ເທສະການ ສະຕາດອັບລາວ ປະຈຳປີ 2021 ຈະເປີດຂຶ້ນກາງເດືອນທັນວາ

ວັນທີ 30 ພະຈິກ 2021 ນີ້, ກົມສົ່ງເສີມວິສາຫະກິດຂະໜາດນ້ອຍ ແລະກາງ (ກສວ) ,ກະຊວງອຸດສາຫະກຳ ແລະການຄ້າຮ່ວມຢກັບສະມາຄົມການຄ້າໄອຊີທີລາວ (LICA), ພາຍໃຕ້ການສະໜັບສະໜູນຈາກ: ໂຄງການເຂົ້າເຖິງແຫຼ່ງທຶນ (MSME A2F-ESR) ຂອງທະນາຄານໂລກ ແລະໂຄງການສ້າງສະພາບຢແວດລ້ອມທີ່ເອື້ອອຳນວຍຕໍ່ທຸລະກິດລາວ (USAID Laos Business Environment) ໄດ້ຈັດງານຖະແຫຼງຂ່າວອອນລາຍ ກ່ຽວກັບການຈັດງານ ເທສະການສະຕາດອັບລາວ ປະຈຳປີ 2021 (Lao StartUp Fest 2021) ຂຶ້ນໃຫ້ກຽດເປັນປະທານໂດຍ ທ່ານ ສະເຫຼີມໄຊ ຫຼ່ຽມຜີ ຮອງຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະກາງ, ກະຊວງຢອຸດສະຫະກຳ ແລະການຄ້າ, ທ່ານ ທະນູສອນ ພົນອາມາດ ປະທານສະມາຄົມການຄ້າ ໄອຊີທີລາວ, ມີບັນດາອົງການຈັດຕັ້ງທັງພາກລັດ, ເອກະຊົນ, ນັກທຸລະກິດ, ຜູ້ປະກອບການທຸລະກິດ Startup ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານ ສະເຫຼີມໄຊ ຫຼ່ຽມຜີ ກ່າວວ່າ: “ ເພື່ອຜັນຂະຫຍາຍແຜນວຽກຂອງກະຊວງອຸດສາຫະກຳ ແລະການຄ້າຂອງ “ແຜນແມ່ບົດສຶກສາການຊຸກຍູ້ ແລະພັດທະນາທຸລະກິດລິເລີ່ມ (ສະຕາດອັບ - Startup)” ໃນໄລຍະກ້າວສູ່ເສດຖະກິດດິຈິຕອນທີ່ລັດຖະບານຮອງຮັບຢ່າງເປັນທາງການໃນກອງປະຊຸມຄະນະລັດຖະບານປະຈຳເດືອນສິງຫາ 2021 ແລະເພື່ອເປັນການຜັນຂະຫຍາຍວຽກງານການຄຸ້ມຄອງ ແລະສົ່ງເສີມທຸລະກິດສະຕາດອັບເພື່ອສາມາດເຂົ້າເຖິງຕະຫຼາດທັງພາຍໃນ ແລະ ຕ່າງປະເທດ, ການເຜີຍແຜ່ສ້າງຈິດສຳນຶກໃຫ້ແກ່ຜູ້ປະກອບກິດຈະການທຸລະກິດສະຕາດອັບກ່ຽວກັບກົດໝາຍ ແລະ ລະບຽບການທາງດ້ານສະຕາດອັບ ຕິດພັນກັນນັ້ນການສົ່ງເສີມສະຕາດອັບກໍ່ເປັນໜຶ່ງຈຸດສຸມທີ່ຈະຢູ່ໃນແຜນພັດທະນາ ປີ 2021-2025, ລັດຖະບານແມ່ນຈະໃຫ້ການສະໜັບສະໜູນ, ສົ່ງເສີມ ແລະ ພັດທະນາຜູ້ປະກອບກິດຈະການລວມທັງວຽກງານສະຕາດອັບຢ່າງຕໍ່ເນື່ອງ, ຊຶ່ງງານ Startup Fest ນີ້ກໍ່ເປັນໜຶ່ງໃນກິດຈະກຳສົ່ງເສີມວຽກງານດັ່ງກ່າວ ແລະ ເຫັນວ່າຄວນຈະໃຫ້ການສະໜັບສະໜູນໃຫ້ມີໃນທຸກໆປີ ”.

