ວຽງຈັນ ສະຫຼອງ 40 ປີ ວັນສ້າງຕັ້ງແຂວງ

ພິທີໂຮມຊຸມນຸມໄດ້ຈັດຂຶ້ນໃນວັນທີ 13 ທັນວາ 2021 ທີ່ສະໂມສອນໃຫຍ່ຂອງແຂວງໂດຍການເປັນກຽດຶ້ນປາໄສຂອງທ່ານ ຄໍາພັນ ສິດທິດໍາພາ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ, ແຂວງວຽງຈັນ. ເປັນກຽດເຂົ້າຮ່ວມຂອງ ທ່ານ ສຈ.ປອ ກິແກ້ວ ໄຂຄໍາພິທູນ, ກໍາມະການກົມການເມືອງ ສູນກາງພັກ, ຮອງນາຍົກລັດຖະມົນຕີແຫ່ງ ສປປ ລາວ, ມີບັນດາທ່ານພະນັກງານບຳນານອາດີດການນໍາແຂວງວຽງຈັນ ແລະ ບັນດາຄະນະນຳແຂວງວຽງຈັນ ເຂົ້າຮ່ວມ.

ທ່ານ ຄໍາພັນ ສິດທິດໍາພາ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ, ແຂວງ ວຽງຈັນ ໄດ້ຂຶ້ນກ່າວປາໄສວ່າການໃນ ພິທີຄັ້ງນີ້ ກໍ່ເພື່ອເປັນການອອກແຮງແຂ່ງ ຂັນສ້າງຜົນງານ, ສ້າງຂະບວນການຂໍ່ານັບຮັບຕ້ອນວັນສ້າງຕັ້ງແຂວງວຽງຈັນ ຄົບຮອບ 40 ປີ ແລະພ້ອມກັນສຸມໃສ່ຈັດຕັ້ງປະຕິບັດມະຕິກອງປະຊຸມໃຫຍ່ອົງຄະນະພັກແຂວງ ຄັ້ງທີ VI ແລະມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ແຫ່ງລັດ ຕິດພັນກັບບັນຍາກາດແຫ່ງການສະເຫຼີມສະຫຼອງວັນສະຖາປະນາ ສປປ ລາວ ຄົບຮອບ 46 ປີ, ວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 101 ປີ ແລະຊົມເຊີຍຜົນສໍາເລັດການກໍ່ສ້າງ ແລະ ເປີດການນໍາໃຊ້ເສັ້ນທາງລົດໄຟລາວ-ຈີນ ແລະ ສະເຫຼີມສະຫຼອງວັນສ້າງຕັ້ງແຂວງວຽງຈັນ ຄົບຮອບ 40 ປີ (13 ສິງຫາ 1981-13 ສິງຫາ 2021), ມື້ນີ້ດ້ວຍຄວາມເບີກບານມ່ວນຊື່ນ, ປ່ຽມລົ້ນໄປດ້ວຍຄວາມເອກອ້າງທະນົງໃຈຕໍ່ຜົນສໍາເລັດອັນໃຫ່ຍຫຼວງທີ່ທົ່ວພັກ, ທົ່ວກອງທັບ ແລະປະຊາຊົນບັນດາເຜົ່າເວົ້າລວມ, ຊາວແຂວງວຽງຈັນເວົ້າສະເພາະຍາດມາໄດ້ໃນໄລຍະຜ່ານມາ ແລະທັງເປັນ ການສະແດງເຖິງຄວາມອາໄລຮັກຢ່າງສຸດຊຶ້ງຄິດຄະນຶງເຖິງທ່ານປະທານ ໄກ ສອນ ພົມວິຫານ ຜູ້ນໍາທີ່ແສນເຄົາລົບຮັກວິລະບູລຸດແຫ່ງຍຸກສະໄໝຂອງຊາດລາວວິລະຊົນ, ລູກຜູ້ປະເສີດຂອງປະຊາຊົນລາວຜູ້ພິລະອາດຫານ ແລະສະແດງຄວາມຮູ້ບຸນຄຸນໃຫ່ຍຫຼວງ ແລະອາໄລອາວອນຢ່າງສຸດຊຶ້ງເຖິງບັນດາສະຫາຍອາດີດການນໍາຂອງພັກ-ລັດ, ອະດີດການນຳຂອງແຂວງວຽງຈັນ, ບັນດາສະຫາຍສະມາຊິກພັກ, ພະນັກງານ, ນັກຮົບປະຕິວັດ, ປະຊາຊົນບັນດາເຜົ່າທີ່ໄດ້ເສຍສະຫຼະຊີວິດເພື່ອພາລະກິດປະຕິວັດ, ເພື່ອຄວາມຈະເລີນຮຸ່ງເຮືອງຂອງປະເທດ ຊາດ, ຄວາມຢູ່ເຢັນຜາສຸກຂອງພວກເຮົາກໍ່ຄືຂອງປະຊາຊົນບັນດາເຜົ່າໂດຍສະເພາະກໍ່ຄືແຂວງວຽງຈັນ.

ໃນພິທີຍັງໄດ້ມອບຫຼຽນໄຊອິດສະຫຼະຊັ້ນ I ໃຫ້ແຂວງວຽງຈັນເປັນກຽດຂຶ້ນປະດັບໂດຍທ່ານ ສຈ.ປອ ກິແກ້ວ ໄຂຄໍາພິທູນ, ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ ແຫ່ງ ສປປ ລາວ ແລະມີບັນດາການນໍາຂອງ ແຂວງວຽງຈັນ ຂຶ້ນຮັບ, ພ້ອມນີ້ຍັງໄດ້ມອບຫຼຽນໄຊແຮງງານຊັ້ນ II, ຫຼຽນໄຊແຮງງານຊັ້ນ III ແລະຫຼຽນໄຊພິລະອາດຫານຊັ້ນ III ໃຫ້ບຸກຄົນ ແລະມອບໃບຢັ້ງຢືນເພື່ອຈາລຶກຜົນງານຈຳນວນ 6 ໃບ ໃຫ້ບັນດາການນຳຮຸ້ນກ່ອນທີ່ມີຜົນງານດີເດັ່ນໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດ ກໍ່ຄືແຂວງວຽງຈັນ ໃຫ້ມີຄວາມຈະເລີນຮຸ່ງເຮືອງຂຶ້ນເລື້ອຍໆ ແລະມອບໃບຢັ້ງຢືນເພື່ອຈາລຶກຜົນງານໃຫ້ບັນດາການນຳຮຸ້ນກ່ອນອີກ.

แชร์