ໄຊຍະບູລີ ສຳມະນາວຽກງານນະໂຍບາຍສົ່ງເສີມການລົງທຶນ

  ສຳມະນາວຽກງານນະໂຍບາຍສົ່ງເສີມການລົງທຶນ ແລະ ເຜີຍແຜ່ບາງນິຕິກຳລຸ່ມກົດໝາຍວ່າດ້ວຍການສົ່ງເສີມການລົງທຶນສະບັບປັບປຸງປີ 2016 ໄດ້ຈັດຂຶ້ນໃນວັນທີ 13 ມີນາ 2019 ທີ່ຫ້ອງປະຊຸມພະແນກແຜນການ ແລະ ການລົງທຶນແຂວງໄຊຍະບູລີ ໃຫ້ກຽດເຂົ້າຮ່ວມເປັນປະທານຂອງ ທ່ານ ເພັງນິລັນ ຄຳພັນເພັງ ຮອງເຈົ້າແຂວງໄຊຍະບູລີ ມີຫົວໜ້າຮອງຫົວໜ້າພະແນກການ, ຮອງເຈົ້າເມືອງ 11 ເມືອງ, ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ.

 ທ່ານ ເພັງນິລັນ ຄຳພັນເພັງ ຮອງເຈົ້າແຂວງໄຊຍະບູລີ ໄດ້ໃຫ້ຮູ້ວ່າ: ລັດຖະບານໄດ້ດຳເນີນນະໂຍບາຍເປີດປະຕູສູ່ພາຍນອກເພື່ອດຶງດູດການລົງທຶນຈາກຕ່າງປະເທດ ແລະສະພາແຫ່ງຊາດກໍໄດ້ຮັບຮອງເອົາກົດຫມາຍວ່າດ້ວຍການສົ່ງເສີມການລົງທຶນຕ່າງປະເທດສະບັບທຳອິດໃນປີ 1989 ນັບຈາກນັ້ນມາກໍ່ໄດ້ມີການປັບປຸງເພື່ອໃຫ້ສອດຄ່ອງກັບສະພາບຕົວຈິງໃນແຕ່ລະໄລຍະຫຼ້າສຸດໃນ ປີ 2016 ພວກເຮົາກໍ່ໄດ້ປັບປຸງເປັນຄັ້ງທີ 4 ຊຶ່ງໄດ້ຜ່ານການຮັບ ຮອງໃນກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດຊຸດ ທີ VIII ໃນວັນທີ 11 ພະຈິກ 2016. ພາຍຫຼັງກົດໝາຍວ່າດ້ວຍການສົ່ງ ເສີມການລົງທຶນສະບັບປັບປຸງປີ 2016 ໄດ້ຖືກຮັບຮອງໂດຍສະພາ ແຫ່ງຊາດ, ກະຊວງແຜນການ ແລະການລົງທຶນໄດ້ຈັດຕັ້ງ ແລະ ຜັນຂະຫຍາຍ ໂດຍສ້າງນິຕິກຳ ລຸ່ມກົດໝາຍຈຳນວນໜຶ່ງເພື່ອໃຫ້ສະດວກໃນການຈັດຕັ້ງປະຕິບັດທີ່ເປັນເອກະພາບໃນຂອບເຂດທົ່ວປະເທດ. ເພື່ອອຳນວຍຄວາມສະດວກແກ່ນັກທຸລະກິດທີ່ຈະມາລົງທຶນຢູ່ ສປປ ລາວ ໃຫ້ມີຄວາມສະດວກສະບາຍ ແລະວ່ອງໄວຂຶ້ນກວ່າເກົ່າ.

  ພ້ອມດຽວກັນນີ້ບັນດາຜູ້ເຂົ້າຮ່ວມຍັງໄດ້ຮັບຟັງບົດແນະນຳວ່າດ້ວຍການໃຫ້ນະໂຍບາຍສົ່ງເສີມການລົງທຶນດ້ານພາສີ ແລະອາກອນມູນຄ່າເພີ່ມສຳລັບແຜນນຳ ເຂົ້າຂອງວິສາຫະກິດ ສະບັບເລກ ທີ 01/ຄລທສ. ລົງໃນວັນທີ 2 ມັງກອນ 2019. ບົດສະເໜີກ່ຽວກັບລະບຽບການ ແລະຂັ້ນຕອນການແຈ້ງພາສີແກ່ບັນດາວິສາຫະກິດທີ່ໄດ້ຮັບນະໂຍບາຍສົ່ງເສີມການລົງທຶນ, ລະບຽບການ ແລະ ຂັ້ນຕອນກ່ຽວກັບການນຳໃຊ້ແບບຟອມແຜນປະຈຳປີຂອງໂຮງງານເຮັດການຜະລິດ (91-97); ດຳລັດວ່າດ້ວຍການຮັບ ຮອງເອົາບັນຊີກິດຈະການຄວບ ຄຸມ ແລະກິດຈະການສຳປະທານ ຂອງ ສປປ ລາວ ສະບັບທີ 03/ນຍ ລົງວັນທີ 10 ມັງກອນ 2019 ຄຳແນະນຳກ່ຽວກັບການພິຈາລະນາອະນຸມັດການລົງທຶນ ແລະ ກົນໄກຄຸ້ມຄອງທີ່ດິນໃຫ້ເຊົ່າ ຫຼື ສຳປະທານສຳລັບປູກພືດກະສິກຳສະບັບເລກທີ 0457/ຫຜທ ລົງ ວັນທີ 27 ກຸມພາ 2019 ຂໍ້ຕົກລົງວ່າດ້ວຍການລົງວາງເງິນຄ້ຳປະກັນສຳລັບກິດຈະກຳສຳປະທານ ສະບັບເລກທີ 2735/ກຜທ, ລົງວັນທີ 2 ພະຈິກ 2018.

  ຈາກນັ້ນຜູ້ເຂົ້າຮ່ວມໄດ້ພ້ອມກັນຄົ້ນຄວ້າແລກປ່ຽນບົດຮຽນ ແລະປະກອບຄຳຄິດຄຳເຫັນບົນພື້ນຖານເງື່ອນໄຂ ແລະສະພາບການຈັດຕັ້ງປະຕິບັດການອະນຸ ມັດໂຄງການລະຫວ່າງຂັ້ນເມືອງ ແລະແຂວງໃຫ້ໄປຕາມສິດພາລະບົດບາດທີ່ກຳນົດໄວ້ໃນກົດໝາຍວ່າດ້ວຍການສົ່ງເສີມການລົງທຶນ ແລະຂອດການຄຸ້ມຄອງ , ການຕິດຕາມກວດກາ,ການປະຕິບັດຂອບເຂດສິດໃນວຽກງານສົ່ງເສີມ ແລະຄຸ້ມຄອງການລົງທຶນໃຫ້ມີຄວາມເປັນເອກະພາບພ້ອມທັງສາມາດຊຸກຍູ້ສົ່ງເສີມໃຫ້ພາກທຸລະກິດສາມາດຄົງຕົວຂະຫຍາຍຕົວໃນສະເພາະໜ້າ ແລະອະນາຄົດຢ່າງແທ້ຈິງ.

ໂດຍ: ບຸນທີ 

แชร์