ທຫລ ຮ່ວມມື ອປຊ ໃນການເຂົ້າລະບົບປະກັນສັງຄົມ

ຂ່າວ: ສານຮສສ

ເພື່ອເປັນຫຼັກຄໍ້າປະກັນສິດຜົນປະໂຫຍດທາງດ້ານສະຫວັດດີການໃຫ້ແກ່ພະນັກງານຜູ້ອອກແຮງງານທັງພາກລັດ ແລະ ເອກະຊົນໃນເວລາປະສົບເຄາະຮ້າຍຈາກອຸບັດຕິເຫດ, ການເຈັບໄຂ້ໄດ້ປ່ວຍ, ເຖົ້າແກ່ສະລາຕະຫຼອດເຖິງການເສຍຊີວິດ ແລະອື່ນໆ ແນໃສ່ເບິ່ງແຍງຊີວິດການເປັນຢູ່ຂອງພະນັກງານໃຫ້ດີຂຶ້ນເປັນກ້າວໆ ທັງເປັນການປະກອບສ່ວນເຂົ້າໃນການພັດທະນາປະເທດຊາດນຳອີກສະນັ້ນຈຶ່ງໄດ້ມີພິທີເຊັນບົດບັນທຶກຄວາມເຂົ້າໃຈກ່ຽວກັບການເຂົ້າປະກັນສັງຄົມຂອງລະຫວ່າງທະນາຄານ ແຫ່ງ ສປປ ລາວ ກັບອົງການປະກັນສັງຄົມແຫ່ງຊາດ (ອປຊ) ຕາງໜ້າເຊັນໂດຍທ່ານ ນາງ ແກ້ວ ຈັນທະວີໄຊ ຫົວໜ້າອົງການປະກັນສັງຄົມແຫ່ງຊາດ  ແລະທ່ານ ເພັດສະຖາ ພອນແກ້ວວິຈິດ ຫົວໜ້າຫ້ອງການທະນາຄານແຫ່ງ ສປປ ລາວ.

ພິທີຈັດຂຶ້ນໃນວັນທີ 9 ທັນວາ 2021, ທີ່ທະນາຄານແຫ່ງ ສປປ ລາວ ໂດຍການເປັນກຽດເຂົ້າຮ່ວມຂອງທ່ານ ນາງໃບຄຳ ຂັດທິຍະ ລັດຖະມົນຕີກະຊວງແຮງງານ ແລະສະຫວັດດີການສັງຄົມ ແລະທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ, ມີບັນດາທ່ານຫົວໜ້າກົມ, ຮອງກົມອ້ອມຂ້າງທະນາຄານ ແຫ່ງ ສປປ ລາວ ເຂົ້າຮວ່ມ.

ການເຂົ້າລະບົບປະກັນສັງຄົມຂອງທະນະຄານແຫ່ງ ສປປ ລາວ ແມ່ນຈະໄດ້ເລີ່ມແຕ່ເດືອນມັງກອນ ປີ 2022 ເປັນຕົ້ນໄປພະນັກງານຂອງ ທຫລ ຈະໄດ້ເຂົ້າສູ່ລະບົບປະກັນສັງຄົມຕາມກົດໝາຍວ່າດ້ວຍການປະກັນສັງຄົມຮູບແບບລັດຖະກອນໂດຍມີການຂຶ້ນທະບຽນມອບເງິນສົມທົບຕາມລະບຽບການ ແລະຮັບນະໂຍບາຍສະຫວັດດີການຕາມທີ່ໄດ້ກໍານົດໃນລະບຽບກົດໝາຍ.

ທ່ານ ນາງ ໃບຄຳ ຂັດທິຍະ ຍັງໄດ້ມີຄຳເຫັນວ່າ: ທັງສອງພາກສ່ວນຈະພ້ອມກັນປະຕິບັດພັນທະ ແລະນະໂຍບາຍຕາມລະບຽບກົດໝາຍໃຫ້ໄດ້ຮັບປະສິດທິພາບປະສິດຕິຜົນສູງເພື່ອໃຫ້ພະນັກງານທຸກຄົນໄດ້ຮັບຜົນປະໂຫຍດດ້ານສະຫວັດດີການຢ່າງທົ່ວເຖິງພ້ອມກັນປຶກສາຫາລືໃຫ້ການຊ່ວຍເຫຼືອເຊິ່ງກັນ ແລະກັນໃນການແກ້ໄຂບັນຫາທີ່ອາດຈະເກີດຂຶ້ນເວລາຈັດຕັ້ງປະຕິບັດວຽກງານມີການປຶກສາຫາລືຖອດຖອນບົດຮຽນ ແລະ ແກ້ໄຂບັນຫາທີ່ພົວພັນເຖິງສິດ, ຜົນປະໂຫຍດທີ່ເຫັນວ່າບໍ່ສອດຄ່ອງ, ຮ່ວມມືກັນຄົ້ນຄວ້າ, ກໍານົດ ແລະປັບປຸງຜົນປະໂຫຍດທີ່ກ່ຽວຂ້ອງສົ່ງເສີມ, ຊຸກຍູ້ວຽກງານປະກັນສັງຄົມໃຫ້ດີຂຶ້ນເປັນກ້າວໆ; ພ້ອມນີ້ທ່ານລັດຖະມົນຕີ ຮສສ ຍັງໄດ້ສະແດງຄວາມຍ້ອງຍໍຊົມເຊີຍມາຍັງຄະນະພັກຄະນະນໍາທາງທະນາຄານ ແຫ່ງ ສປປ ລາວ ທີ່ຍາມໃດກໍ່ເປັນຫ່ວງ ເປັນໃຍນໍາການປະຕິບັດນະໂຍບາຍດ້ານສະຫວັດດີການຂອງພະນັກຂອງຕົນ ແລະຊີ້ນໍາ-ນໍາພາຢ່າງໃກ້ສິດໃນການຄົ້ນຄວ້າການເຂົ້າສູ່ລະບົບປະກັນສັງຄົມຈົນມາຮອດມື້ນີ້.

แชร์