ເຈົ້າແຂວງຫຼວງພະບາງຢ້ຽມຢາມສະຖານີທາງລົດໄຟລາວ-ຈີນ

ຂ່າວ: ສີສຸວັນ

 ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງພ້ອມດ້ວຍບັນດາຄະນະຫົວໜ້າພະແນກການ-ກົມກອງທີ່ກ່ຽວຂ້ອງອ້ອມຂ້າງແຂວງໄດ້ໄປຢ້ຽມຢາມສະຖານີຂົນສົ່ງໂດຍສານທາງລົດໄຟລາວ-ຈີນ ໃນການກຽມຄວາມພ້ອມທີ່ຕັ້ງຢູ່ບ້ານພິກນະຄອນຫຼວງພະບາງ, ແຂວງຫຼວງພະບາງໄດ້ສ້າງສໍາເລັດເປັນທີ່ຮຽບຮ້ອຍຊຶ່ງຮັບເໝົາກໍ່ສ້າງໂດຍກຸ່ມບໍລິສັດກໍ່ສ້າງທາງລົດໄຟ ສປ ຈີນ.

ຈຸດປະສົງໃນການລົງຢ້ຽມຢາມສະຖານີຄັ້ງນີ້ກໍ່ແມ່ນເພື່ອກວດກາຄວາມພ້ອມໃຫ້ແກ່ການເປີດນໍາໃຊ້ເສັ້ນທາງລົດໄຟຟ້າ ລາວ-ຈີນ ຢ່າງເປັນທາງການພ້ອມກັບວັນສໍາຄັນຂອງລາວກໍ່ຄືວັນຊາດທີ 2 ທັນວາ ຄົບຮອບ 46 ປີ, ຊຶ່ງໃນການລົງຢ້ຽມຢາມຄັ້ງນີ້ໂດຍເປັນກຽດຕ້ອນຮັບຂອງທ່ານ ຫຼີຈືກົງ ຫົວໜ້າກົງສູນໃຫຍ່ ສປ ຈີນ ປະຈໍາແຂວງຫຼວງພະບາງ ພ້ອມຄະນະທິມງານບໍລິສັດຮັບເໝົາກໍ່ສ້າງ ແລະໄດ້ຮັບຟັງລາຍງານຜົນສໍາເລັດຂອງການກໍ່ສ້າງ, ຊຶ່ງສະພາບໂດຍລວມຂອງສະຖານີຫຼວງພະບາງ ການກໍ່ສ້າງຕົບແຕ່ງແມ່ນມີລັກສະນະໂດດເດັ່ນພິເສດທາງດ້ານວັດທະນະທໍາທີ່ປະສົມປະສານລະຫວ່າງເອກະລັກຂອງຫຼວງພະບາງເມືອງມໍລະດົກໂລກ ແລະ ສປ ຈີນ ທັງຍັງເປັນເຄື່ອງໝາຍໃນການສໍາເລັດອາຄານສະຖານີ 10 ແຫ່ງ ຂອງເສັ້ນທາງລົດໄຟລາວຈີນແຕ່ຊາຍແດນບໍ່ເຕັນຫານະຄອນຫຼວງວຽງຈັນ ແລະໄດ້ເປັນພື້ນຖານອັນໜັກແໜ້ນໃຫ້ແກ່ການເປີດນຳໃຊ້ທາງລົດໄຟ ລາວ-ຈີນ ທີ່ມີຄຸນນະພາບສູງ.

ສະຖານີແຫ່ງນີ້ຕັ້ງຢູ່ບ້ານຊຽງລ້ອມ ນະຄອນຫຼວງພະບາງ (ເມືອງຂອງມໍລະດົກໂລກທີ່ມີຊື່ສຽງທາງດ້ານວັດທະນະທໍາ ແລະ ມີສະຖານທີ່ທ່ອງທ່ຽວຫຼາກຫຼາຍ), ມີເນື້ອທີ່ການກໍ່ສ້າງທັງໝົດ 7.970 ຕາແມັດ, ເປັນອາຄານຂະໜາດໃຫຍ່ຮອງລົງມາຈາກສະຖານີນະຄອນຫຼວງວຽງຈັນ, ໄດ້ຕິດຕັ້ງເປັນ 2 ບ່ອນ ຂຶ້ນລົງລົດ ແລະ 4 ເສັ້ນທາງລົດໄຟຊຶ່ງຈະເປີດເປັນບ່ອນຂົນສົ່ງໂດຍສານ ແລະ ຂົນສົ່ງສິນຄ້າໂດຍໃຊ້ເວລາກໍ່ສ້າງທັງໝົດ 161 ວັນ, ປະຈຸບັນໄດ້ສໍາເລັດການກໍ່ສ້າງ ແລະ ຜ່ານການກວດກາ-ຮັບຮອງ ເປັນທີ່ຮຽບຮ້ອຍ ແລະ ພ້ອມເປີດຮັບໃຊ້ບໍລິການໃນເດືອນທັນວານີ້.

ໂອກາດການຢ້ຽມຢາມຄັ້ງນີ້ທ່ານເຈົ້າແຂວງຫຼວງພະບາງຍັງໄດ້ໄປຢ້ຽມຢາມແຕ່ລະຈຸດພາຍໃນອາຄານຜູ້ໂດຍສານ ແລະ ຕົວລົດໄຟຂະບວນລ້ານຊ້າງ, ພ້ອມທັງໄດ້ສອບຖາມເຖິງຄວາມພ້ອມຂອງການບໍລິການເພື່ອໃຫ້ພາຍໃນສະຖານີຫຼວງພະບາງໄດ້ຮັບຄວາມພໍໃຈຈາກຜູ້ມາໃຊ້ບໍລິການພາຍຫຼັງເປີດການນຳໃຊ້ຢ່າງເປັນທາງການ.

แชร์