ກຳປູເຈຍ ມອບວັກແຊງຊີໂນແວັກ 5 ແສນໂດສ, ລົດ 3 ຄັນໃຫ້ລາວ

ລັດຖະບານ ແລະປະຊາຊົນແຫ່ງ ຣາຊະອານາຈັກກໍາປູເຈຍໄດ້ມອບວັກຊິນຊີໂນແວັກ (Sinovac) ຈໍານວນ 5 ແສນໂດສ ແລະລົດຂົນສົ່ງວັກຊິນຈຳນວນ 3 ຄັນ ໃຫ້ແກ່ລັດຖະບານ ແລະປະຊາຊົນລາວ ເພື່ອນໍາໃຊ້ເຂົ້າໃນການຕ້ານ ແລະສະກັດກັ້ນ ການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ.
ພິທີມອບ-ຮັບ ໄດ້ມີຂຶ້ນໃນວັນທີ 3 ທັນວານີ້ທີ່ດ່ານຊາຍແດນສາກົນໜອງນົກຂຽນ-ຕຣາປຽກຣຽນ. ຕາງໜ້າໃຫ້ແກ່ລັດຖະບານແຫ່ງຣາຊະອານາຈັກກໍາປູເຈຍກ່າວມອບໂດຍ ທ່ານ ມອມ ບຸນເຮັງ ລັດຖະມົນຕີກະຊວງສາທາລະນະສຸກ ແລະຕາງໜ້າໃຫ້ແກ່ລັດຖະບານແຫ່ງ ສປປ ລາວ ກ່າວຮັບໂດຍທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກໂດຍໃຫ້ກຽດເຂົ້າຮ່ວມເປັນສັກຂີພິຍານຂອງ ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ແຫ່ງ ສປປ ລາວ ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຂັ້ນສູນກາງ, ພ້ອມດ້ວຍຄະນະນໍາທີ່ມາຈາກສູນກາງ ແລະທ້ອງຖິ່ນຂອງທັງສອງຝ່າຍ.
ທ່ານ ມອມ ບຸນເຮັງ ກ່າວວ່າ: ການປະກອບສ່ວນມອບວັກຊິນປ້ອງກັນພະຍາດໂຄວິດ-19 ແລະລົດຂົນສົ່ງວັກຊິນ ໃນມື້ນີ້, ເພື່ອເປັນການສະກັດກັ້ນການແຜ່ລະບາດຂອງພະຍາດໂຄວິດ-19 ໃນປະເທດລາວຊຶ່ງເປັນນໍ້າຈິດນໍ້າໃຈໃນນາມເປັນອ້າຍນ້ອງ ແລະຄວາມສະໝານສາມັກຄີຂອງປະຊາຊົນສອງຊາດ ກຳ​ປູ​ເຈຍ-ລາວ. ເພື່ອການນໍາມາຊຶ່ງສັນຕິພາບຄວາມຍືນຍົງ ແລະຄວາມສະຫງົບສຸກຂອງສອງຊາດ.
ໂອກາດນີ້, ທ່ານ ບຸນແຝງ ພູມມະໄລສິດ ກ່າວວ່າ: ໃນນາມຕາງໜ້າລັດຖະບານ ແລະປະຊາຊົນແຫ່ງສາທາລະນະລັດ ປະຊາທິປະໄຕ ປະຊາຊົນລາວ, ຂ້າພະເຈົ້າຂໍສະແດງຄວາມຂອບໃຈຢ່າງສູງໄປຍັງລັດຖະບານແລະປະຊາຊົນກຳປູເຈຍອ້າຍນ້ອງໂດຍສະເພາະແມ່ນສົມເດັດ ເຕໂຈ ຮຸນແຊນ ນາຍົກລັດຖະມົນຕີແຫ່ງຣາຊະອານາຈັກກໍາປູເຈຍທີ່ໄດ້ມີຄວາມເອົາໃຈໃສ່, ເປັນຫ່ວງເປັນໃຍ ແລະໄດ້ໃຫ້ການຊ່ວຍເຫຼືອອັນມີຄ່າແກ່ລັດຖະບານກໍຄືປະຊາຊົນລາວໂດຍຕະຫຼອດມາ ແລະການຊ່ວຍເຫຼືອໃນມື້ນີ້ເປັນຄັ້ງທີ 3 ທີ່ລັດຖະບານ ແລະປະຊາຊົນແຫ່ງຣາຊະອານາຈັກກຳປູເຈຍໄດ້ໃຫ້ການຊ່ວຍເຫຼືອແກ່ລັດຖະບານ ແລະປະຊາຊົນລາວ.
(ຂ່າວ-ພາບ: ທັດຊະນະ)

แชร์