ລາວກຽມແຜນຮອງຮັບເປີດປະເທດຕ້ອນຮັບນັກທ່ອງທ່ຽວ

ກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວໄດ້ຈັດກອງປະຊຸມທາງໄກເພື່ອປຶກສາຫາລືພາກລັດ ແລະພາກທຸລະກິດຂັ້ນສູນກາງ ແລະບັນດາແຂວງເປົ້າໝາຍ ເພື່ອປຶກສາຫາລືແຜນເປີດປະເທດຕ້ອນຮັບນັກທ່ອງທ່ຽວ.

ກອງປະຊຸມດັ່ງກ່າວຈັດຂຶ້ນວັນທີ 10 ທັນວາ 2021 ໂດຍການເປັນປະທານຂອງທ່ານ ນາງ ແພງຈັນ ແພງເມືອງ ຫົວໜ້າກົມແຜນການ ແລະການຮ່ວມມືສາກົນ, ກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ, ມີ ທ່ານ ນາງ ພອນ ມະລີອິນທະພົມ ຫົວໜ້າກົມພັດທະນາການທ່ອງທ່ຽວ, ທ່ານ ອິນທີ ເດືອນສະຫວັນ, ຄະນະບໍລິຫານງານ, ຮອງປະທານກຳມາທິການທ່ອງທ່ຽວສະພາການຄ້າ ແລະອຸດສະຫະກຳແຫ່ງຊາດລາວ, ມີຕາງໜ້າພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງເປົ້າໝາຍ ແລະບໍລິສັດທ່ອງທ່ຽວເຂົ້າຮ່ວມ.

ໂອກາດກ່າວເປີດກອງປະຊຸມທ່ານ ນາງ ແພງຈັນ ແພງເມືອງ ມີຄວາມເຫັນວ່າ: ໃນປະຈຸບັນເຊື້ອພະຍາດໂຄວິດ-19 ໄດ້ແຜ່ຂະຫຍາຍເປັນວົງກວ້າງໃນທົ່ວໂລກເຮັດໃຫ້ມີຜູ້ເສຍຊີວິດເປັນຈໍານວນຫຼວງຫຼາຍ ແລະໄດ້ສົ່ງຜົນກະທົບອັນຮ້າຍແຮງໃຫ້ແກ່ການຂະຫຍາຍໂຕຂອງເສດຖະກິດໃນທົ່ວໂລກເປັນຕົ້ນແມ່ນອຸດສາຫະກໍາການທ່ອງທ່ຽວຜູ້ປະກອບການທຸລະກິດທີ່ປິ່ນອ້ອມການທ່ອງທ່ຽວໄດ້ຮັບຜົນກະທົບຈາກການຈໍາກັດການເດີ່ນທາງ, ການດໍາເນີນກິດຈະກໍາຕ່າງໆ ເພື່ອຢັບຢັ້ງການແຜ່ລະບາດຂອງພະຍາດໂຄວິດ 19 ບໍ່ໃຫ້ຂະຫຍາຍເປັນວົງກວ້າງ.

ເພື່ອຫຼຸດຜ່ອນບັນຫາທີ່ເປັນຜົນກະທົບໃຫ້ແກ່ການພັດທະນາເສດຖະກິດ-ສັງຄົມກໍຄຶຜົນກະທົບຕໍ່ການທ່ອງທ່ຽວ, ໃນໄລຍະທີ່ຜ່ານມາລັດຖະບານກໍ່ໄດ້ມີການກຳນົດນະໂຍບາຍທາງດ້ານຕ່າງໆ ເພື່ອແກ້ໄຂສະພາບວິກິດການທາງດ້ານເສດຖະກິດທີ່ໄດ້ຮັບຜົນກະທົບຈາກພະຍາດໂຄວິດ-19 ຢ່າງຕໍ່ເນື່ອງ, ນອກຈາກນັ້ນລັດຖະບານໄດ້ມີແຜນໃຫ້ຄົ້ນຄວ້າການກະກຽມເປີດປະເທດເພື່ອຕ້ອນຮັບນັກທ່ອງທ່ຽວ ແລະປະຕິບັດຕາມແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີສະບັບເລກທີ 1445/ຫສນຍ, ລົງວັນທີ 5 ພະຈິກ2011 ໄດ້ ມອບໃຫ້ກະຊວງຖະແຫຼງຂ່າວວັດທະນະທໍາ ແລະທ່ອງທ່ຽວເປັນໃຈກາງໃນການສົມທົບກັບພາກສ່ວນທີ່ກ່ຽວຂ້ອງໃນການຄົ້ນຄວ້າແຜນກະກຽມໃນການເປີດປະເທດເພື່ອຕ້ອນຮັບນັກທ່ອງທ່ຽວ, ດັ່ງນັ້ນໃນວັນທີ 16 ພະຈິກ 2021 ກະຊວງ ຖວທ ຈຶ່ງໄດ້ເປີດກອງປະຊຸມປຶກສາຫາລືລະຫວ່າງພາກລັດແລະພາກທຸລະກິດຂຶ້ນໂດຍການເປັນປະທານຂອງ ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງ ຖວທ ມີບັນດາທ່ານຜູ້ຕາງໜ້າຈາກບັນດາກະຊວງຕ່າງໆທີ່ກ່ຽວຂ້ອງ ແລະພາກທຸລະກິດເຂົ້າຮ່ວມ.

