ປະຊາຊົນ 17 ບ້ານ ຖືກເຂື່ອນໄຟຟ້ານໍ້າອູ 1

ໂຄງການກໍ່ສ້າງເຂື່ອນໄຟຟ້ານໍ້າອູ 1 ເມືອງປາກອູ ແຂວງຫຼວງພະບາງ ຫ່າງຈາກເທສະບານເມືອງ 38 ກິໂລແມັດ ໄປທາງທິດເໜືອໂຄງການດັ່ງກ່າວມີຜົນກະທົບທັງໝົດ 17 ບ້ານ, ໃນນັ້ນເມືອງປາກອູມີ 13 ບ້ານ, ເມືອງງອຍ 4 ບ້ານ, ສ່ວນບ້ານທີ່ຖືກຍົກຍ້າຍ 4 ບ້ານ, ມີເຮືອນ 296 ຫຼັງ, ທັງໝົດນັ້ນໄດ້ຖືກຈັດສັນ ແລະຍົກຍ້າຍແລ້ວ.

ວັນທີ 6 ທັນວານີ້, ທີ່ພະແນກຊັບພະຍາກອນທໍາມະຊາດ ແລະສິ່ງແວດລ້ອມແຂວງຫຼວງພະບາງໄດ້ຈັດກອງປະຊຸມທົບທວນຄືນການຈັດຕັ້ງປະຕິບັດວຽກງານທົດແທນຄ່າເສຍຫາຍ, ການຈັດສັນ-ຍົກຍ້າຍ ແລະຟື້ນຟູຊີວິດການເປັນຢູ່ໃຫ້ປະຊາຊົນທີ່ຖືກຜົນກະທົບຈາກການສ້າງເຂື່ອນນໍ້າອູ 1 ເມືອງປາກອູ ແຂວງຫຼວງພະບາງໂດຍການເປັນປະທານຂອງທ່ານ ສຸກັນ ບຸນຍົງ ຮອງເລຂາພັກແຂວງ, ມີທ່ານ ຈັນທະວົງ ຜົນນະຈິດ ຫົວໜ້າພະແນກຊັບພະຍາກອນທໍາມະຊາດ  ແລະ ສິ່ງແວດລ້ອມແຂວງພ້ອມດ້ວຍຂະແໜງການກ່ຽວຂ້ອງບໍລິສັດໄຟຟ້ານໍ້າອູເຂົ້າຮ່ວມ.

ວາລະກ່າວເປີດກອງປະຊຸມທ່ານ ຈັນທະວົງ ຜົນນະຈິດ ກໍ່ໄດ້ໃຫ້ຮູ້ວ່າ: ໂຄງການກໍ່ສ້າງເຂື່ອນໄຟຟ້ານໍ້າອູ 1 ເມືອງປາກອູແຂວງຫຼວງພະບາງຫ່າງຈາກເທສະບານເມືອງ 38 ກິໂລແມັດ ໄປທາງທິດເໜືອໂຄງການດັ່ງກ່າວມີຜົນກະທົບທັງໝົດ 17 ບ້ານ, ໃນນັ້ນເມືອງປາກອູມີ 13 ບ້ານ, ເມືອງງອຍ 4 ບ້ານ, ສ່ວນບ້ານທີ່ຖືກຍົກຍ້າຍ 4  ບ້ານ, ມີເຮືອນ 296 ຫຼັງ, ທັງໝົດນັ້ນໄດ້ຖືກຈັດສັນ ແລະຍົກຍ້າຍແລ້ວ.

ທ່ານກ່າວຕື່ມວ່າ: ພາຍຫຼັງຕັນນໍ້າຜະລິດໄຟຟ້າແລ້ວຍັງມີຜົນກະທົບຕື່ມເປັນຕົ້ນແມ່ນນໍ້າຖ້ວມຍື່ງກະທົບຫ້ອງນໍ້າ, ເຮືອນຄົວ, ຄັນຄູຕ້ານເຈື່ອນ ແລະ ເຮືອນຂອງປະຊາຊົນທີ່ອາໄສຢູ່ຕິດກັບແຄມນໍ້າ, ດັ່ງນັ້ນທາງໂຄງການຈຶ່ງໄດ້ສົມທົບໜ່ວຍງານຈັດສັນ, ຊົດເຊີຍ ແລະຟື້ນຟູຜົນກະທົບຕໍ່ຊີວິດການເປັນຢູ່ຂອງປະຊາຊົນ ຫຼື RMU ຂອງແຂວງ ແລະເມືອງສືບຕໍ່ແກ້ໄຂ.

