ໄຟຟ້າສາຂາຫຼວງພະບາງ ສັບຊ້ອນພະນັກງານ

ຂ່າວ: ສີສຸວັນ
ວ່າງບໍ່ດົນມານີ້ລັດວິສາຫະກິດໄຟຟ້າລາວສາຂາແຂວງຫຼວງພະບາງ ໄດ້ຈັດພິທີປະກາດແຕ່ງຕັ້ງສັບຊ້ອນພະນັກງານນໍາພາຂັ້ນຄະນະຫ້ອງການ ແລະຄະນະສູນບໍລິການໄຟຟ້າໃນສາຂາແຂວງຫຼວງພະບາງ ທີ່ຂຶ້ນກັບຝ່າຍລະບົບຈໍາໜ່າຍເຊິ່ງຈັດຂຶ້ນທີ່ຫ້ອງປະຊຸມລັດວິສາຫະກິດໄຟຟ້າລາວສາຂາແຂວງຫຼວງພະບາງໂດຍການເປັນປະທານຂອງ ທ່ານ ບຸນທັນ ພັນໂດລັກ ຫົວໜ້າລັດວິສາຫະກິດໄຟຟ້າລາວສາຂາແຂວງຫຼວງພະບາງ, ມີບັນດາຫົວໜ້າຫ້ອງການ, ຫົວໜ້າໜ່ວຍງານຕະຫຼອດຮອດພະນັກ ງານພາຍ ໃນສູນບໍລິການໄຟຟ້ານະຄອນຫຼວງພະບາງເຂົ້າຮ່ວມ.
ໃນພິທີທາງຄະນະຈັດຕັ້ງຫ້ອງການໄດ້ຂຶ້ນຜ່ານຂໍ້ຕົກລົງຂອງລັດວິສາຫະກິດໄຟຟ້າລາວເລກທີ 3612/ຟຟລ.ຝຈບ ລົງວັນທີ 21 ເດືອນກັນຍາ 2021 ວ່າດ້ວຍການແຕ່ງຕັ້ງສັບຊ້ອນພະນັກງານນໍາພາຂັ້ນຄະນະຫ້ອງການ ແລະຄະນະສູນບໍລິການໄຟຟ້າໃນສາຂາແຂວງຫຼວງພະບາງທີ່ຂຶ້ນກັບຝ່າຍລະບົບຈໍາໜ່າຍລັດວິສາຫະກິດໄຟຟ້າລາວເຊິ່ງປະກອບດ້ວຍ 07ຫ້ອງການ, 12 ສູນບໍລິການທົ່ວແຂວງຄື: ຫ້ອງການກວດກາ,ຫ້ອງການຈັດຕັ້ງແລະບໍລິຫານ,ຫ້ອງການແຜນການ-ການເງິນ,ຫ້ອງການບັນຊີ, ຫ້ອງການວາງແຜນລະບົບ ແລະມາດຕະຖານເຕັກນິກ, ຫ້ອງການຄຸ້ມຄອງລະບົບແລະບໍລິການ, ສໍາລັບຫ້ອງການຈັດຕັ້ງ ແລະບໍລິຫານໄດ້ແຕ່ງຕັ້ງ ທ່ານ ຄໍາຮັກ ວໍລະກຸນ ເປັນວ່າການຫົວໜ້າຫ້ອງການຈັດຕັ້ງ ແລະ ບໍລິຫານ ແລະ ແຕ່ງຕັ້ງ ທ່ານ ຄອນສະຫວັນ ສິລິວັນ ເປັນຮອງ ແລະ ສູນບໍລິການນະຄອນຫຼວງແມ່ນໄດ້ແຕ່ງຕັ້ງທ່ານ ບຸນເຖີງ ຊາວະດີ ເປັນຫົວໜ້າສູນ, ແຕ່ງຕັ້ງ ທ່ານ ຄໍາແພງ ຜາລິວັນ ເປັນຮອງ ແລະໃນການແຕ່ງຕັ້ງ-ສັບຊ້ອນ ພະນັກງານນໍາພາຄັ້ງນີ້ກໍຈະເປັນນິມິດໝາຍອັນດີເພາະຈະຊ່ວຍໃຫ້ໃນການເຮັດວຽກເປັນລະບົບສະດວກດີຂຶ້ນອີກກ້າວໜຶ່ງທັງເປັນການເຕີມເຕັມໃຫ້ລະບົບການຈັດຕັ້ງຂອງລັດວິສາຫະກິດໄຟຟ້າລາວສາຂາແຂວງຫຼວງພະບາງ ຄົບຖ້ວນສົມບູນ ແລະເຮັດວຽກເປັນໝູ່ຄະນະໃຫ້ມີຜົນສໍາເລັດທາງດ້ານວິຊາສະເພາະດີຂຶ້ນໄປເທື່ອລະກ້າວ.
ພ້ອມນີ້ທ່ານ ບຸນທັນ ພັນໂດລັກ ຫົວໜ້າລັດວິສາຫະກິດໄຟຟ້າລາວສາຂາແຂວງຫຼວງພະບາງຍັງໄດ້ມີຄໍາເຫັນຊີ້ນໍາຕໍ່ພິທີໂດຍທ່ານໄດ້ເນັ້ນໃຫ້ຜູ້ທີ່ຖືກສັບຊ້ອນ, ແຕ່ງຕັ້ງໄດ້ຮັບໜ້າທີ່ໃໝ່ຈົ່ງຍົກສູງຄວາມຮັບຜິດຊອບຂອງຕົນນໍາພາທິມງານໝູ່ຄະນະຕັ້ງໜ້າເຮັດວຽກໃຫ້ມີຜົນສໍາເລັດຍິ່ງໃຫຍ່ກວ່າເກົ່າ.

แชร์