ປາກແບງ ດຳເນີນກອງປະຊຸມຄະນະບໍລິຫານງານພັກເມືອງ ສະໄໝທີ XII

   ກອງປະຊຸມຄົບຄະນະຄັ້ງທີ VIII ຂອງຄະນະບໍລິຫານງານພັກເມືອງປາກແບງ ແຂວງອຸດົມໄຊ ສະໄໝທີ XII ໄດ້ຈັດຂຶ້ນລະຫວ່າງວັນທີ 12 ຫາ 13 ມີນາ 2019 ຢູ່ທີ່ສະໂມສອນຂອງເມືອງໂດຍການເປັນປະທານຂອງ ທ່ານ ບຸນມີ ຈັນສະຫວັດ ຮອງເລຂາພັກເມືອງ, ຮອງເຈົ້າເມືອງປາກແບງ, ມີທ່ານ ພອນສະ ຫວັນ ພັນທະວິຈິດ ຄະນະປະຈຳພັກແຂວງ, ຫົວໜ້າພະແນກ ຖວທ ແຂວງ,ບັນດາຄະນະປະຈຳພັກເມືອງ,ກຳມະການພັກເມືອງ,ເລຂາຄະນະພັກຮາກຖານ, ສອງກອງບັນຊາການ, ເລຂາໜ່ວຍພັກ ແລະບັນດາລັດວິສາຫະກິດພາຍໃນເມືອງເຂົ້າຮ່ວມ.

  ໃນກອງປະຊຸມກ່ອນອື່ນໝົດແມ່ນໄດ້ຮັບຟັງການລາຍງານກ່ຽວກັບມະຕິຄົບຄະນະບໍລິຫານງານເປີດກວ້າງຄັ້ງທີ 9 ສະໄຫມທີVIII ຂອງອົງຄະນະພັກແຂວງ ເພື່ອຍົກໃຫ້ເຫັນເຖິງການເຄື່ອນໄຫວ ວຽກງານອັນລວມຂອງແຂວງ. ຈາກນັ້ນ ກໍໄດ້ຮັບ ຟັງການຜ່ານບົດສະຫຼຸບຕີລາຄາຜົນການເຄື່ອນໄຫວຈັດຕັ້ງປະຕິບັດວຽກງານແຜນພັດທະນາເສດຖະກິດ-ສັງຄົມ ປະຈຳປີ2018 ແລະຄາດຄະເນທິດທາງແຜນການໃນປີ 2019 ຂອງເມືອງປາກແບງໃນນັ້ນໄດ້ຍົກໃຫ້ເຫັນເຖິງຜົນງານການເຄື່ອນໄຫວວຽກງານຂອງແຕ່ລະຂະແໜງການ ໂດຍສະເພາະແມ່ນຂົງເຂດເສດຖະກິດ, ວັດທະນະທຳ-ສັງຄົມລວມທັງຜ່ານການຈັດຕັ້ງປະຕິບັດດ້ານງົບປະມານແຫ່ງລັດປະຈຳປີ 2018 ແລະທິດທາງແຜນການ 2019 ເພື່ອເປັນບ່ອນອີງໃຫ້ແກ່ຜູ້ແທນກອງປະຊຸມໄດ້ມີຄຳຄິດເຫັນຕໍ່ກັບບັນດາວຽກງ ານດັ່ງກ່າວໂດຍແນ່ໃສ່ເຮັດໃຫ້ບົດສະຫຼຸບ ແລະແຜນການເຄື່ອນໄຫວໃນຕໍ່ໜ້າມີເນື້ອໃນສົມບູນຄົບຖ້ວນ ແລະສາມາດນຳໄປຈັດຕັ້ງປະຕິບັດຕົວຈິງໄດ້ຢ່າງມີໝາກຜົນສູງ.

  ນອກນັ້ນຍັງໄດ້ຕີລາຄາຄືນຜົນການເຄື່ອນໄຫວຊີ້ນຳນຳພາລວມຂອງຄະນະບໍລິຫານງານພັກເມືອງໃນໄລຍະຜ່ານມາຕື່ມອີກເພື່ອເປັນການສະຫຼຸບຖອດຖອນບົດຮຽນເຊິ່ງກັນແລະກັນ ແລະປັບປຸງແກ້ໄຂດ້ານອ່ອນ, ຂໍ້ຄົງຄ້າງຂອງຕົນເຮັດໃຫ້ການຊີ້ນຳນຳພາໃນຕໍ່ໜ້າມີປະສິດທິພາບ, ຖືກຕ້ອງ, ສອດຄ່ອງກັບທິດທາງແຜນການ ແລະນະໂຍບາຍລວມ.

  ໂອກາດດັ່ງກ່າວຍັງໄດ້ຮັບຟັງການລາຍຜງານສ່ອງວຽກງານໃນບາງຂະແໜງການພ້ອມທັງການແກ້ໄຂ ແລະຊີ້ແຈງບັນຫາຂອງທ່ານ ພອນສະຫວັນ ພັນທະວິຈິດ ຄະນະປະຈຳພັກແຂວງ, ຫົວໜ້າພະແນກ ຖວທ ຕື່ມອີກ.

ໂດຍ: ຄານມະນີ ຮຽນດໍຈັນ

แชร์