ນໍາສະເໜີປຶ້ມ 60 ປີ ທູດລາວ-ຈີນ

ຂ່າວ: ກະຊວງການຕ່າງປະເທດ

 ໃນຕອນເຊົ້າຂອງວັນທີ 1 ທັນວາ 2021, ສະຖາບັນການຕ່າງປະເທດກະຊວງການຕ່າງປະເທດໄດ້ຈັດພິທີນໍາສະເໜີປຶ້ມ “60 ປີ ການພົວພັນການທູດລາວ-ຈີນ” ຢ່າງເປັນທາງການພາຍໃຕ້ການເປັນປະທານຂອງທ່ານ ສະເຫຼີມໄຊ ກົມມະສິດ ກໍາມະການກົມການເມືອງສູນກາງພັກລັດຖະມົນຕີກະຊວງການຕ່າງປະເທດ, ມີພາກສ່ວນກ່ຽວຂ້ອງ ແລະແຂກຖືກເຊີນເຂົ້າຮ່ວມ.

ພິທີນໍາສະເໜີປຶ້ມ “60 ປີ ການພົວພັນການທູດ ລາວ-ຈີນ” ແມ່ນໜຶ່ງໃນກິດຈະກໍາເພື່ອປະກອບສ່ວນເຂົ້າໃນການສ້າງຂະບວນການສະເຫຼີມສະຫຼອງວັນສ້າງຕັ້ງສາຍພົວພັນການທູດ ລະຫວ່າງລາວ- ຈີນ ຄົບຮອບ 60 ປີ (25 ເມສາ 1961- 25 ເມສາ 2021), ປີມິດຕະພາບ ລາວ-ຈີນ ພ້ອມທັງເປັນການສະເຫຼີມສະຫຼອງວັນສະຖາປະນາ ສປປ ລາວ ຄົບຮອບ 46 ປີ ແລະການເປີດນໍາໃຊ້ເສັ້ນທາງລົດໄຟທີ່ທັນສະໄໝຂອງ ລາວ-ຈີນ ທີ່ມີຄວາມໝາຍທາງດ້ານປະຫວັດສາດ, ປຶ້ມດັ່ງກ່າວແມ່ນຜົນງານການຮຽບຮຽງຂອງສະຖາບັນການຕ່າງປະເທດທີ່ໄດ້ສັງລວມເອົາບັນດາໝາກຜົນ ແລະຜົນງານອັນໂດດເດັ່ນຂອງການພົວພັນ ແລະ ຮ່ວມມື ລາວ -ຈີນ ໃນຂະແໜງການຕ່າງໆ ຂອງທັງສອງພັກ-ສອງລັດ, ສະພາແຫ່ງຊາດ ແລະ ສາມອົງການຈັດຕັ້ງມະຫາຊົນໃນໄລຍະກ່ອນ ແລະ ຫຼັງສະຖາປະນາ ສປປ ລາວ ຊຶ່ງໄດ້ຮັບການຊຸກຍູ້ສົ່ງເສີມໃຫ້ກ້າວເຂົ້າສູ່ລວງເລິກ ແລະ ລວງກວ້າງຢ່າງບໍ່ຢຸດຢັ້ງທັງໃນຂອບສອງຝ່າຍ ແລະ ຫຼາຍຝ່າຍບົນພື້ນຖານມູນເຊື້ອການພົວພັນຮ່ວມມືອັນດີລະຫວ່າງ ລາວ-ຈີນ, ການເປັນຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານຕາມທິດ 4 ດີ ແລະການສ້າງຄູ່ຮ່ວມຊາຕາກໍາລາວ-ຈີນ, ຈີນ-ລາວ.