ຊຶ່ງກອງປະຊຸມກໍ່ໄດ້ປຶກສາຫາລືຫຼາຍບັນຫາໂດຍສະເພາະແມ່ນການກຳນົດເງື່ອນໄຂ, ນິຕິກໍາຂອງລັດຖະບານ ແລະຄວາມກຽມພ້ອມຂອງພາກທຸລະກິດໃນການຮອງຮັບໃຫ້ແກ່ການເປີດປະເທດພ້ອມທັງກໍານົດແຜນວຽກໃນການກະກຽມຄວາມພ້ອມຂອງແຕ່ລະຂະແຫນງການເພື່ອຕ້ອນຮັບນັກທ່ອງທ່ຽວທີ່ໄດ້ຮັບການຊັກວັກຊີນຄົບໂດສ໌, ທັງເປັນການທົບທວນຄືນການປະຕິບັດເນື້ອໃນຈິດໃຈຂອງກອງປະຊຸມດັ່ງກ່າວໃນວັນທີ 7 ທັນວາ 2021, ພວກເຮົາກໍ່ຈັດກອງປະຊຸມທົບທວນຄືນການຈັດຕັ້ງປະຕິບັດການກະກຽມດັ່ງກ່າວຊຶ່ງເຫັນວ່າມີຫຼາຍພາກສ່ວນໄດ້ມີການກະກຽມຄວາມພ້ອມ, ພ້ອມກັນນັ້ນທ່ານນາຍົກລັດຖະມົນຕີກໍ່ໄດ້ອອກຂໍ້ຕົກລົງສະບັບເລກທີ່1 35/ນຍ ລົງວັນທີ 7 ທັນວາ 2021 ວ່າດ້ວຍການແຕ່ງຕັ້ງຄະນະຮັບຜິດຊອບກະກຽມແຜນເປີດປະເທດເພື່ອຕ້ອນຮັບນັກທ່ອງທ່ຽວ ແລະຂໍ້ຕົກລົງຂອງທ່ານຮອງນາຍົກຫົວໜ້າຄະນະສະເພາະກິດ ເລກທີ່ 4887/ຫສນຍ ລົງວັນທີ 29-11-2021, ວ່າດ້ວຍການ ຮັບຮອງເອົາແຜນການປະຕິບັດງານຕົວຈິງສໍາລັບການເປີດເຂດການທ່ອງທ່ຽວລາວສີຂຽວທີ່ປອດໄພຈາກໂຄວິດ-19.

ເພື່ອຜັນຂະຫຍາຍເນື້ອໃນຈິດໃຈດັ່ງກ່າວພວກເຮົາຈຶ່ງໄດ້ຈັດກອງປະຊຸມນີ້ຂຶ້ນເພື່ອປຶກສາຫາລືການກໍານົດເຂດ ແລະກິດຈະກໍາການບໍລິການໃນເຂດທ່ອງທ່ຽວສີຂຽວຢູ່ແຂວງເປົ້າໝາຍສໍາລັບຂັ້ນຕອນການເຂົ້າອອກ, ມາດຕາການໃນການປ້ອງກັນການແຜ່ລະບາດຂອງພະຍາດໂຄວິດ19.

ພັກ ແລະລັດຖະບານເວລາໃດກໍ່ເປັນຫ່ວງເປັນໄຍ ແລະເອົາໃຈໃສ່ຊຸກຍູ້ສົ່ງເສີມການພັດທະນາວຽກງານທ່ອງທ່ຽວທີ່ເປັນຂະແໜງບູລິມາສິດຂອງປະເທດໃນສະພາບທີ່ ມີການລະບາດຂອງພະຍາດໂຄວິດ-19 ຊຶ່ງເປັນສິ່ງຫ້າຍຫາຍຕໍ່ພວກເຮົາແຕ່ລັດຖະບານຍັງໃຫ້ການສະໜັບສະໝູນການເປີດປະເທດເພື່ອຕ້ອນຮັບນັກທ່ອງທ່ຽວເພື່ອແກ້ໄຂວິກິດດ້ານເສດຖະກິດດ້ວຍຄວາມຮອບຄອບ ແລະມີຫຼັກການ, ຈຶ່ງຂໍຮຽກຮ້ອງໃຫ້ທຸກພາກສ່ວນຊ່ວຍປະກອບຄໍາຄິດເຫັນຢ່າງກົງໄປກົງມາດ້ວຍເຫດຜົນ, ສ້າງສັນ ແລະມີຄວາມຮັບພິດຊອບເຮັດໃຫ້ການປຶກສາຫາລືການເປີດປະເທດເພື່ອຕ້ອນຮັບນັກທ່ອງທ່ຽວມີເນື້ອໃນຄົບຖ້ວນເນັ້ນໃສ່ການເດີນທາງທ່ອງທ່ຽວທີ່ມີຄວາມຮັບປະກັນທາງດ້ານຄວາມປອດໄພ, ສ້າງຄວາມເຊື່ອໝັ້ນໃຫ້ນັກທ່ອງທ່ຽວ, ໂດຍການກໍານົດວິທີການຂັ້ນຕອນກະທັດລັດແຕ່ມີເນື້ອໃນຄົບຖ້ວນເພື່ອຜັນຂະຫຍາຍທິດຊີ້ນໍາຂອງຂັ້ນເທິງໃຫ້ມີຜົນສັກສິດ.

แชร์