ປະທານສານປະຊາຊົນສູງສຸດຢ້ຽມຢາມ ແລະເຮັດວຽກຢູ່ພາກເໜືອ

ຂ່າວ: ສີສຸວັນ

 ໃນຕອນແລງຂອງວັນທີ 6 ທັນວາ ປະທານສານປະຊາຊົນແຂວງ ແລະສານປະຊາຊົນພາກເໜືອພ້ອມຄະນະໄດ້ເປັນກຽດຕ້ອນຮັບ ທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸດພ້ອມຄະນະທີ່ສະຖານີລົດໄຟຟ້າແຂວງຫຼວງພະບາງ ແລະໃນວັນທີ 7 ທັນວາ ເຂົ້າຢ້ຽມຢາມການນໍາແຂວງຫຼວງ ພະບາງ ແລະເຮັດວຽກຮ່ວມກັບສານປະຊາຊົນພາກເໜືອທີ່ຫ້ອງປະຊຸມໃຫຍ່ຂອງກອງບັນຊາການທະຫານແຂວງຫຼວງພະບາງ, ມີປະທານສານປະຊາຊົນພາກເໜືອ, ສານແຂວງ, ມີບັນດາຜູ້ພິພາກສາ, ພະນັກງານລັດຖະກອນຂອງສານປະຊາຊົນພາກເໜືອເຂົ້າຮ່ວມ.

ກອງປະຊຸມໄດ້ຮັບຟັງການລາຍງານການຈັດຕັ້ງປະຕິບັດວຽກງານຂອງສານປະຊາຊົນພາກເໜືອ ແລະແຕ່ລະຂົງເຂດວຽກງານຂອງສານພາຍໃນແຂວງຫຼວງພະບາງໃນໄລຍະຜ່ານມາເຫັນວ່າທຸກພວກສ່ວນໄດ້ເອົາໃຈໃສ່ ແລະຖືສໍາຄັນໃນການປະຕິບັດໜ້າທີ່ວຽກງານທີ່ຕົນໄດ້ຮັບມອບໝາຍ, ມີການສະຫຼຸບຕີລາຄາຄືນສະຫຼຸບຖອດຖອນບົດຮຽນ, ຈຸດດີທີ່ຈະຕ້ອງໄດ້ສືບຕໍ່ເສີມຂະຫຍາຍ ແລະ ຈຸດອ່ອນຂໍ້ຄົງຄ້າງທີ່ຈະຕ້ອງໄດ້ນໍາໄປປັບປຸງແກ້ໄຂໃນຕໍ່ໜ້າເພື່ອສ້າງໃຫ້ສານປະຊາຊົນພາກເໜືອໄດ້ມີການເຄື່ອນໄຫວທີ່ຖືກຕ້ອງຕາມລະບຽບກົດໝາຍພ້ອມນີ້ບັນດາພະນັກງານ-ລັດຖະກອນໃນ ສານປະຊາຊົນພາກເໜືອຍັງມີຄວາມອຸ່ນອ່ຽນທຸ່ນທ່ຽງ, ມີຄວາມເຊື້ອໝັ້ນຕໍ່ການນໍາພາຂອງພັກ, ຮັກສາໄດ້ຄວາມສາມັກຄີພາຍໃນມີສະຕິເຄົາລົບ ແລະ ປະຕິບັດລະບຽບກົດໝາຍຢ່າງເຂັ້ມງວດ, ພ້ອມກັນຕັ້ງໜ້າປະຕິບັດວຽກງານທີ່ໄດ້ຮັບ ມອບໝາຍໃຫ້ສໍາເລັດຜົນເປັນຢ່າງດີ.

ໂອກາດດັ່ງກ່າວທ່ານປະທານສານປະຊາຊົນສູງສຸດກໍໄດ້ມີຄໍາເຫັນຊີ້ນໍາຫຼາຍບັນຫາເພື່ອໃຫ້ຄະນະປະທານສານນໍາໄປປັບປຸງແກ້ໄຂເປັນຕົ້ນແມ່ນເອົາໃຈໃສ່ສຶກສາອົບຮົມການເມືອງແນວຄິດໃຫ້ຜູ້ພິພາກສາ, ພະນັກງານສານທຸກຄົນໃຫ້ມີນໍ້າໃຈຮັກຊາດ, ມີຄວາມຈົ່ງຮັກພັກດີຕໍ່ພັກ, ຮັບໃຊ້ປະຊາຊົນ, ຫ້າມຫຼົງເລລ່ຽມກົນອຸບາຍຂອງສັດຕູ ແລະກຸ່ມຄົນບໍ່ດີ, ແລ່ນນຳແຕ່ຜົນປະໂຫຍດສ່ວນຕົວ, ສວຍໃຊ້ໜ້າທີ່ຕຳແໜ່ງໄປໃນທາງບໍ່ຖືກຕ້ອງຜິດຕໍ່ລະບຽບກົດໝາຍໃນການພິພາກສາຄະດີ, ພັກ-ລັດຖະບານ ມອບໜ້າທີ່ອັນມີກຽດສູງສົ່ງນີ້ໃຫ້ເປັນເຈົ້າໜ້າທີ່ປົກປ້ອງກົດໝາຍ, ຕັດສິນກົດ ໝາຍ, ກົດໝາຍຈະມີຄວາມສັກສິດຫຼາຍ ຫຼືໜ້ອຍ, ການພິພາກສາຄະດີຖືກຕ້ອງ ເປັນທຳສະນັ້ນຈົ່ງສຸມສະຕິປັນຍາ, ຕອບຕ້ານທຸກກົນອຸບາຍມ້າງເພທຳລາຍຂອງພວກສັດຕູ ແລະກຸ່ມຄົນບໍ່ດີເອົາໃຈໃສ່ຍົກສູງຄຸນນະພາບການເຄື່ອນໄຫວວຽກງານ ຂອງສານປະຊາຊົນພາກເໜືອໃຫ້ມີບາດກ້າວຂະຫຍາຍຕົວໃໝ່ ແລະມີຜົນສໍາເລັດຍິ່ງຫຍ່ກວ່າເກົ່າ. 

ພ້ອມນີ້ທ່ານປະທານຍັງໄດ້ຮຽກຮ້ອງມາຍັງຄະນະພັກ, ຄະນະນໍາຕະຫຼອດເຖິງຜູ້ພິພາກສາ ແລະພະນັກງານ-ລັດຖະກອນ ທັງໝົດຈົ່ງໄດ້ເພີ່ມທະວີຄວາມສາມັກຄີເປັນເອກະພາບ, ເຊີດຊູຄວາມຮັບຜິດຊອບຕໍ່ໜ້າທີ່ການເມືອງຂອງຕົນເຮັດໃຫ້ລະບົບສານປະຊາຊົນມີການຫັນປ່ຽນໄປສູ່ຄຸນນະພາບໃໝ່ທີ່ດີເພື່ອປະກອບສ່ວນເຂົ້າໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດໃຫ້ ນັບມື້ກ່າວຂຶ້ນຢ່າງບໍ່ຢຸດຢັ້ງ.

• 10/12/2021