ປຶ້ມ “60 ປີ ການພົວພັນການທູດ ລາວ- ຈີນ” ໄດ້ເລີ່ມລົງມືຄົ້ນຄວ້າຮຽບຮຽງມາແຕ່ທ້າຍປີ 2020, ພາຍໃຕ້ຄວາມເອົາໃຈໃສ່ຊີ້ນໍາຢ່າງໃກ້ຊິດຈາກຄະນະນໍາກະຊວງການຕ່າງປະເທດກໍ່ຄືຄະນະບັນນາທິການກິດຕິມະສັກ, ນັກການທູດອາວຸໂສ ແລະຄະນະບັນນາທິການຂອງສະຖາບັນການຕ່າງປະເທດທີ່ມີປະສົບການ ແລະເຄີຍເຮັດວຽກຕົວຈິງໃນການສົ່ງເສີມການພົວພັນຮ່ວມມືລາວ-ຈີນ ໃນໄລຍະຜ່ານມາ, ໂດຍໄດ້ຮັບການຮ່ວມມືຈາກບັນດາກະຊວງ, ອົງການຈັດຕັ້ງທີ່ກ່ຽວຂ້ອງໃນການສະໜອງຂໍ້ ມູນຕ່າງໆ, ການຈັດພິມປຶ້ມ “60 ປີ ການພົວພັນການທູດ ລາວ-ຈີນ” ໃນຄັ້ງນີ້ແມ່ນໄດ້ຮັບການສະໜັບສະໜູນທາງດ້ານງົບປະມານຈາກສະຖານເອກອັກຄະລັດຖະທູດ ແຫ່ງ ສປ ຈີນ ປະຈໍາ ສປປ ລາວ ໃນຂອບຂອງໂຄງການຄົ້ນຄວ້າຮ່ວມ ລາວ-ຈີນ ທີ່ມີໜ່ວຍງານຕັ້ງຢູ່ສະຖາບັນການຕ່າງປະເທດສົມທົບກັບງົບປະມານຂອງກະຊວງການຕ່າງປະເທດຊຶ່ງເຮັດໃຫ້ການຮຽບຮຽງເນື້ອ ໃນຂອງປຶ້ມດັ່ງກ່າວ ມີຜົນສຳເລັດຢ່າງ ຈົບງາມ ແລະ ສາມາດຈັດພິມຄັ້ງທໍາອິດ ຈໍານວນ 1.000 ຫົວອອກສູ່ສາຍຕາຜູ້ອ່ານ, ປຶ້ມຫົວດັ່ງກ່າວຈະເປັນແຫຼ່ງຂໍ້ມູນທີ່ເປັນປະໂຫຍດສໍາລັບນັກກາທູດ, ນັກຄົ້ນຄວ້າ, ນັກຮຽນຮູ້ປັນຍາຊົນກໍ່ຄືຜູ້ອ່ານທົ່ວໄປທີ່ມີຄວາມສົນໃຈກ່ຽວກັບ ປະຫວັດຄວາມເປັນມາ ແລະການເຕີບໃຫຍ່ຂະຫຍາຍຕົວຂອງການພົວພັນ ລາວ-ຈີນ ແນໃສ່ເປັນບ່ອນອີງທີ່ສໍາຄັນໃນການສຶກສາ ແລະຄົ້ນຄວ້າວິໄຈເພື່ອສົ່ງເສີມການພົວພັນຮ່ວມມືລາວ-ຈີນ ໃນຕໍ່ໜ້າ.

ໃນໂອກາດດັ່ງກ່າວນີ້, ຍັງໄດ້ມີການເປີດຕົວປຶ້ມ “ການເຊື່ອມໂຍງຂອງສອງຊາດໂດຍຜ່ານເສັ້ນທາງລົດໄຟລາວ-ຈີນ” ຢ່າງເປັນທາງການຊຶ່ງແມ່ນຜົນງານການຄົ້ນຄວ້າຮຽບຮຽງຂອງໜ່ວຍງານຄົ້ນຄວ້າ, ໂຄງການຄົ້ນຄວ້າຮ່ວມລາວ-ຈີນ ທີ່ໄດ້ຄົ້ນຄວ້າ-ວິໄຈ ຜົນປະໂຫຍດດ້ານຕ່າງໆທີ່ຈະໄດ້ຮັບຈາກການນຳໃຊ້ເສັ້ນທາງລົດໄຟ, ພ້ອມດຽວກັນນັ້ນຍັງໄດ້ສຶກສາກ່ຽວກັບການກະກຽມຄວາມພ້ອມດ້ານຕ່າງໆຂອງ ສປປ ລາວ ໂດຍສະເພາະແມ່ນບາງແຂວງທີ່ມີເສັ້ນທາງລົດໄຟແລ່ນຜ່ານທັງໃນໄລຍະກ່ອນ ແລະຫຼັງເປີດນຳໃຊ້ເສັ້ນທາງລົດໄຟເພື່ອນຳເອົາຜົນປະໂຫຍດອັນສູງສຸດມາສູ່ ສປປ ລາວ ໃນການເຊື່ອມໂຍງ-ເຊື່ອມ ຈອດກັບພາກພື້ນ ແລະສາກົນ.

แชร์