ທາບທາມຄຳເຫັນໃສ່ຮ່າງກົດໝາຍການປົກຄອງ

ເມື່ອບໍ່ດົນມານີ້ ເມືອງວັງວຽງ ແຂວງວຽງຈັນ ໄດ້ມີກອງປະຊຸມທາບທາມຄໍາເຫັນໃສ່ຮ່າງກົດໝາຍວ່າດ້ວຍການປົກຄອງດ້ວຍການສະໜັບສະໜູນຂອງສະຖາບັນຊ່ວຍເຫຼືອທາງດ້ານກົດໝາຍ ແລະວິຊາການ (ILSTA) ໂດຍການເປັນປະທານຮ່ວມຂອງທ່ານ ນິສິດ ແກ້ວປັນຍາ ຮອງລັດຖະຕີກະຊວງພາຍໃນ, ທ່ານ ລີຊາດ ຟີ ລິບປາ ປະທານສະຖາບັນຊ່ວຍ ເຫຼືອທາງດ້ານກົດໝາຍ ແລະວິຊາ ການ (ILSTA), ມີພະນັກງານຫຼັກແຫຼ່ງຂອງອໍານາດການປົກຄອງແຂວງ, ເມືອງ, ພະນັກງານ ກົດໝາຍອາວຸໂສ, ຄະນະຄົ້ນຄວ້າຮ່າງກົດໝາຍວ່າດ້ວຍການປົກຄອງເຂົ້າຮ່ວມ.

ການຮ່າງກົດໝາຍສະບັບນີ້ແມ່ນເພື່ອຈັດຕັ້ງຜັນຂະຫຍາຍແນວທາງຂອງພັກກ່ຽວກັບການສ້າງລັດທີ່ປົກຄອງດ້ວຍກົດໝາຍຢູ່ ສປປລາວ, ນັບແຕ່ປະເທດຊາດໄດ້ຮັບການສະຖາປະນາເປັນລະບອບສາທາລະນະລັດປະຊາ ທິປະໄຕ ປະຊາຊົນລາວ ຂຶ້ນໃນວັນ ທີ 2 ທັນວາ 1975 ເປັນຕົ້ນມາ, ພັກ ແລະລັດເຮົາກໍໄດ້ສຸມທຸກຄວາມພະຍາຍາມສ້າງ ສປປ ລາວ ໃຫ້ເປັນລັດທີ່ປົກຄອງດ້ວຍກົດໝາຍຂອງປະຊາຊົນ ໂດຍປະຊາຊົນ ແລະເພື່ອຜົນປະໂຫຍດຂອງປະຊາຊົນຢ່າງແທ້ຈິງຊຶ່ງໄດ້ສະແດງອອກໃນມະຕິຕ່າງໆ ຂອງພັກເປັນຕົ້ນມະຕິກອງປະຊຸມໃຫຍ່ຄັ້ງທີ IX, X, XI ຂອງພັກ, ທ່ານປະທານໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງພັກ ແລະ ປະຊາຊົນເຮົາໄດ້ໃຫ້ທັດສະນະທິດຊີ້ນຳກ່ຽວກັບລັດທີ່ປົກຄອງດ້ວຍກົດໝາຍວ່າ: “ລັດແຫ່ງອຳນາດກົດໝາຍແມ່ນລັດທີ່ຖືກົດໝາຍສູງກວ່າສິ່ງໃດໆ ແລະສະຕິເຄົາລົບກົດໝາຍຂອງພົນລະເມືອງໄດ້ກາຍ ເປັນຄວາມຊິນເຄີຍໃນຊີວິດປະຈຳວັນແລ້ວ, ລັດແຫ່ງອຳນາດກົດໝາຍຍັງແມ່ນລັດທີ່ປະຕິບັດພັນທະຂອງຕົນຕໍ່ພົນລະເມືອງ ແລະພັນທະຂອງພົນລະເມືອງຕໍ່ລັດ”.

ພັກເຮົາໄດ້ອອກມະຕິເລກທີ 037 ວ່າດ້ວຍການຍົກສູງປະສິດທິພາບການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍໃນປີ 2018 ແລະມະຕິ 112/ກມສພ, ວ່າດ້ວຍການຍົກສູງຄຸນນະພາບການດຳເນີນຄະດີຕາມຂະບວນຍຸຕິທຳເພື່ອເປັນພື້ນຖານໃຫ້ອົງການຕຸລາການ,ອົງການປົກຄອງທີ່ກ່ຽວຂ້ອງຄົ້ນຄວ້າ, ຈັດຕັ້ງຜັນຂະຫຍາຍເນື້ອໃນຈິດໃຈດັ່ງກ່າວເຂົ້າສູ່ວຽກງານຂອງຕົນໃຫ້ໄດ້ຮັບຜົນດີ, ເພີ່ມທະວີຄວາມໂປ່ງໃສ, ຖືກຕ້ອງ, ເປັນທໍາ, ເປັນບາດກ້າວ​ທີ່ສໍາຄັນໃຫ້ແກ່ການສ້າງລັດທີ່ປົກຄອງດ້ວຍກົດໝາຍຢູ່ ສປປ ລາວ ໃນຕໍ່ໜ້າ ແລະຍາວນານ.

