ຜູ້ປະກອບເສີມທັກສະວາງແຜນເຂົ້າຫາແຫຼ່ງທຶນ

ຂ່າວ: ສີສຸວັນ

ສູນບໍລິການວິສາຫະກິດຂະໜາດນ້ອຍ, ກາງ, ສະພາການຄ້າ ແລະອຸດສາຫະກໍາແຫ່ງຊາດລາວໄດ້ຈັດຝຶກອົບຮົມໃນຫົວຂໍ້ການວາງແຜນທຸລະກິດ-ການວາງແຜນການເງິນ ແລະການບັນຊີເງິນ ສົດສໍາລັບວິສາຫະກິດຂະໜາດນ້ອຍ ແລະກາງ(SME) ເພື່ອສ້າງຄວາມເຂັ້ມແຂງໃຫ້ວິສາຫະກິດຂະໜາດນ້ອຍ ແລະກາງໃນການເຂົ້າເຖິງແຫຼ່ງທຶນໂດຍການເປັນປະທານຮ່ວມຂອງທ່ານ ບຸນສົມ ຄຸນມະນີ ຫົວໜ້າພະແນກອຸດສາຫະກໍາ ແລະການຄ້າແຂວງ, ທ່ານ ຄັດທະພອນພົມ ມະປັນຍາ ຮອງປະທານສະພາການຄ້າ ແລະອຸດສາຫະກໍາແຂວງຫຼວງພະບາງ, ມີບັນດາຫົວໜ່ວຍທຸລະກິດຂະໜາດນ້ອຍແລະກາງພ້ອມດ້ວຍວິທະຍາກອນເຂົ້າຮ່ວມ.

ຈຸດປະສົງຫຼັກກໍ່ເພື່ອແນໃສ່ຜັນຂະຫຍາຍມາດຕາ 15 ຂອງດໍາລັດວ່າດ້ວຍກອງທຶນສົ່ງເສີມ SME ສະບັບເລກທີ 299/ລບ ທັງເປັນການສ້າງເງື່ອນໄຂໃຫ້ທະນາຄານເຂົ້າຮ່ວມໂຄງການບ້ວງເງິນ 200 ຕື້ກີບ ໄດ້ປ່ອຍເງິນໂດຍໄວພ້ອມທັງເປັນການຊ່ວຍເຫຼືອໃຫ້ຫົວໜ່ວຍ SME ສາມາດເຂົ້າເຖິງແຫຼ່ງທຶນທີ່ມີຕົ້ນທຶນຕໍ່າໂດຍເນັ້ນຝຶກອົບຮົມໃນຫົວຂໍ້ “ການວາງແຜນທຸລະກິດ, ການວາງແຜນການເງິນ ແລະການບັນຊີເງິນສົດສຳລັບວິສາຫະກິດຂະໜາດນ້ອຍ ແລະກາງ” ໃຫ້ລູກຄ້າທະນາຄານທີ່ຜ່ານເງື່ອນໄຂກູ້ຢືມ ແລະຝຶກອົບຮົມໃຫ້ຫົວໜ່ວຍ SME ທົ່ວໄປທີ່ຍັງບໍ່ຜ່ານເງື່ອນໄຂກູ້ຢືມເງິນຂອງທະນາຄານແຕ່ນອນໃນ 4 ຂະແໜງການບູລິມະສິດໃນການປ່ອຍສິນ ເຊື່ອ.

   ສໍາລັບແຜນຈະຈັດຝຶກອົບຮົມທັງໝົດ 18 ແຂວງທົ່ວປະເທດເພື່ອໃຫ້ຫົວໜ່ວຍ SME ໃຫ້ເຂົ້າໃຈການເຂົ້າຮ່ວມຝຶກອົບຮົມແມ່ນ 1 ໃນເງື່ອໄຂການປ່ອຍກູ້ຂອງທະນາຄານບ້ວງດອກເບ້ຍຕໍາ 3% ຂອງລັດຖະບານພາຍໃຕ້ໂຄງການຢັ້ງຢືນການຝຶກອົບຮົມໃຫ້ວິສາຫະກິດຂະໜາດນ້ອຍ ແລະກາງເພື່ອເຂົ້າເຖິງແຫຼ່ງທຶນຂອງກົມ ສົ່ງເສີມວິສາຫະກິດຂະໜາດນ້ອຍ ແລະກາງໂດຍການສະໜັບສະໜູນຈາກກອງທຶນສົ່ງເສີມວິສາຫະກິດຂະໜາດນ້ອຍ ແລະກາງກະຊວງອຸດສາຫະກຳ ແລະການຄ້າ.

ຊຸດຝຶກອົບຮົມຄັ້ງນີ້ນອກຈາກທີ່ຈະໄດ້ຮຽນທິດສະດີແລ້ວຜູ້ເຂົ້າຮ່ວມຍັງຈະໄດ້ປະຕິບັດຕົວຈິງໄປພ້ອມໂດຍການນໍາພາສ້າງແຜນທຸລະກິດ ແລະແຜນບັນຊີ-ການເງິນໃຫ້ສົມບູນເພື່ອໃຫ້ບັນດາຫົວໜ່ວຍທຸລະກິດນໍາເອົາໄປໜູນໃຊ້ໃຫ້ເກີດຜົນປະໂຫຍດສູງສຸດ, ຊຶ່ງຈະດໍາເນີນໄປນັບແຕ່ວັນທີ 6-10 ທັນວາ2021 ນີ້ຈິ່ງສໍາເລັດ.

แชร์