ການຄ້າຄຳມ່ວນມີຜົນງານພົ້ນເດັ່ນຫຼາຍດ້ານ

 ທ່ານ ທອງໄຊ ມັງໜໍ່ເມກ ຫົວໜ້າພະແນກອຸດສາຫະກຳ ແລະການຄ້າແຂວງຄຳມ່ວນໄດ້ລາຍງານໃຫ້ຮູ້ກ່ຽວກັບການຈັດຕັ້ງປະຕິບັດວຽກງານທີ່ພົ້ນເດັ່ນໃນຂົງເຂດອຸດສາຫະກຳ ແລະການຄ້າໃນປີ 2018 ຜ່ານມາໂດຍສະເພາະການຈັດຕັ້ງປະຕິບັດວຽກງານການສົ່ງອອກ-ນຳເຂົ້າຕາມດ່ານສາກົນຂົວມິດຕະພາບ 3 ແລະດ່ານສາກົນນາເພົ້າ-ຈໍຫຼໍ ຊຶ່ງຕົວເລກການສົ່ງອອກແມ່ນ 295 ລ້ານກວ່າໂດລາສະຫະລັດ,ຖ້າທຽບໃສ່ແຜນປີແມ່ນເພີ່ມ ຂຶ້ນ 21,11% ສິນຄ້າສົ່ງອອກ ສ່ວນຫຼາຍແມ່ນແຮ່ທາດ, ເກືອກາລີ, ແຮ່ກົ່ວ, ແຮ່ເຫຼັກ,ຜະລິດຕະພັນສິນຄ້າກະສິກຳປະເພດເຂົ້າ, ຢາງພາລາ, ມັນຕົ້ນ ແລະຜະລິດຕະພັນຈາກໄມ້. ສິນຄ້າທີ່ນຳເຂົ້າ ປະຕິບັດໄດ້ 156 ລ້ານກວ່າໂດ ລາຖ້າທຽບໃສ່ປີຜ່ານມາຫຼຸດລົງ 11,56% ສິນຄ້າຕົ້ນຕໍທີ່ນຳເຂົ້້າ ແມ່ນນ້ຳມັນເຊື້ອໄຟ, ອຸປະກອນກໍ່ສ້າງ, ແຜ່ນແພ, ສາເຫດຫຼຸດລົງ ແມ່ນຍ້ອນບັນດາໂຄງການໄລຍະ ຜ່ານມາແມ່ນໃກ້ຈະສຳເລັດເປັນ ສ່ວນໃຫຍ່ ແລະອີກຢ່າງໜຶ່ງໃນ ການຈັດຕັ້ງປະຕິບັດກ່ຽວກັບການ ນຳໃຊ້ແຫຼ່ງກຳເນີດສິນຄ້າໂດຍສະເພາະໃນກອບອາຊຽນໄດ້ມີແບບຟອມການນຳໃຊ້ເອກະສານແຫຼ່ງກຳເນີດສິນຄ້າໄລຍະຜ່ານມາປະຕິບັດໄດ້ 2 ລ້ານກວ່າໂດລາ ທຽບໃສ່ສົກປີຜ່ານມາເພີ່ມຂຶ້ນ 56,16% ແລະສິນຄ້າຜ່ານແດນປະຕິບັດໄດ້ 777 ລ້ານກວ່າໂດລາ ທຽບໃສ່ປີຜ່ານມາຫຼຸດລົງ 2,82% ສິນຄ້າສ່ວນໃຫຍ່ແມ່ນສິນຄ້າເອເລັກໂຕຣນິກເຄື່ອງໃຊ້ສອຍທາງດ້ານກະສິກຳເນື່ອງຈາກແຂວງຄຳມ່ວນໃນຊ່ວງໄລຍະລະດູຝົນຜ່ານມາໄດ້ຖືກຜົນກະທົບຈາກໄພທຳມະຊາດເຮັດໃຫ້ເສັ້ນທາງສົ່ງອອກທາງຊາຍແດນຫວຽດນາມເປ່ເພມີການສ້ອມແປງເປັນເຫດສົ່ງໃຫ້ມີຜົນກະທົບຕໍ່ການສົ່ງອອກ.

