ນ້ຳດື່ມໂລມາຄຳເອົາໃຈໃສ່ຮັກສາສິ່ງແວດລ້ອມ

 ເຈົ້າຂອງໂຮງງານນ້ຳດື່ມ ແລະນ້ຳກ້ອນໂລມາຄຳ ນອກຈາກເປັນຄົນໃຈບຸນເສຍສະລະຊັບສິນສ່ວນໂຕ 10 ຕື້ກວ່າກີບ ພິກປີ້ນຊີວິດປະຊາຊົນບ້ານຄຳປ່າແໜ ແລະບ້ານປ່າກ້ວຍ ເມືອງຈຳພອນ ແຂວງສະຫວັນນະເຂດ ຈາກຄົນຂໍທານກາຍມາເປັນຜູ້ຄົນຮູ້ທຳມາຫາກິນລ້ຽງຊີບຈົນກຸ້ມຢູ່ກຸ້ມກິນແລ້ວຍັງເອົາໃຈໃສ່ເລື່ອງການຮັກສາສິ່ງແວດລ້ອມຊຶ່ງຫຼ້າສຸດທາງເຈົ້າຂອງໂຮງງານໄດ້ປະກາດຢຸດໃຊ້ແຜ່ນຢາງສຳລັບຫຸ້ມຫໍ່ຝາກວດເພັດນ້ຳດື່ມໂລມາຄຳໃນທຸກຂະໜາດ.

  ທ່ານ ເກຍ ອູ໊ສິດທິເດດ ເຈົ້າຂອງໂຮງງານຜະລິດນໍ້າດື່ມ ແລະນ້ຳກ້ອນໂລມາຄຳ ແຂວງສະຫວັນນະເຂດ ກ່າວວ່າ: ອີງຕາມຄຳແນະນຳຂອງທ່ານລັດຖະ ມົນຕີກະຊວງຊັບພະຍາກອນທຳມະຊາດ ແລະສິ່ງແວດລ້ອມ; ໃບຢັ້ງຢືນຂອງພະແນກຊັບພະຍາກອນທຳມະຊາດ ແລະ ສີ່ງແວດລ້ອມສະບັບເລກທີ 577/ພສຊ ສຂ ລົງວັນທີ 24 ເມສາ 2019 ວ່າດ້ວຍການກຳນົດມາດຕະການປ້ອງກັນ, ຄວບຄຸມມົນລະພິດ ແລະຫຼຸດຜ່ອນຜົນກະທົບຕໍ່ສິ່ງແວດລ້ອມທັງປະກອບສ່ວນອັນໜື່ງໃນວຽກງານຫຼຸດຜ່ອນຜົນກະທົບຕໍ່ສິ່ງແວດລ້ອມ-ສັງຄົມ.

  ໂຮງງານນ້ຳດື່ມ ແລະນ້ຳກ້ອນໂລມາຄຳ ຈຶ່ງໄດ້ອອກແຈ້ງການເຖິງຕົວແທນຈຳໜ່າຍ ແລະຜູ້ຊົມໃຊ້ຜະລິດຕະພັນນ້ຳດື່ມໂລມາຄຳໃຫ້ຮັບຮູ້ເລີ່ມແຕ່ວັນທີ 1 ມີນາເປັນຕົ້ນມາທາງໂຮງງານແມ່ນໄດ້ຢຸດໃຊ້ແຜ່ນຢາງສຳລັບຫຸ້ມຫໍ່ຝາກວດເພັດນ້ຳດື່ມໂລມາຄຳແຕ່ລະຂະໜາດຊຶ່ງ ຈຸດນີ້ທ່ານ ເກຍ ອູ໊ສິດທິເດດ ເຫັນວ່າ ເປັນການສິ້ນເປືອງຕົ້ນທຶນການຜະລິດພາຍໃນຍັງເປັນສິ່ງເສດເຫຼືອເລັກໆນ້ອຍໆທີ່ຜູ້ບໍລິໂພກຕ້ອງມີສ່ວນຮ່ວມຮັບຜິດຊອບຕໍ່ຄວາມສະອາດຈົບງາມຢູ່ໃນສະ ຖານທີ່, ພາຍໃນ-ພາຍນອກ ແລະສິ່ງແວດລ້ອມສັງຄົມ.

  ທັງນີ້ເຈົ້າຂອງໂຮງງານນ້ຳດື່ມ ແລະ ນ້ຳກ້ອນໂລມາຄຳຮຽກຮ້ອງເຖິງຜູ້ປະກອບການນ້ຳດື່ມ ແລະນ້ຳກ້ອນດ້ວຍກັນຕະຫຼອດຮອດໂຮງງານອຸດສະຫະກຳຕ່າງໆ ຈົ່ງພັດທະນາ ແລະຜະລິດສິນຄ້າຄວບຄູ່ກັບການເອົາໃຈໃສ່ເລື່ອງບັນຫາສີ່ງແວດລ້ອມໃຫ້ຫຼາຍຂຶ້ນເພື່ອເຮັດໃຫ້ບ້ານເມືອງມີສະພາບອາກາດທີ່ໜ້າຢູ່ອັນຈະສົ່ງຜົນດີຕໍ່ການດຳລົງຊີວິດຂອງຄົນເຮົາໃນສັງຄົມ.

ຂ່າວ: ນສພ ເສດຖະກິດ-ສັງຄົມ

แชร์