ທ່ານ ທະນູສອນ ພົນອາມາດ ກ່າວວ່າ: “ປະຈຸບັນການສ້າງຜູ້ປະກອບກິດຈະການແມ່ນມີຄວາມສຳຄັນຫຼາຍໂດຍສະເພາະແມ່ນກຸ່ມໄວຫນຸ່ມທີ່ກຳລັງລິເລີ່ມໃຫ້ຄວາມສົນໃຈໃນການເຮັດທຸລະກິດ, ເຖິງວ່າສະພາບການໂຄວິດຍັງຄົງມີຢູ່, ການສົ່ງເສີມຜູ້ປະກອບກິດຈະການຍັງແມ່ນຫມາກຫົວໃຈຫຼັກໃນການພັດທະນາເສດຖະກິດຄຽງຄູ່ກັບການຫັນເປັນດິຈິຕອນ, ພາຍໃຕ້ການຮ່ວມມືກັບກົມ SME ທາງທີມງານຂອງພວກເຮົາ ໄດ້ກະກຽມງານ ແລະວາງແຜນເນື້ອໃນລວມໄປເຖິງການປະກາດຊອກຫາຜູ້ແຂ່ງຂັນ Startup, ຜູ້ປະກອບການທີ່ມີຄວາມຄິດສ້າງສັນເພື່ອເຂົ້າຮ່ວມການແຂ່ງຂັນ.”

ທ່ານ ເມວວິນ ສະເປນສ ຫົວໜ້າໂຄງການສ້າງສະພາບທີ່ເອື້ອອໍານວຍຕໍ່ທຸລະກິດລາວໄດ້ກ່າວວ່າ: “ງານ Lao Start Up Fest ໄດ້ກາຍເປັນງານປະຈໍາປີອັນເປັນເອກະລັກ ສໍາລັບສະຕາດອັບແຫ່ງນະວັດຕະກໍາໃນ ສປປ ລາວ ແລະທາງໂຄງການຮູ້ສຶກຕື່ນເຕັ້ນ ແລະເປັນກຽດທີ່ໄດ້ໃຫ້ການສະໜັບສະໜູນ ແລະຈະສືບຕໍ່ການສະໜັບສະໜູນດັ່ງກ່າວ". ສະນັ້ນງານເທສະການສະຕາດອັບ 2021 (Lao Startup Fest 2021) ທີ່ຈະຈັດຂຶ້ນນີ້ແມ່ນເພື່ອເປັນການເຕົ້າໂຮມເອົາບັນດາຫົວໜ່ວຍທຸລະກິດ Startup ທີ່ມີຄວາມໂດດເດັ່ນໃນລາວ ເພື່ອມາສະແດງສັກກະຍະພາບ ແລະຄວາມສາມາດຂອງ ສະຕາດອັບ ໃນລາວ.

ພາຍໃນງານປະກອບມີ 3 ກິດຈະກຳຫຼັກຄື: 1) ການວາງສະແດງກ່ຽວກັບການບໍລິການຂອງບັນດາຜູ້ປະກອບກິດຈະການ ສະຕາດອັບ ໃນ ສປປ ລາວ; 2) ກອງປະຊຸມສຳມະນາກ່ຽວກັບການລິເລີ່ມທຸລະກິດໃນຂະແໜງການຕ່າງໆ, ການຊອກ ແລະເຂົ້າຫາແຫຼ່ງທຶນບັນຫາ ແລະສິ່ງທ້າທາຍ ແລະ ປະເດັນຕ່າງໆທີ່ທຸລະກິດຄວນຮູ້; 3) ການແຂ່ງຂັນ ລາວສະຕາດອັບ Lao Startup Award

ສຳລັບງານ StartupFest 2021 ໂດຍຈະຈັດຂຶ້ນໃນວັນທີ 17-19 ທັນວາ 2021 ແບບອອນລາຍໂດຍຜ່ານການ Live Facebook ຂອງ page ຄູ່ຮ່ວມງານຄື: Lao StartupFest, ກົມສົ່ງເສີມວິສາຫະກິດຂະຫນາດນ້ອຍ ແລະກາງ (DOSMEP) ແລະສະມາຄົມການຄ້າ ໄອຊີທີ ລາວ (LICA).

แชร์