  ສຳລັບຄາດໝາຍສູ້ຊົນໃນປີ 2019 ຄາດໝາຍສູ້ຊົນສິນຄ້າສົ່ງອອກ 328 ລ້ານກວ່າໂດລາ ການນຳເຂົ້າແມ່ນ 167 ລ້ານກວ່າໂດລາ ສິນຄ້າຜ່ານແດນສົ່ງ ອອກຕໍ່ປະມານ 893 ລ້ານກວ່າໂດລາ ສ່ວນວຽກງານຄຸ້ມຄອງລາຄາສິນຄ້າແມ່ນໄດ້ປະຕິບັດຕາມດຳລັດ 474 ຂອງນາຍົກລັດຖະມົນຕີ ແລະແຈ້ງການແນະ ນຳຂອງລັດຖະມົນຕີກະຊວງອຸດສາຫະກຳ ແລະການຄ້າໂດຍສະເພາະສິນຄ້າປະເພດສະບຽງອາຫານ, ນໍ້າມັນເຊຶ້ອໄຟຕ່າງໆກ່ອນຈະມີການຈຳໜ່າຍ ຫຼື ກ່ອນຈະມີການ ຂຶ້ນລາຄາແມ່ນໄດ້ມີການຄິດໄລ່ໂຄງປະກອບລາຄາ, ໄດ້ມີການ ແຈ້ງລາຄາ, ໂດຍມີເຈົ້າໜ້າທີ່ຄະ ນະປະຈຳຕະຫຼາດ, ອອກແຈ້ງ ການ ພ້ອມທັງນຳພາອ້າຍນ້ອງລົງກວດກາບັນດາຕະຫຼາດໃນເທສະບານ, ຕາມຈຸດເບາະແສຕ່າງໆເປັນຕົ້ນເທສະການ, ໄລຍະເກີດໄພພິບັດອື່ນໆ, ແຕ່ງຕັ້ງອ້າຍນ້ອງປະຈຳຕະຫຼາດເປັນຕົ້ນການຄ້າ ແຂວງສົມທົບເມືອງ, ມີການໂຄ ສະນາຜ່ານສື່ໂທລະພາບ, ວິທະຍຸ, ໂທລະໂຄ່ງຕ່າງໆມີການແກ້ໄຂ ຊ່ວງໄລຍະສິນຄ້າຂຶ້ນລາຄາບາງປະເພດເຊັ່ນ: ເຂົ້າ,ນໍ້າມັນເປັນຕົ້ນ. ນອກຈາກນັ້ນກໍ່ໄດ້ທຳລາຍສິນຄ້າໝົດອາຍຸລອກຮຽນແບບມີ 51 ລາຍການມູນຄ່າ 52 ລ້ານກີບ. ພ້ອມທັງມີການຈັດຕັ້ງເຜີຍ ແຜ່ໃຫ້ນັກຮຽນ, ພໍ່ແມ່ປະຊາຊົນເພື່ອໃຫ້ຮູ້ຈັກການສັງເກດກ່ຽວກັບການເບິ່ງສິນຄ້າ, ເບິ່ງສະຫຼາກການໝົດອາຍຸ, ລອກຮຽນແບບ.

  ດ້ານວຽກງານຄຸ້ມຄອງທະບຽນວິສາຫະກິດແມ່ນໄດ້ແບ່ງໃຫ້ເມືອງຄຸ້ມຄອງມູນຄ່າເລີ່ມແຕ່ 400 ລ້ານລົງມາ,ໃນປີດຽວກັນນີ້ຂັ້ນແຂວງໄດ້ອອກໃບອະນຸຍາດ ໃຫ້ 82 ຫົວໜ່ວຍ, ມູນຄ່າຈົດທະ ບຽນແມ່ນ 256 ລ້ານກວ່າກີບ ຫຼື ປະມານ 8 ລ້ານກວ່າໂດລາ, ຂັ້ນເມືອງອະນຸຍາດແມ່ນ 172 ຫົວໜ່ວຍປະມານ 10 ຕື້ກວ່າ ກີບ, ປະຈຸບັນໃນການຈັດຕັ້ງວຽກ ງານວະລະແຫ່ງຊາດ SME ໂດຍ ປະຕິບັດຕາມບົດແນະນຳຂອງກະ ຊວງ ອຄ ໄດ້ສ້າງເກັບກຳຫົວໜ່ວຍ SME ຢູ່ແຂວງມີ 5.425 ຫົວ ໜ່ວຍ, ໃນນີ້ມີຈຸລະວິສາຫະກິດ 4.528 ຫົວໜ່ວຍ, ວິສະຫະກິດ ຂະໜາດນ້ອຍ 518 ຫົວໜ່ວຍ, ຂະໜາດກາງ 379 ຫົວໜ່ວຍ, ຂະແໜງ SME ປະຈຸບັນກວມເອົາ 98% ຂອງຖານລາຍຮັບໃນອະ ນາຄົດພວກເຮົາຈະມີແຜນພັດທະນາວຽກງານ SME ເປັນຕົ້ນແມ່ນຈະສ້າງຄວາມເຂັ້ມແຂງໃຫ້ພາກ ທຸລະກິດເປັນຕົ້ນແມ່ນການເຂົ້າ ຝຶກອົບຮົມທາງພາກລັດ-ພາກທຸລະກິດໂດຍການຊອກຫາຊ່ຽວຊານມາຝຶກອົບຮົມເພື່ອໃຫ້ເຂົາເຈົ້າສາມາດເຂົ້າຫາແຫຼ່ງທຶນ, ສາມາດສ້າງແຜນທຸລະກິດຂອງເຂົາ.

