ທຫລ ແລະທະນາຄານແຫ່ງລັດຫວຽດນາມປະຊຸມທະວິພາຄີ ປະຈໍາປີ

ວັນທີ 30 ພະຈິກ 2021 ທີ່ທະນາຄານແຫ່ງ ສປປ ລາວ ( ທຫລ) ນະຄອນຫຼວງວຽງຈັນ, ທຫລ ໄດ້ຮັບກຽດເປັນເຈົ້າພາບຈັດກອງປະຊຸມທະວິພາຄີປະຈໍາປີ 2021 ລະຫວ່າງທະນາຄານແຫ່ງ ສປປ ລາວ ແລະທະນາຄານແຫ່ງລັດຫວຽດນາມ ໃນຮູບແບບທາງໄກຊຶ່ງຝ່າຍທະນາຄານແຫ່ງ ສປປ ລາວ ນໍາໂດຍທ່ານ ສອນໄຊ ສິດພະໄຊ, ຜູ້ວ່າການທະນາຄານແຫ່ງ ສປປ ລາວ ແລະຝ່າຍທະນາຄານແຫ່ງລັດຫວຽດນາມ ນໍາໂດຍທ່ານ ນາງ ຫງວຽນ ທິຮົ່ງ, ຜູ້ວ່າການທະນາຄານແຫ່ງລັດຫວຽດນາມ ພ້ອມດ້ວຍຄະນະຜູ້ແທນຕາງໜ້າຈາກສອງທະນາຄານກາງໄດ້ໃຫ້ກຽດເຂົ້າຮ່ວມຢ່າງພ້ອມພຽງ.

ກອງປະຊຸມທະວິພາຄີແມ່ນຖືກຈັດຂຶ້ນເປັນປະຈຳທຸກປີເພື່ອຮັດແໜ້ນສາຍພົວພັນທີ່ພິເສດ, ຈິງໃຈ ແລະໝັ້ນຄົງຍາວນານລະຫວ່າງສອງທະນາຄານກາງທັງເປັນການສະຫຼຸບໝາກຜົນ ແລະ ລາຍງານຄວາມຄືບໜ້າການຈັດຕັ້ງປະຕິບັດວຽກງານການພົວພັນຮ່ວມມືໃນຂະແໜງການເງິນ-ເງິນຕາສອງຝ່າຍ ແລະ ວາງທິດທາງການຮ່ວມມືໃນຕໍ່ໜ້າໂດຍສະເພາະໃນຂົງເຂດການເງິນ-ການທະນາຄານ ທີ່ປະກອບສ່ວນໃນການພັດທະນາຂະແໜງການທະນາຄານ ແລະເສດຖະກິດຂອງສອງປະເທດ ສປປ ລາວ ແລະ ສສ. ຫວຽດນາມ.

ໃນປີນີ້, ກອງປະຊຸມໄດ້ມີການປຶກສາຫາລື ແລະແລກປ່ຽນຮ່ວມກັນໃນຫຼາຍບັນຫາສຳຄັນຕົ້ນຕໍຄື: ສະພາບເສດຖະກິດມະຫາພາກ ແລະການພັດທະນາຂະແໜງການທະນາຄານຂອງສອງປະເທດ, ມາດຕະການຕອບໂຕ້ຕໍ່ການແຜ່ລະບາດຂອງພະຍາດ COVID-19, ການທົບທວນຄືນບັນດາໂຄງການ ແລະແຜນການຮ່ວມມືສອງຝ່າຍໃນອະນາຄົດລວມເຖິງການແລກປ່ຽນບົດຮຽນຮ່ວມກັນໃນວຽກງານການສົ່ງເສີມການຊຳລະທີ່ບໍ່ນຳໃຊ້ເງິນສົດ ແລະບັນຫາອື່ນໆທີ່ທັງສອງຝ່າຍມີຄວາມສົນໃຈຮ່ວມກັນ.

ກອງປະຊຸມຄັ້ງນີ້ໄດ້ດຳເນີນໄປເປັນເວລາເຄິ່ງວັນດ້ວຍບັນຍາກາດໄມຕີຈິດມິດຕະພາບ ແລະການຮ່ວມມືຮອບດ້ານຊຶ່ງສາມາດບັນລຸຜົນສໍາເລັດຕາມລະດັບຄາດໝາຍ ໂດຍຜ່ານການປຶກສາຫາລື ແລະແລກປ່ຽນບົດຮຽນຮ່ວມກັນ, ຜົນສຳເລັດຂອງກອງປະຊຸມຄັ້ງນີ້ຖືເປັນຂີດໝາຍອັນສໍາຄັນໃນການເສີມຂະຫຍາຍສາຍພົວພັນຮ່ວມມືຂອງສອງປະເທດເວົ້າລວມ, ເວົ້າສະເພາະກໍ່ຄືສອງທະນາຄານກາງໃຫ້ນັບມື້ນັບເພີ່ມທະວີຄວາມສະໜິດແໜ້ນ.

แชร์