ກະຊວງການເງິນໃຫ້ JDB ບໍລິການຮັບຊໍາລະມອບພັນທະເຂົ້າງົບລັດ

ຂ່າວ: ພະນອມໄພ

 ໃນວັນທີ 9 ທັນວາ 2021 ທີ່ສໍານັກງານໃຫຍ່ທະນາຄານຮ່ວມພັດທະນາ ຫຼື JDB ໄດ້ມີພິທີເຊັນສັນຍາວ່າດ້ວຍການໃຫ້ບໍລິການຮັບຊໍາລະການມອບພັນທະຕ່າງໆເຂົ້າບັນຊີງົບປະມະມານແຫ່ງລັດລະຫວ່າງຄັງເງິນແຫ່ງຊາດ ແລະທະນາຄານຮ່ວມພັດທະນາ (JDB) ໂດຍໃຫ້ກຽດເຂົ້າຮ່ວມໃນພິທີຄັ້ງນີ້ມີທ່ານ ບຸນໂຈມ ອຸບົນປະເສີດ, ລັດຖະມົນຕີກະຊວງການເງິນ, ທ່ານ ເອກະພັນ ພະພິທັກ ປະທານສະພາບໍລິຫານທະນາຄານຮ່ວມພັດທະນາ.

ພິທີເຊັນສັນຍາຄັ້ງນີ້ຝ່າຍທະນາຄານຮ່ວມພັດທະນາແມ່ນລົງນາມໂດຍທ່ານ ວິໄລ ສີພະພອນ ຜູ້ອໍານວຍການໃຫຍ່ທະນາຄານຮ່ວມພັດທະນາ ແລະຝ່າຍຄັງເງິນແຫ່ງຊາດແມ່ນລົງນາມໂດຍ ທ່ານ ນາງ ວັນພອນ ພົມມະສອນ ຫົວໜ້າຄັງເງິນແຫ່ງຊາດ, ທັງສອງຝ່າຍໄດ້ຕົກລົງເຫັນດີເປັນເອກະພາບເພື່ອໃຫ້ບໍລິການຮັບຊໍາລະການມອບອາກອນຕ່າງໆ ເຂົ້າບັນຊີງົບປະມານແຫ່ງລັດ, ຢູ່ທະນາຄານຮ່ວມພັດທະນາ ຫຼື JDB ຍ້ອນໄດ້ຮັບຄວາມເອົາໃຈໃສ່ ແລະການຮ່ວມມືຢ່າງໃກ້ສິດຈາກຄະນະຮັບຜິດຊອບການຈັດຕັ້ງປະຕິບັດໂຄງການ, ຄະນະຜູ້ບໍລິຫານ, ຄະນະນໍາ ແລະຄະນະວິຊາ ການຂອງຄັງເງິນແຫ່ງຊາດ, ກົມສ່ວຍສາອາກອນ ແລະທະນາຄານຮ່ວມພັດທະນາທຸກທ່ານທີ່ໄດ້ເອົາໃຈໃສ່ເຮັດວຽກຮ່ວມກັນໃນການພັດທະນາການເຊື່ອມຕໍ່ໂດຍກົງລະຫວ່າງລະບົບການຮັບຊໍາລະອາກອນຕ່າງຂອງທະນາຄານ JDB ກັບ ລະບົບຄຸ້ມຄອງຂໍ້ມູນຂ່າວສານຄັງເງິນ (ລະບົບ RTIS) ແລະລະບົບ Tax Ris ຂອງກົມສ່ວຍສາອາກອນສໍາເລັດ, ຊຶ່ງໃນການພັດທະນາດັ່ງກ່າວແມ່ນໃຊ້ໄລຍະເວລາພຽງເດືອນປາຍເທົ່ານັ້ນ, ນອກຈາກການຈັດຕັ້ງປະຕິບັດການຮັບຊໍາລະພັນທະເຂົ້າງົບປະມານແຫ່ງລັດແລ້ວສຳເລັດ, ທິດທາງໃນຕໍ່ໜ້າຄັງເງິນແຫ່ງຊາດ ແລະ ທະນາຄານຮ່ວມພັດທະນາພວມຂຸ້ນຂ້ຽວສຶບຕໍ່ໃນການພັດທະນາ, ປັບປຸງລະບົບການເຊື່ອມຕໍ່ການຊໍາລະສະສາງບັນດາລາຍຈ່າຍງົບປະມານແຫ່ງລັດຕື່ມອີກ; ຊຶ່ງວຽກງານດັ່ງກ່າວແມ່ນໜຶ່ງໃນຄາດໝາຍສູ້ຊົນໃນແຜນພັດທະນາຂະແໜງຄັງເງິນໄລຍະປີ 5 ( 2021-2025) ໃນການພັດທະນາ ແລະປະຕິຮູບວຽກງານຄັງເງິນຫັນເປັນທັນສະໄໝ ແລະສາມາດເຊື່ອມຕໍ່ກັບຂະແໜງລາຍຮັບ, ທະນາຄານທີ່ໃຫ້ບໍລິການ ແລະຫົວໜ່ວຍງົບປະມານເພື່ອແນໃສ່ຮັບປະກັນການລວມສູນທຸກແຫຼ່ງເງິນຂອງລັດຜ່ານລະບົບຄັງເງິນໃນຂອບເຂດທົ່ວປະເທດດ້ວຍການນຳໃຊ້ເຄື່ອງມືທັນສະໄໝ ແລະປັບປຸງຂອດການບໍລິການໃຫ້ມີຄວາມສະດວກ, ວ່ອງໄວ, ຍຸຕິທຳ, ໂປ່ງໃສ, ສາມາດກວດສອບໄດ້ ແລະສາມາດສະຫຼຸບລາຍງານໄດ້ທັນກຳນົດເວລາ ຫຼືແບບ Auto Real Time .

ສໍາລັບການເປີດໃຫ້ບໍລິການຢ່າງເປັນທາງການເບື້ອງຕົ້ນແມ່ນຈະເປີດໃຫ້ບໍລິການຮັບຊໍາລະຜ່ານຊ່ອງທາງປ່ອງບໍລິການຂອງທະນາຄານຮ່ວມພັດທະນາຈໍານວນ 62 ໜ່ວຍບໍລິການໃນຂອບເຂດທົ່ວປະເທດ, ນອກຈາກນັ້ນຍັງຈະຊໍາລະຜ່ານຊ່ອງທາງ JDB Yes Mobile Banking ແລະຍັງຈະໄດ້ສືບຕໍ່ພັດທະນາປັບປຸງລະບົບຊໍາລະຮ່ວມກັບຄັງເງິນແຫ່ງຊາດ, ຄາດໝາຍຈະໃຫ້ສໍາເລັດພາຍໃນຕົ້ນປີ 2022 .

ທະນາຄານຮ່ວມພັດທະນາໄດ້ຮ່ວມມືກັບຫຼາຍອົງກອນ ແລະຫຼາຍບໍລິສັດເພື່ອບໍລິການດ້ານການເງິນທີ່ຄົບວົງຈອນໃຫ້ກັບລູກຄ້າທຸກລະດັບຢ່າງເທົ່າທຽມກັນປະຕິບັດນະໂບຍາຍຕ່າງຝ່າຍມີຜົນປະໂຫຍດຕາມຄໍາຂວັນທີ່ວ່າ: “ເຕີບໃຫຍ່ໄປພ້ອມກັນ”.

แชร์