  ນອກນັ້ນກໍ່ໄດ້ມີໂຄງການມາຊ່ວຍຍົກລະດັບໃຫ້ກຸ່ມໂຮງສີເຂົ້າໃຫ້ໄດ້ມາດຖານຄຸນນະພາບ ຫຼື GMP, ຄາດໃນປີ 2020 ປະກອບມີໂຮງສີເຂົ້າວັນນິດາ, ໂຮງສີເຂົ້າ ບຸນມີ, ສ່ວນວຽກງານສົ່ງເສິມ ພາກທຸລະກິດເປັນຕົ້ນແມ່ນງານ ວາງສະແດງສິນຄ້າຈັດຂຶ້ນຢູ່ປະ ເທດໄທ, ສສ ຫວຽດນາມ ຫຼື ພາຍໃນເຊັ່ນ: ນະຄອນຫຼວງວຽງ ຈັນ, ຈໍາປາສັກ, ສະຫວັນນະເຂດ ແລະໃນມໍ່ໆ ແມ່ນໄດ້ສຳເລັດການຈັດງານສາຍສຳພັນສອງແຜ່ນດິນຄຳມ່ວນ-ນະຄອນພະນົມ ແລະ ງານຕະຫຼາດນັດວາງສະແດງສິນຄ້າໃນບຸນນະມັດສະການພະທາດສີໂຄດຕະບອງ ແລະສິ່ງທີ່ພົ້ນເດັ່ນຄືດ້ານການຈັດຕັ້ງປະຕິບັດຄຳສັ່ງເລກທີ 15 ຂອງທ່ານນາຍົກຊຶ່ງແຂ ວງຄຳມ່ວນໂດຍສະເພາະວຽກງານດັດສົມໂຮງງານປຸງແຕ່ງ ໄມ້ໃນແຂວງຄຳມ່ວນເອີ້ນວ່າ ເປັນບູລິມະສິດໜຶ່ງໃນຂົງເຂດອຸດ ສາຫະກຳໃນປີ 2018 ຜ່ານມາມີໂຮງງານປຸງແຕ່ງໄມ້ 77 ແຫຼ່ງ,ຫຍຸບໄດ້ 10 ແຫ່ງ,ຍັງເຫຼືອ 67 ໃນນີ້ແມ່ນຈະໄດ້ສືບຕໍ່ດັດສົມຕື່ມອີກເພື່ອໃຫ້ແທດເໝາະກັບວັດຖຸດິບ ແລະການພັດທະນາໄລຍະໃໝ່  ເພື່ອຈະຫັນບັນດາໂຮງຈັກໂຮງ ງານເຂົ້າສູ່ລະບຽບ ແລະຊົມໃຊ້ ວັດຖຸດິບທີ່ມີຢູ່ແລ້ວເປັນຕົ້ນແມ່ນໄມ້ຍຶດທີ່ລັດຖະບານໄດ້ປະມູນຂາຍ,ນອກນັ້ນຍັງຈະໄດ້ດັດສົມ ບັນດາໂຮງງານດັ່ງກ່າວນີ້ຊົມໃຊ້ໄມ້ປູກ, ໄມ້ວິກກະຖິ່ນນະລົງເພື່ອມາປຸງແຕ່ງ ແລະຢູ່ໃນນີ້ກໍ່ຕິດພັນກັບບັນດາໂຮງງານປຸງແຕ່ງໄດ້ມີການຈັດຕັ້ງປະມູນຂາຍໄມ້ຍຶດຂອງແຂວງໃຫ້ບັນດາໂຮງງານ ປຸງແຕ່ງໂດຍໄດ້ອອກແຈ້ງການ ຫຼາຍຄັ້ງ, ຫຼາຍສະບັບ, ໂຄສະນາ ຜ່ານສື່ຕະຫຼອດຮອດພໍ່ແມ່ປະຊາຊົນຜູ້ທີ່ມີເງື່ອນໄຂຊື້. ຊຶ່ງສາມາດປະຕິບັດໄດ້ 5.522 ແມັດກ້ອນ, ນໍ້າໜັກ 154.373 ໂຕນ, ມູນຄ່າທີ່ຖອກເຂົ້າງົບປະມານແລ້ວ 14 ຕື້ກວ່າກີບ ນີ້ແມ່ນສາມາດຈັດຕັ້ງ ປະຕິບັດໄດ້.

