ຈຳປາສັກສົ່ງອອກສິນຄ້າກະສິກຳມູນຄ່າເກືອບ 7 ລ້ານໂດລາ

ໃນປີ 2021 ນີ້ນອກຈາກເອົາໃຈໃສ່ໃນການແກ້ໄຂບັນຫາການແຜ່ລະບາດຂອງພະຍາດໂຄວິດ-19 ແລ້ວຈຳປາສັກກໍເປັນອີກແຂວງໄດ້ສຸມໃສ່ການເກັບກ່ຽວເຂົ້ານາປີ; ການສົ່ງອອກສິນຄ້າກະສິກຳ ຈຳນວນ: 7.216 ໂຕນ, ມູນຄ່າ 6.915.681 ໂດລາສະຫະລັດ, ຊຶ່ງປະກອບມີກາເຟ, ກ້ວຍ, ພຶດຜັກ ແລະມັນດ້າງ, ຜະລິດຕະພັນໄມ້ 24 ແມັດກ້ອນ, ມູນຄ່າ 43.279  ໂດລາສະຫະລັດ ແລະການຈັດເກັບລາຍຮັບງົບປະມານຮອດວັນທີ 25 ພະຈິກ 2011 ປະ ຕິບັດໄດ້ 919,20 ຕື້ກີບ.

ວັນທີ 2 ທັນວາ 2021, ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະລັດຖະມົນຕີ-ຮອງລັດຖະມົນຕີໄດ້ເຄື່ອນໄຫວວຽກງານຢູ່ແຂວງຈໍາປາສັກ, ໂດຍເປັນກຽດກ່າວຕ້ອນຮັບຂອງທ່ານ ສາຍທອງ ໄຊຍະວົງ ຮອງເລຂາພັກແຂວງປະທານສະພາປະຊາຊົນແຂວງ, ມີທ່ານ ໂສມ ບຸດຕະ ກຸນ ຄະນະປະຈຳພັກແຂວງຮອງເຈົ້າ ແຂວງຈໍາປາສັກ ພ້ອມຄະນະນຳຂອງ ແຂວງຈຳປາສັກເຂົ້າຮ່ວມ.

ທ່ານ ໂສມ ບຸດຕະກຸນ ຮອງເຈົ້າແຂວງຈໍາປາສັກຕາງໜ້າໃຫ້ຄະນະນຳແຂວງໄດ້ລາຍງານສະພາບການປ້ອງກັນ, ຄວບຄຸມ ແລະສະກັດກັ້ນການລະບາດຂອງພະຍາດໂຄວິດ-19 ຢູ່ແຂວງຈຳປາສັກ, ສະພາບການລະບາດປະຈຸບັນຈຳນວນຜູ້ຕິດເຊື້ອສະສົມທົ່ວແຂວງມີ 7,088 ຄົນ,ຍິງ 3,501 ຄົນ ໃນນັ້ນຕິດເຊື້ອນຳແຮງງານ 3.865 ຄົນ ເທົ່າກັບ 55%, ຕິດເຊື້ອພາຍໃນ 3,223 ຄົນ ເທົ່າກັບ 45%, ສະເພາະເດືອນພະຈິກ ມີຜູ້ຕິດເຊື້ອທັງໝົດ 1,592 ຄົນ ໃນນັ້ນຕິດເຊື້ອໃນຊຸມຊົນ 1,577 ຄົນ, ຕິດເຊື້ອນໍ້າແຮງງານ 15 ຄົນ, ປິ່ນປົວຫາຍດີສະສົມ 6,177 ຄົນ, ຍັງສືບຕໍ່ປິ່ນປົ່ວ 902 ຄົນ,ໃນນັ້ນປິ່ນປົວຢູ່ໂຮງໝໍສະໜາມ 194 ຄົນ, ປິ່ນປົວຢູ່ເຮືອນ 610 ຄົນ ແລະເສຍຊີວິສະສົມ 10 ກໍລະນີ.

