ເບີກໂຊກໄຊຍະມຸງຄຸນ ເສັ້ນທາງລົດໄຟລາວ-ຈີນ

 ການນຳພັກ-ລັດ ຂອງ ສປປ ລາວ ນຳໂດຍ ທ່ານ ພັນຄຳ ວິພາວັນ ນາຍົກລັດຖະມົນຕີພ້ອມດ້ວຍບັນດາພາກສ່ວນກ່ຽວຂ້ອງເຂົ້າຮ່ວມພິທີເບີກໂຊກໄຊມຸງຄຸນເສັ້ນທາງລົດໄຟລາວ-ຈີນ ທີ່ສະຖານີລົດໄຟນະຄອນຫຼວງວຽງຈັນ ໃນວັນທີ 2 ທັນວານີ້ເພື່ອກຳຈັດປັດເພີກສິ່ງບໍ່ດີທີ່ມີຢູ່ໃນສະຖານທີ່, ວັດຖຸ, ບຸກຄົນນັ້ນໆໃຫ້ອອກໄປ ເພື່ອຄວາມເປັນສິຣິມຸງຄຸນໃຫ້ທາງລົດໄຟລາວ-ຈີນ ໄດ້ດຳເນີນໄປຢ່າງລາບລື່ນ ແລະສັນຕິສຸກ.

ໃນພິທີເບີກໂຊກໄຊຍະມຸງຄຸນ, ທ່ານນາຍົກລັດຖະມົນຕີໄດ້ຂຶ້ນໄຕ້ທູບທຽນບູຊາພຣະຣັດຕະນະໄຕ, ຈາກນັ້ນ, ກໍ່ໄດ້ລັ່ນຄ້ອງ 9 ບາດ ເພື່ອຄວາມເປັນສິຣິມຸງຄຸນ. ພຣະອາຈານໃຫຍ່ມາຫາບຸນມາ ສີມພາພົມ ປະທານ ສູນກາງອົງການພຸດທະສາສະໜາສຳພັນ ແຫ່ງ ສປປລາວ ແລະຄະນະສົງ 19 ອົງ ໄດ້ສູດປະຣິດຕະມະຫາມຸງຄຸນໄຊຫຼວງ ຫຼືສູດມະຫາໄຊຍະມຸງຄຸນຫຼວງເພື່ອກຳຈັດປັດເພີກສິ່ງບໍ່ດີທີ່ມີຢູ່ໃນສະຖານທີ່, ວັດຖຸ, ບຸກຄົນນັ້ນໆໃຫ້ອອກໄປເພື່ອຄວາມເປັນສິຣິມຸງຄຸນໃຫ້ດຳເນີນໄປໄດ້ຢ່າງລາບລື່ນ ແລະສັນຕິສຸກ, ເພື່ອເສີມສ້າງບຸນຍາປາຣະມີໃຫ້ແກ່ຜູ້ເຂົ້າຮ່ວມໃນງານພິທີ, ເພື່ອນຳເອົາພຣະຄຳສອນໃນບໍວອນພຣະພຸດທະສາສະໜາມາເຜີຍແຜ່ໃຫ້ແກ່ອອກຕົນຍາດໂຍມ.

ຈາກນັ້ນ, ທ່ານນາຍົກລັດຖະມົນຕີກໍ່ໄດ້ເຄນກັນບູຊາທຳມະເທດສະໜາກໍ່ຄືການເຄນບ້າງປັດໄຈໃຫ້ແກ່ອົງເທດສະແດງທຳເພື່ອເປັນການບູຊາທຳຂອງພຣະພຸດທະເຈົ້າ ທີ່ອົງເທດສິໜາທຳຍົກຂຶ້ນມາບັນຍາຍໃຫ້ອອກຕົນຍາດໂຍມຟັງ ແລະກໍ່ໄດ້ເຄນບ້າງປັດໄຈບູຊາທຳແກ່ພຣະສົງສູດມຸງຄຸນ, ບັນດາຜູ້ເຂົ້າຮ່ວມພິທີກໍ່ໄດ້ຮັບຄຳຄາລະວະ-ຮັບພອນ-ຢາດນໍ້າ.

ໃນພິທີ, ຄະນະພຣະສົງກໍ່ໄດ້ພົມນໍ້າມົນໃສ່ລົດໄຟລາວ-ຈີນ ແລະສະຖານີລົດໄຟນະຄອນຫຼວງວຽງຈັນຊຶ່ງພາຍຫຼັງພິທີສຳເລັດທ່ານນາຍົກລັດຖະມົນຕີພ້ອມດ້ວຍການນຳພັກ-ລັດ ເຮົາກໍ່ໄດ້ເຂົ້າຢ້ຽມຊົມລົດໄຟ ແລະສະຖານີລົດໄຟເພື່ອເບິ່ງຄວາມພ້ອມທີ່ຈະເປີດນຳໃຊ້ຢ່າງເປັນທາງການໃນວັນທີ 3 ທັນວານີ້.

แชร์