ຫຼວງພະບາງສະຫຼຸບວຽກປະຈໍາປີ

ຂ່າວ: ສີສຸວັນ

ໃນລະຫວ່າງວັນທີ 29-30 ພະຈິກ 2021 ນີ້ ອົງການປົກຄອງແຂວງຫຼວງພະບາງໄດ້ຈັດກອງປະຊຸມສະຫຼຸບວຽກງານປະຈໍາປີ 2021 ຂຶ້ນເພື່ອຕີລາຄາການຈັດຕັ້ງປະຕິບັດວຽກງານໃນໄລຍະຜ່ານມາໂດຍການເປັນປະທານຂອງ ທ່ານ ຄໍາຂັນ ຈັນທະວີສຸກ ເຈົ້າແຂວງໆ ຫຼວງພະບາງ, ມີບັນດາຫົວໜ້າພະແນກການຂອງແຂວງ, ຫ້ອງການສະພາ, ກົມກອງອ້ອມຂ້າງແຂວງເຂົ້າຮ່ວມ.

ທ່ານ ຄໍາຂັນ ຈັນທະວີສຸກ ເຈົ້າແຂວງໆຫຼວງພະບາງ ກ່າວວ່າ: ກອງປະຊຸມປະຈໍາປີຄັ້ງນີ້ແມ່ນສຸດທີ່ມີຄວາມໝາຍຄວາມສໍາຄັນເພາະວ່າຈະໄດ້ພ້ອມກັນສະຫຼຸບຕີລາ ຄາວຽກແຕ່ລະຂົງເຂດທີ່ຕົນຮັບຜິດຊອບປະຈໍາປີ 2021, ພ້ອມນີ້ຍັງໄດ້ຮັບຟັງບົດລາຍງານຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 9 ເດືອນ, ວຽກງານຈຸດສຸມ 3 ເດືອນທ້າຍປີ 2021 ແລະທິດທາງແຜນການປີ 2022, ຮັບຟັງບົດລາຍງາການຈັດຕັ້ງປະຕິບັດແຜນງົບປະມານລາຍຮັບ-ລາຍຈ່າຍ 10 ເດືອນ, ວຽກງານຈຸດສຸມ 2 ເດືອນທ້າຍປີ ແລະທິດທາງແຜນການປີ 2022, ຮັບຟັງການລາຍງານການກະກຽມການຟື້ນຟູການທ່ອງທ່ຽວຫຼັງການລະບາດຂອງພະຍາດໂຄວິດ- 19, ຜ່ານນິຕິກໍາໃຕ້ກົດໝາຍວ່າດ້ວຍວ່າດ້ວຍການສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະຂະໜາດກາງແຂວງຫຼວງພະບາງ, ນິຕິກໍາໃຕ້ກົດໝາຍວ່າດ້ວຍການສ້າງເຂດ ແລະກໍານົດລາຄາປະເມີນທີ່ດິນ 8 ເມືອງ, ຜ່ານຮ່າງແຜນຈັດສັນທີ່ດິນ, ຄຸ້ມຄອງຊັບພະຍາກອນທໍາມະຊາດ ແລະສິ່ງແວດລ້ອມ, ຮັບຟັງການຜ່ານນິຕິກໍາໃຕ້ກົດໝາຍວ່າດ້ວຍການຄຸ້ມຄອງການປູກຫຍ້າລ້ຽງສັດ. ຫຼັງຈາກນັ້ນກໍຈະໄດ້ພ້ອມກັນປະກອບຄໍາຄິດເຫັນແລກປ່ຽນຮ່ວມກັນຢ່າງກົງໄປກົງມາ ແລະວາງທິດທາງແຜນການປີຕໍ່ໄປເພື່ອແກ້ໄຂຈຸດຄົງຄ້າງໃຫ້ສໍາເລັດໄປເທື່ອລະກ້າວ.

ໃນຕອນທ້າຍກອງປະຊຸມຍັງຈະໄດ້ຮັບຟັງຄໍາເຫັນຊີ້ນໍາຈາກທ່ານປະທານກອງປະຊຸມຕື່ມອີກເພື່ອນໍາໄປຈັດຕັ້ງຜັນຂະຫຍາຍເນື້ອໃນຈິດໃຈກອງປະຊຸມຄັ້ງນີ້ໃຫ້ມີຜົນສໍາເລັດ.

 

แชร์