ສຳລັບການສັກວັກຊີນພາຍໃນແຂວງຈໍາປາສັກ ມາຮອດປະຈຸບັນເຂັ້ມທີ 1 ສາມາດບັນລຸໄດ້ 53,5% ແລະເຂັ້ມທີ 2 ສາມາດບັນລຸໄດ້ 42,1%, ສະເພາະນະຄອນປາກເຊເຂດທີ່ມີພົນລະເມືອງໜາແໜ້ນເຂັມທີ 1 ສາມາດບັນລຸໄດ້ 85% ແລະເຂັ້ມ 2 ສາມາດບັນລຸໄດ້ 73%.

ດ້ານເສດຖະກິດໄດ້ສຸມໃສ່ການເກັບກ່ຽວເຂົ້ານາປີ; ການສົ່ງອອກສິນຄ້າກະສິກຳຈຳນວນ: 7.216 ໂຕນ, ມູນຄ່າ6.915.681 ໂດລາສະຫະລັດ, ຊຶ່ງປະກອບມີ ກາເຟ, ກ້ວຍ, ພຶດຜັກ ແລະມັນດ້າງ, ຜະລິດຕະພັນໄມ້ 24 ແມັດກ້ອນ, ມູນຄ່າ43.279 ໂດລາສະຫະລັດ. ແລະການຈັດເກັບລາຍຮັບງົບປະມານຮອດວັນທີ 25 ພະຈິກ 2011 ປະຕິບັດໄດ້ 919,20 ຕື້ກີບ.

ໂອກາດນີ້, ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ຊຶ່ງທ່ານໄດ້ຍ້ອງຍໍຊົມເຊີຍຕໍ່ກັບຜົນສຳເລັດຂອງຄະນະພັກ-ອົງການປົກຄອງແຂວງທີ່ຍາດມາໄດ້ໂດຍສະເພາະການຮັບມືກັບການຄວບຄຸມສະພາບການລະບາດຂອງພະຍາດໂຄວິດ-19 ໄດ້ດີສົມຄວນ.

ພ້ອມກັນນັ້ນກໍ່ຕ້ອງເຊື່ອມຊຶມຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ຜັນຂະຫຍາຍວາລະແຫ່ງຊາດມາເປັນວາລະຂອງແຂວງຖືເອົາວຽກງານການແກ້ໄຂບັນຫາປາກົດການຫຍໍ້ທໍ້ໃນສັງຄົມເປັນວຽກບູລິມະສິດ; ສຳລັບວຽກງານປ້ອງກັນ, ຄວບຄຸມ ແລະສະກັດກັ້ນການລະບາດຂອງພະຍາດໂຄວິດ-19 ກໍ່ຕ້ອງສະຫຼຸບຕີລາຄາແຕ່ລະໄລຍະເພື່ອຖອດຖອນບົດຮຽນໃນການຈັດຕັ້ງໃຫ້ສອດຄ່ອງກັບສະພາບຕົວຈິງ ແລະແກ້ໄຂຢ່າງມີປະສິດທິພາບປະສິດທິຜົນໂດຍເພີ່ມຄວາມເອົາໃຈໃສ່ໃນການຊີ້ນຳ-ບັນຊາການຈັດຕັ້ງຕ່າງໆເຜີຍແຜ່ແນວທາງນະໂຍບາຍຂອງພັກ-ລັດ ໃນການຄວບຄຸມພະຍາດ COVID-19 ດ້ວຍຮູບການ ແລະວິທີການຕ່າງໆໂຄສະນາປະຊາສຳພັນ ເພື່ອໃຫ້ທຸກການຈັດຕັ້ງ ແລະບຸກຄົນຮັບຮູ້ເຂົ້າໃຈຄວາມຈໍາເປັນ ແລະຄວາມສໍາຄັນຕໍ່ວຽກງານດັ່ງກ່າວທັງເຂົ້າຮ່ວມໃນຂະບວນການສັກວັກຊີນກັນພະຍາດ COVID-19 ໃຫ້ບັນລຸຄາດໝາຍເພື່ອກະກຽມຄວາມພ້ອມດ້ານມາດຕະການຕ່າງໆ ເພື່ອເປີດປະເທດຟື້ນຟູການທ່ອງທ່ຽວ.

แชร์