ສປປ ລາວ ໄດ້ພັດທະນາລະບົບກົດໝາຍ ໃນຊຸມຕົ້ນປີ 1980 ມາຮອດປະຈຸບັນ ສປປ ລາວ ໄດ້ມີກົດໝາຍ 156 ສະບັບ, ໃນນີ້ມີກົດໝາຍປົກຄອງ 103 ສະບັບ, ອັນໄດ້ເຮັດໃຫ້ການປົກຄອງລັດ, ຄຸ້ມຄອງສັງຄົມດ້ວຍກົດໝາຍໃນຂັ້ນສູນກາງ ແລະທ້ອງຖິ່ນເປັນລະບົບຖືກຕ້ອງ, ເຮັດໃຫ້ສັງຄົມມີຄວາມສະຫງົບ ແລະມີຄວາມເປັນ ລະບຽບຮຽບຮ້ອຍໂດຍພື້ນຖານ, ເສດຖະກິດມີການຂະຫຍາຍຕົວຕໍ່ເນື່ອງ, ການແກ້ໄຂຂໍ້ຂັດແຍ່ງທີ່ມີໃນສັງຄົມຕາມຂະບວນຍຸຕິທຳຖືກຕ້ອງເປັນທຳເປັນກ້າວໆ, ເຖິງ ວ່າ ສປປ ລາວ ຈະມີຄວາມພະຍາຍາມກໍຕາມຍັງເຫັນວ່າການປົກຄອງດ້ວຍກົດໝາຍບໍ່ທັນມີປະສິດທິຜົນເທົ່າທີ່ຄວນໂດຍມີສາເຫດໃນຕົວ ຫຼືນອກຕົວຫຼາຍອັນແຕ່ໜຶ່ງໃນນັ້ນຍ້ອນວ່າ ສປປ ລາວ ຍັງບໍ່ທັນມີກົດໝາຍວ່າດ້ວຍການປົກຄອງ ຫຼືປະມວນກົດໝາຍປົກຄອງ, ຍ້ອນເຫັນໄດ້ຄວາມຈໍາເປັນ ແລະ ຄວາມສໍາຄັນຄືແນວນັ້ນໃນປີ 2020 ສໍານັກງານນາຍົກລັດຖະມົນຕີຈຶ່ງມອບໃຫ້ກະຊວງພາຍໃນເປັນເຈົ້າການປະສານສົມທົບກັບພາກສ່ວນທີ່ກ່ຽວຂ້ອງເພື່ອຄົ້ນຄວ້າ, ຮ່າງກົດໝາຍວ່າດ້ວຍການປົກຄອງໂດຍໄດ້ແຕ່ງຕັ້ງຄະນະຮ່າງກົດໝາຍວ່າດ້ວຍການປົກຄອງທີ່ປະກອບດ້ວຍຜູ້ຕາງໜ້າກະຊວງ, ຂະແໜງການອ້ອມຂ້າງສູນກາງຈຳນວນ 45 ທ່ານ ຊຶ່ງໄດ້ເລີ່ມຄົ້ນຄວ້າ, ຮ່າງກົດໝາຍວ່າດ້ວຍການປົກຄອງໃນເດືອນພະຈິກ 2020, ໄດ້ຜ່ານກອງປະຊຸມຄົ້ນຄວ້າ, ປຶກສາຫາລືຮ່າງກົດໝາຍພາຍໃນຄະນະມາແລ້ວ 4 ຄັ້ງ ໂດຍອີງໃສ່ກົດໝາຍຂອງ ສປປ ລາວ, ກົດໝາຍປົກຄອງຂອງຕ່າງປະເທດຈໍານວນໜຶ່ງ ແລະໄດ້ສໍາເລັດຂັ້ນຕອນຂອງການຄົ້ນຄວ້າຮ່າງກົດໝາຍດັ່ງກ່າວໂດຍພື້ນຖານ ແລະກ້າວສູ່ການທາບທາມຄໍາເຫັນຂອງທົ່ວສັງຄົມໃນຂອບເຂດທົ່ວປະເທດກ່ອນທີ່ຈະນໍາສະເໜີລັດຖະບານ ແລະ ສະພາແຫ່ງຊາດພິຈາລະນາຮັບຮອງເອົາໃນກອງປະຊຸມສະໄໝສາມັນຂອງສະພາແຫ່ງຊາດຊຸດທີ IX ໃນທ້າຍປີ 2022 ທີ່ຈະມາເຖິງນີ້.

ໃນໂອກາດດັ່ງກ່າວປະທານກອງປະຊຸມໄດ້ມີຄຳເຫັນໃຫ້ຜູ້ເຂົ້າຮ່ວມກອງປະຊຸມຍົກສູງຄວາມຮັບຜິດຊອບໃນການທາບທາມປະກອບຄຳເຫັນຢ່າງຕັ້ງໜ້າເພື່ອພ້ອມກັນປະກອບຄໍາເຫັນ, ເຮັດໃຫ້ກົດໝາຍນັບມື້ນັບສົມບູນ, ຮັດກຸມ ແລະສ່ອງແສງເຖິງແນວທາງຂອງພັກ, ມີລັກສະນະຊາດ, ລັກສະນະວິທະຍາສາດ, ລັກສະນະສາກົນໂດຍສອດຄ່ອງກັບສະພາບຄວາມເປັນຈິງ, ຄວາມຮຽກຮ້ອງຕ້ອງການຂອງຊາດ ແລະປະຊາຊົນເຮົາໃນສະເພາະໜ້າ ແລະຍາວນານຕາມທິດນຳພາປະເທດເຮົາກ້າວຂຶ້ນສູ່ຈຸດໝາຍສັງຄົມນິຍົມຢ່າງມີໄຊ.

แชร์