ຈາກນັ້ນຕາງໜ້າໜ່ວຍງານຈັດສັນ, ຊົດເຊີຍ ແລະຟື້ນຟູຜົນກະທົບຕໍ່ຊີວິດກາເປັນຢູ່ຂອງປະຊາຊົນ ຫຼື RMU ຂອງແຂວງ ແລະເມືອງກໍ່ໄດ້ລາຍງານການຈັດຕັ້ງປະຕິບັດຟື້ນຟູຊີວິດການເປັນຢູ່ຂອງປະຊາຊົນພາຍຫຼັງໄດ້ຮັບການຍັບຍ້າຍໃນໄລຍະຜ່ານມາວ່າ: ການຟື້ນຟູຊີວິດການເປັນຢູ່ໃຫ້ປະຊາຊົນ 296 ຄອບຄົວໃນ 4 ບ້ານຄື: ບ້ານຫ້ວຍໂລ 134  ຄອບຄົວ, ລາດທ່າແຮ່ 78 ຄອບຄົວ, ປາກແຈກ 49 ຄອບຄົວ ແລະບ້ານຫາດຊວາ 35 ຄອບຄົວ ຊຶ່ງມີຜົນກະທົບຕໍ່ທີ່ ດິນທັງໝົດ 2.097 ຕອນ, ໃນເນື້ອທີ່ 160,29 ເຮັກຕາ, ໃນນີ້ມີດິນປຸກສ້າງ 450 ຕອນ, 15,7 ເຮັກຕາ, ດິນກະສິກໍາ 1.647 ຕອນ, 145,21 ເຮັກຕາ, ຜົນກະທົບຕໍ່ຜົນລະປູກຕ່າງໆ 10.674 ຕົ້ນ, ຕໍ່ຊັບສິນລວມຂອງບ້ານມີໂຮງຮຽນອະນຸບານ 3 ແຫ່ງ, ໂຮງຮຽນປະຖົມ 2 ແຫ່ງ, ຫ້ອງການບ້ານ 2 ແຫ່ງ, ວັດ 2  ແຫ່ງ ແລະປ່າຊ້າ 15 ແຫ່ງ ແລະຜົນກະທົບຕໍ່ຊັບສິນຂອງລັດມີເສັ້ນທາງເລກທີ 13 ເໜືອ 7 ຈຸດ, ຍາວ 6 ກິໂລແມັດ,  ຂົວ 6 ຈຸດ, ຍາວ 60 ແມັດ, ໄດ້ເລີ່ມປະຕິບັດການຟື້ນຟູມາແຕ່ທ້າຍປີ 2020 ເປັນຕົ້ນມາ,ຈໍານວນທຶນທີ່ສົ່ງເສີມໃຫ້ປະຊາຊົນແມ່ນ 10 ລ້ານກີບຕໍ່ຄົນຕໍ່ຄອບຄົວ,ລວມຄ່າທົດແທນຜົນເສຍຫາຍໃຫ້ປະຊາຊົນໃນປີ 2019 ສະເພາະສິ່ງປຸກສ້າງ ແລະຜົນລະປູກໃນ 19 ບ້ານຂອງ 2 ເມືອງ ມີມູນຄ່າທັງໝົດ 17 ຕື້ກວ່າກີບ ແລະການລ້ຽງດູໃນໄລຍະຂ້າມຜ່ານ 2 ຕື້ກວ່າກີບ, ໃນນີ້ຊົດເຊີຍຜົນລະປູກ 8 ຕື້ກວ່າກີບ, ສະເພາະສິ່ງປຸກສ້າງໃຫ້ປະຊາຊົນເມືອງປາກອູມີ 8 ບ້ານ ມີມູນຄ່າ 6 ຕື້ກວ່າກີບ, ສໍາລັບກິດຈະກໍາການສົ່ງ ເສີມແມ່ນອີງໃສ່ທ່າແຮງຂອງຄອບຄົວ ແລະບ້ານເປັນຫຼັກ ແລະຕາມຄວາມສະໝັກໃຈແຕ່ລະຄອບຄົວ, ໃນນັ້ນມີການລ້ຽງງົວຊຶ່ງກວມຈໍານວນຫຼາຍ, ການລ້ຽງແບ້, ປູກພືດຜັກ, ຂາຍເຄື່ອງຍ່ອຍ, ຫັດຖະກໍາ, ເຟີນີເຈີ, ຮ້ານສ້ອມແປງລົດ ແລະການບໍລິການທົ່ວໄປ.

ກອງປະຊຸມຍັງໄດ້ປຶກສາຫາລືກ່ຽວກັບການແກ້ໄຂບັນຫາທີ່ໄດ້ຮັບຜົນກະທົບຜ່ານມາ, ການສະເໜີບາງບັນຫາທີ່ຍັງຄົງຄ້າງ ແລະການສືບຕໍ່ຈັດຕັ້ງປະຕິບັດທົດແທນຄ່າເສຍຫາຍໃຫ້ປະຊາຊົນລວມທັງແຜນໃນການແກ້ໄຂບັນຫາຄົງຄ້າງຂອງຜູ້ພັດທະນາໂຄງການຕື່ມອີກ.

แชร์