ມອບແນວພັນງົວໃຫ້ 20 ຄອບຄົວ ແລະທຶນການສຶກສາໃຫ້ນັກຮຽນ

ເມື່ອບໍ່ດົນມານີ້ທີ່ສຸກສາລາບ້ານແດນສະຫວັນ ເມືອງເຊໂປນ ແຂວງສະຫວັນະເຂດ ກອງບັນຊາການທະຫານຊາຍແດນສຸງສຸດຮ່ວມກັບກອງບັນຊາການທະຫານຊາຍແດນແຂວງກວາງຈິ ສສ ຫວຽດນາມ ໄດ້ຈັດພິທີມອບທຶນການສຶກສາໃຫ້ແກ່ນ້ອງນັກຮຽນໄປໂຮງຮຽນຈຳນວນ 100 ຄົນ ລວມເງິນ 150 ລ້ານດົງ ແລະມອບແນວພັນງົວໃຫ້ 20 ຄອບຄົວຂອງບ້ານເຟືອງ ແລະບ້ານແດນສະຫວັນ ໃນມູນຄ່າ 150 ລ້ານດົງ, ເປັນກຽດເຂົ້າຮ່ວມຝ່າຍລາວມີທ່ານ ວົງສະຫວັນ ວຽງມະນີ ເຈົ້າເມືອງເຊໂປນ, ຝ່າຍຫວຽດນາມມີທ່ານພັນເອກ ຫງວຽນ ຊວນຕ່ວນ ຫົວໜ້າການເມືອງກອງບັນຊາການທະຫານຊາຍແດນແຂວງກວາງຈິ, ມີຄະນະພັກ-ຄະນະບັນຊາກອງບັນຊາການທະຫານແຂວງ, ປກສ ແຂວງ, ມີອຳນາດການປົກຄອງບ້ານແດນສະຫວັນ ແລະບ້ານເຟືອງຕະຫຼອດນ້ອງນ້ອຍນັກຮຽນໂຮງຮຽນປະຖົມບ້ານແດນສະຫວັນ ແລະບ້ານເຟືອງພ້ອມດ້ວຍຄອບຄົວທີ່ໄດ້ຮັບແນວພັນງົວຈຳນວນ 20 ຄອບຄົວເຂົ້າຮ່ວມ.

ໃນພິທີທ່ານ ພັນເອກ ຫງວຽນ ຊວນຕ່ວນ ຫົວໜ້າການເມືອງກອງບັນຊາການທະຫານຊາຍ ແດນແຂວງກວາງຈິກໍ່ໄດ້ມີຄຳເຫັນ ແລະກ່າວຈຸດປະສົງໃນການມອບທືນການສຶກສາ ແລະແນວພັນງົວໃນຄັ້ງນີ້ກໍເພື່ອແນໃສ່ປຸກລະດົມຈິດໃຈຊ່ວຍເຫຼືອນ້ອງນ້ອຍນັກຮຽນຜູ້ທຸກຍາກໃຫ້ມີຄວາມບຸກບືນສູ້ຊົນໃນການຮໍ່າຮຽນ ແລະຊ່ວຍເຫຼືອບັນດາຄອບຄົວຜູ້ທຸກຍາກຂອງບ້ານແດນສະຫວັນ ແລະບ້ານເຟືອງໃນຈຳນວນ 20 ຄອບຄົວ, ມີເງື່ອນໄຂພັດທະນາເສດຖະກິດລົບລ້າງຄວາມທຸກຍາກພ້ອມກັນເສີມສ້າງສາຍພົວພັນສາມັກຄີມິດຕະພາບຂອງປະຊາຊົນຢູ່ສອງເບື້ອງຊາຍແດນຫວັງຢ່າງຍິ່ງວ່າຄະນະພັກ-ອຳນາດການປົກຄອງທ້ອງຖິ່ນບັນດາໂຮງຮຽນສ້າງທຸກເງື່ອນໄຂອຳນວຍຄວາມສະດວກໃຫ້ບັນດານ້ອງນັກຮຽນຜູ້ທຸກຍາກບຸກບືນສູ້ຊົນໃນການຮໍ່າຮຽນ ແລະພັດທະນາເອົາໃຈໃສ່ຕິດຕາມການລ້ຽງສັດ, ເພື່ອຊ່ວຍປະຊາຊົນຂະຫຍາຍແນວພັນງົວໃຫ້ກາຍເປັນຝຸງງົວໃນອະນາຄົດ.

ໃນໂອກາດດັ່ງກ່າວນີ້ ທ່ານ ວົງສະຫວັນ ວຽງມະນີ ເຈົ້າເມືອງເຊໂປນ ກໍ່ໄດ້ກ່າວສະແດງຄຳຂອບອົກຂອບໃຈ ແລະສະແດງຄຳຮູ້ບຸນມາຍັງກອງບັນຊາການທະຫານຊາຍແດນສຸງສຸດ ແລະກອງບັນຊາການທະຫານຊາຍແດນແຂວງກວາງຈິ ແຫ່ງ ສສ ຫວຽດນາມ ທີ່ໄດ້ໃຫ້ການຊ່ວຍເຫຼືອທຶນການສືກສາ ແລະແນວພັນງົວໃນຄັ້ງນີ້ພ້ອມໃຫ້ຄຳໝັ້ນສັນຍາວ່າຈະລົງໄກ້ສິດຕິດແທດກັບອຳນາດການປົກຄອງບ້ານ ແລະໂຮງຮຽນເພື່ອເຮັດໃຫ້ການນຳໃຊ້ທຶນທີ່ໄດ້ຮັບຖືກຕ້ອງຕາມເປົ້າໝາຍ, ພ້ອມທັງອວຍພອນສາຍພົວພັນຄວາມສາມັກຄີຮັກແພງແບບພິເສດລະຫ່ວາງລາວ-ຫວຽດນາມເວົ້າສະເພາະກອງບັນຊາການທະຫານຊາຍແດນແຂວງກວາງຈິກັບເມືອງເຊໂປນໃຫ້ໝັ້ນຄົງທະນົງແກ່ນຕະຫຼອດໄປ.

แชร์