ລາວ ສົ່ງອອກສິນຄ້າໄປອາເມລິກາ ເກືອບ 30 ລ້ານໂດລາ

ຕົວເລກເປີດເຜີຍຈາກກະຊວງອຸດສາຫະກຳ ແລະການຄ້າໃນ 6 ເດືອນ ຕົ້ນປີ 2021 ມູນຄ່າການຄ້າລະຫວ່າງລາວ ແລະອາເມລິກາສາມາດປະຕິບັດໄດ້ 157.4 ລ້ານໂດລາ. ໃນນັ້ນ, ມູນຄ່າການສົ່ງອອກປະຕິບັດໄດ້ 29.9 ລ້ານໂດລາ ແລະມູນຄ່າການນໍາເຂົ້າປະຕິບັດໄດ້ 127.5 ລ້ານໂດລາ.

ເມື່ອວັນທີ 8 ທັນວານີ້ທ່ານ ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກຳ (ອຄ) ໄດ້ຕ້ອນຮັບທ່ານ ປີເຕີ ເຣມອນ ເອກອັກຄະລັດຖະທູດແຫ່ງສະຫະລັດອາເມລິກາ ປະຈຳ ສປປ ລາວ ໃນໂອກາດເຂົ້າຢ້ຽມພົບທີ່ກະຊວງອຸດສະຫະກຳ ແລະການຄ້າ (ອຄ).

ໃນໂອກາດດັ່ງກ່າວທ່ານລັດຖະມົນຕີກະຊວງ ອຄ ແລະທ່ານທູດສະຫະລັດອາເມລິກາໄດ້ປຶກສາຫາລືກ່ຽວກັບແຜນການຮ່ວມມືດ້ານການພັດທະນາເສດຖະກິດລະຫວ່າງ ສປປ ລາວ ແລະສະຫະລັດອາເມລິກາຜ່ານທາງກະຊວງອຸດສາຫະກໍາ ແລະການຄ້າ.

ສຳລັບການພົວພັນດ້ານການຄ້າລະຫວ່າງ ສປປ ລາວ ແລະ ສ.ອາເມລິກາ ໃນໄລຍະຜ່ານມາແມ່ນຈັດຕັ້ງປະຕິບັດຕາມຂອບຂໍ້ຕົກລົງວ່າດ້ວຍການຄ້າ ແລະການລົງທຶນ TIFA ແລະ ສິດທິພິເສດດ້ານການຄ້າປະເທດດ້ອຍພັດທະນາຊຶ່ງໃນ 6 ເດືອນຕົ້ນປີ 2021 ມູນຄ່າການຄ້າລະຫວ່າງລາວ ແລະ ອາເມລິກາສາມາດປະຕິບັດໄດ້ 157.4 ລ້ານໂດລາ. ໃນນັ້ນ, ມູນຄ່າການສົ່ງອອກປະຕິບັດໄດ້ 29.9 ລ້ານໂດລາ ແລະມູນຄ່າການນໍາເຂົ້າປະຕິບັດໄດ້ 127.5 ລ້ານໂດລາ.

ສິນຄ້າຫຼັກທີ່ ສປປ ລາວ ສົ່ງອອກ ໄປອາເມລິກາມີ: (ຕຽງ, ເສື່ອ, ເບາະ, ໂຄມໄຟ ທີ່ບໍ່ແມ່ນເຄື່ອງເຟີນີເຈີ), ເກີບ, ເຄື່ອງນຸ່ງຫົ່ມ, ເຄື່ອງຊຸບຫົວ(ໝວກ, ຜ້າຄຸມຫົວ), ໄຂ່ມຸກ, ແກ້ວປະເສີດ, ເຄື່ອງຫຼິ້ນກິລາ, ຢາສູບ, ເຄື່ອງໃຊ້ໄຟຟ້າ ແລະອຸປະກອນເຄື່ອງໃຊ້ໄຟຟ້າ, ກາເຟ  (ບໍ່ທັນໄດ້ປຸງແຕ່ງ) ແລະອຸປະກອນກົນ ຈັກ ແລະສ່ວນປະກອບ.

ສິນຄ້າຫຼັກທີ່ ສປປ ລາວ ນໍາເຂົ້າຈາກອາເມລິກາມີ: ເຍື່ອໄມ້ ແລະເສດເຈ້ຍ, ເຄື່ອງໄຟຟ້າ ແລະອຸປະກອນໄຟຟ້າ, ກາກ ແລະສິ່ງເສດເຫຼືອຈາກອຸດສາຫະກຳຜະລິດອາຫານ, ຊິ້ນສ່ວນອາໄຫຼ່ລົດ (ລວມທັງຢາງ, ແວ່ນ, ໂສ້), ພາຫະນະທາງບົກ (ນອກຈາກລົດຈັກ, ລົດໄຖ), ອຸປະກອນກົນຈັກ (ນອກຈາກເຄື່ອງກົນຈັກພາຫະນະ), ເຫຼັກ ແລະເຄື່ອງທີ່ເຮັດດ້ວຍເຫຼັກ, ເຫຼັກກ້າ, ເຄື່ອງມື ແລະອຸປະກອນທັດສະນະສາດ, ເຄື່ອງດື່ມ (ນໍ້າ, ນໍ້າອັດລົມ, ຊູກໍາລັງ), ເຄື່ອງໃຊ້ທີ່ເຮັດດ້ວຍພລາສະຕິກ.

