດຂອງທ່ານປະທານ ໄກສອນ ພົມວິຫານ ຄົບຮອບ 101 ປີ ແລະວັນສ້າງຕັ້ງແຂວງໄຊສົມບູນ ຄົບຮອບ 8 ປີ ແລະຍັງໄດ້ ສະແດງເຖິງຄວາມເອົາໃຈໃສ່ຂອງພັກ-ລັດຖະບານ, ການນໍາແຂວງທີ່ໄດ້ທຸ່ມເທດ້ານງົບປະມານເຂົ້າໃນການກໍ່ສ້າງ ໂຄງການຈົນສໍາເລັດ. ນອກນີ້ທ່ານຍັງໄດ້ເນັ້ນໜັກໃຫ້ບັນດາສະມາຊິກພັກ, ພະນັກງານ-ລັດຖະກອນທຸກພາກສ່ວນຈົ່ງເພີ່ມທະວີຄວາມເປັນເຈົ້າການໃນການປົກປັກຮັກສາ, ອະນາໄມໃຫ້ມີຄວາມສະອາດງາມຕາ ແລະສາມາດນໍາໃຊ້ໄດ້ຍາວນານ. ຈາກນັ້ນ, ທ່ານເຈົ້າແຂວງໄຊສົມບູນພ້ອມດ້ວຍຄະນະນໍາຂອງແຂວງ ແລະຕາງໜ້າບໍລິສັດໄດ້ຂຶ້ນຕັດແຖບຜ້າເພື່ອປະກາດເປີດການນໍາໃຊ້ສໍານັກງານປົກຄອງແຂວງໄຊສົມບູນຢ່າງເປັນທາງການພ້ອມທັງຮ່ວມຊົມຕຶກອາຄານ ແລະຫ້ອງການເຮັດວຽກ ຕ່າງໆພາຍໃນສໍານັກງານ.

แชร์