ເມືອງນອງ ເຮັດບົດບັນທຶກຊື້-ຂາຍມັນຕົ້ນ

ຕອນເຊົ້າຂອງວັນທີ 25 ພະຈິກ 2021ນີ້, ຢູ່ທີ່ຫ້ອງປະຊຸມຫ້ອງວ່າການປົກຄອງເມືອງນອງ ແຂວງສະຫວັນນະເຂດ ໄດ້ຈັດພິທີເຊັນບົດບັນທຶກການຊື້-ຂາຍ ມັນຕົ້ນ ລະຫວ່າງການນຳຂອງເມືອງ ແລະໂຮງງານປຸງແຕ່ງມັນຕົ້ນເຊໂປນ ແລະໂຮງງານຖ່ານຂາວເມືອງນອງໂດຍການເຂົ້າຮ່ວມໃນພິທີຂອງທ່ານ ແຕງອ່ອນ ຈັນທະລະນອງ ຮອງເຈົ້າເມືອງໆ ນອງທັງເປັນຜູ້ຊີ້ນຳວຽກງານເສດຖະກິດ, ມີຄະນະຫ້ອງການກະສິກຳ ແລະປ່າໄມ້ເມືອງ, ຫ້ອງການອຸດສາຫະກຳ ແລະການຄ້າເມືອງ, ຕາງໜ້າໃຫ້ຈຸດສຸມ, ເຂດ ແລະພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມໄດ້ສ້າງຂໍ້ຜູກມັດລະຫວ່າງຜູ້ຊື້ ແລະ ຜູ້ຂາຍວ່າດ້ວຍຊະນິດມັນຕົ້ນ, ລາຄາຕໍ່າສຸດ ແລະ ມູນຄ່າສັນຍາ, ເງື່ອນໄຂໃນການຊື້-ຂາຍມັນຕົ້ນ, ສິດໜ້າທີ່ ແລະພັນທະຂອງຜູ້ຊື້ ແລະຜູ້ຂາຍມັນຕົ້ນໃນນີ້ສຳລັບມັນຕົ້ນດິບຈະຕ້ອງເປັນມັນຕົ້ນກົ່ນບໍ່ໃຫ້ກາຍ 3 ວັນຂຶ້ນໄປ, ບໍ່ໃຫ້ບວມ, ເນົ່າ ຫຼືຕິດຂີ້ດິນຫຼາຍຈົນເກີນໄປ ແລະຕ້ອງໄດ້ຕັດເຫງົ້າອອກໃຫ້ສົມບູນ, ສ່ວນມັນຕົ້ນແຫ້ງ ຕ້ອງໄດ້ຕາກແດດ 7 ວັນຂຶ້ນໄປຖ້າຫາກວ່າລາຄາໃນທ້ອງຕະຫຼາດທັງພາຍໃນ ແລະຕ່າງປະເທດມີການປ່ຽນແປງລາຄາກໍ່ຈະເພີ່ມຂຶ້ນ ຫຼືຫຼຸດລົງຕາມການສັນຍາຄື: ລາຄາມັນຕົ້ນດິບ 1 ໂຕນ 6 ແສນກີບ ແລະມັນຕົ້ນແຫ້ງ 1 ໂຕນລາຄາ 1.550.000 ກີບ, ແຕ່ມາໃນປະຈຸບັນມັນຕົ້ນແຫ້ງຂາຍຕາມທ້ອງຕະຫຼາດ ກິໂລລະ 1.700 ກີບ, ເຊິ່ງທາງໂຮງງານຕ້ອງໄດ້ຊື້ສູງຂຶ້ນຕາມທ້ອງຕະຫຼາດ, ໂດຍລາຄາດັ່ງກ່າວບໍ່ໃຫ້ມີການຄິດໄລ່ອັດຕາສ່ວນທາດແປ້ງ, ສຳລັບການຄິດໄລ່ສິ່ງເຈືອປົນແມ່ນບໍ່ໃຫ້ເກີນ 5% ຂອງນໍ້າໜັກທັງໝົດ ແລະມັນຕົ້ນແຫ້ງບໍ່ໃຫ້ເກີນ 3% ຂອງນໍ້າໜັກທັງໝົດ.

ຈາກນັ້ນ, ໃນພິທີກໍ່ໄດ້ມີການລົງນາມໃນບົດບັນທຶກການຊື້-ຂາຍມັນຕົ້ນຢ່າງເປັນທາງການ ລະຫວ່າງການນຳຂອງເມືອງຊຶ່ງຕາງໜ້າໂດຍທ່ານ ແຕງອ່ອນ ຈັນທະລະນອງ ຮອງເຈົ້າເມືອງ ແລະທ່ານ ດົງວັນລັບ ຜູ້ອຳນວຍການໂຮງງານປຸງແຕ່ງມັນຕົ້ນເຊໂປນ ແລະທ່ານ ສິ ຕາງໜ້າໂຮງງານຖ່ານຂາວປະຈຳເມືອງນອງຜູ້ຮັບຊື້ມັນຕົ້ນ ໂດຍຊ້ອງໜ້າພາກສ່ວນກ່ຽວຂ້ອງທີ່ເຂົ້າຮ່ວມເປັນສັກຂີພະຍານ.

แชร์