ດ້ານການລົງທຶນເລີ່ມແຕ່ປີ 2008 ມາຮອດປະຈຸບັນມູນຄ່າການລົງທຶນຂອງ ສ.ອາເມລິກາ ໃນ ສປປ ລາວ (ສະເພາະໃນຂະແໜງກິດຈະການທົ່ວໄປ) ມີມູນຄ່າລວມທັງໝົດ 280.04 ລ້ານໂດລາ. ໃນນັ້ນ, ຂະແໜງການທີ່ອາເມລິກາລົງທຶນໃນ ສປປ ລາວ ສູງສຸດປະກອບດ້ວຍ: ການກໍ່ສ້າງ, ອຸດສາຫະກໍາບໍ່ແຮ່ ແລະ ການຂຸດຄົ້ນ, ການເຄື່ອນໄຫວດ້ານການເງິນ, ການປະກັນໄພ ແລະການເຄື່ອນໄຫວດ້ານທີ່ພັກເຊົາ, ບໍລິການ.

ດ້ານການຊ່ວຍເຫຼືອປະກອບມີ: ໂຄງການເຊື່ອມໂຍງສາກົນ ແລະອາຊຽນ (USAID LUNA LAO), ໂຄງການເຊື່ອມໂຍງສາກົນ ແລະອາຊຽນໄລຍະ 2 (USAID LUNA II), ໂຄງການສົ່ງເສີມຄວາມສາມາດໃນການແຂ່ງຂັນ ແລະການຄ້າຂອງ ສປປ ລາວ (LCT), ໂຄງການສ້າງສະພາບແວດລ້ອມທີ່ເອື້ອອໍານວຍຕໍ່ທຸລະກິດລາວ (USAID LBE).

ໃນນັ້ນໄດ້ສະເໜີໃຫ້ລັດຖະບານສະຫະລັດອາເມລິກາສືບຕໍ່ໃຫ້ການຮ່ວມມື ແລະຊ່ວຍເຫຼືອໃນຮູບແບບການຈັດຕັ້ງປະຕິບັດໂຄງການຜ່ານການສ້າງຕັ້ງກອງທຶນຫຼາຍຝ່າຍ, ສືບຕໍ່ໃຫ້ການສະໜັບສະໜູນພາຍຫຼັງສິ້ນສຸດໂຄງການ LCT, ສືບຕໍ່ສະໜັບສະໜູນກົນໄກການບໍລິຫານຄຸ້ມຄອງໂຄງການທີ່ຈັດຕັ້ງປະຕິບັດຜ່ານລັດຖະບານທີ່ນຳໃຊ້ໃນປະຈຸບັນຂອງກະຊວງ ອຄ ເພື່ອຄວາມເປັນເຈົ້າການ ແລະນຳໃຊ້ທຶນຊ່ວຍເຫຼືອຂອງຕ່າງປະເທດໃຫ້ມີປະສິດທິຜົນຕາມຖະແຫຼງການປາຣີແລະວຽງຈັນໄດ້ກຳນົດໄວ້, ສືບຕໍ່ໃຫ້ການສະໜັບສະໜູນ Trade and Private Sector Development Roadmap ໃນຮ່າງບົດປັບປຸງບົດວິໄຈການເຊື່ອມໂຍງສາກົນດ້ານການຄ້າ (Lao PDR Diagnostic Trade Integration Study - DTIS) update ແລະອື່ນໆ.  

ໃນວັນດຽວກັນ, ທ່ານ ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະການຄ້າ (ອຄ) ກໍ່ໄດ້ຕ້ອນຮັບ ທ່ານ ນາງ ແຂວະລີ ວົງສຸທິ ປະທານສະມາຄົມເສດຖະກິດ ແລະວັດທະນະທຳລາວ-ຈີນ ພ້ອມຄະນະເຂົ້າຢ້ຽມຂໍ່ານັບເນື່ອງໃນໂອກາດປີໃໝ່ສາກົນ 2022 ທີ່ໃກ້ຈະມາເຖິງ ແລະຂໍທິດຊີ້ນຳກ່ຽວກັບການຮ່ວມມືພັດທະນາໂຄງການ ແລະການສົ່ງອອກຜະລິດຕະພັນລາວໄປຂາຍໃນຕະຫຼາດໄຫນານ ສປ ຈີນ.

แชร์