  ໃນຕົ້ນປີ 2019 ນີ້ ແມ່ນສາມາດປະມູນແລະທາບທາມຂາຍໄດ້ 93,91 ແມັດກ້ອນໃນມູນຄ່າ 117 ລ້ານກວ່າກີບ. ໃນນັ້ນການປະມູນແມ່ນຍັງຈະໄດ້ສືບຕໍ່ເພາະໄມ້ສ່ວນໃຫຍ່ແມ່ນໄມ້ຕົກຄ້າງມາຫຼາຍປີຄຸນນະພາບກໍ່ຈະຫຼຸດລົງອີງໃສ່ສະພາບກໍ່ຈະໄດ້ຂາຍຕາມຄຸນນະພາບຂອງໄມ້ແລະໃນຕໍ່ໜ້ານີ້ຈະໄດ້ສຸມໃສ່ຊຸກຍູ້ບັນດາຜູ້ປະກອບການເປັນຕົ້ນແມ່ນທຸລະກິດ ທີ່ເຮັດກ່ຽວກັບ SME ປະຈຸບັນ ພວມຂຸ້ນຂ້ຽວສ້າງແຜນໃນປີ 2020-2025 ໂດຍເລັ່ງສ້າງຄວາມເຂັ້ມແຂງໃຫ້ເຂົາເຈົ້າເພື່ອພັດທະນາການຄ້າໃນ 10 ຕົວເມືອງຜະລິດຕະພັນສິນຄ້າໂອທັອບ-ໂອດັອບປະຈຸບັນພວມເຮັດແຜ່ນພັບບົວຊົວຕ່າງໆຄາດຄະເນໃນປີ 201 9 ຈະໃຫ້ມີຫຼາກຫຼາຍຜະລິດຕະພັນທັງນີ້ກໍ່ຍ້ອນໄດ້ຮັບການສະໜັບສະໜູນຈາກໂຄງການ JIKA ທີ່ໄດ້ໃຫ້ການຊ່ວຍເຫຼືອຊອກຫາຕະຫຼາດ, ຊອກຫາເງື່ອນໄຂໃຫ້ຜູ້ປະກອບການ ແລະວຽກງານຄຸ້ມຄອງລາຄາສິນ ຄ້າຂໍຮຽກຮ້ອງມາຍັງພໍ່ແມ່ປະ ຊາຊົນຊ່ອຍເປັນຫູເປັນຕາຊ່ອຍເຈົ້າ ໜ້າທີ່ປົກປ້ອງລາຄາສິນຄ້າຖ້າພົບເຫັນການຂຶ້ນລາຄາຂອງແມ່ ຄ້າ ຫຼື ສິ່ງໃດທີ່ຕິດພັນກັບພະແນກ ອຄ ກະລຸນາໂທແຈ້ງສາຍດ່ວນ 1510 ໄດ້ຕະຫຼອດ 24  ຊົ່ວໂມງ ແລະທ້າຍນີ້ຂ້າພະເຈົ້າຂໍຕາງໜ້າຄະນະນຳພະແນກຂໍຂອບໃຈບັນດາສື່ມວນຊົນ ຫຼື ພໍ່ແມ່ປະຊາຊົນທີ່ໃຫ້ການຕິດຕາມ ແລະທີ່ໃຫ້ການສະໜັບສະໜູນຜ່ານມາ.

ໂດຍ: ມະນີວັນ

แชร์