ຫຼວງພະບາງ ກຽມຮັບລາງວັນທ່ອງທ່ຽວຍືນຍົງ ແລະມາດຕະຖານເມືອງສະອາດອາຊຽນ

ຂ່າວ: ສີສຸວັນ 

ພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວແຂວງຫຼວງພະບາງໃນນາມຄະນະກຳມະການຄັດເລືອກ, ປະເມີນ, ຮັບຮອງ ແລະຢັ້ງຢືນລາງວັນການທ່ອງທ່ຽວແບບຍືນຍົງອາຊຽນ ແລະມາດຕະຖານເມືອງທ່ອງທ່ຽວສະອາດອາຊຽນຂັ້ນແຂວງໄດ້ຮ່ວມປະຊຸມທາງໄກໃນວັນທີ 22 ພະຈິກ 2021 ນີ້ໂດຍມີທ່ານ ປອ ນາງ ສຸດາພອນ ຄົມທະວົງ ຫົວໜ້າພະແນກ ຖວທ ແຂວງພ້ອມດ້ວຍຫົວໜ້າຂະແໜງ ແລະວິຊາການຂົງເຂດທ່ອງທ່ຽວ,ຄະນະຮັບຜິດຊອບມາດຕະຖານການທ່ອງທ່ຽວອາຊຽນ ຈາກກົມພັດທະນາການທ່ອງທ່ຽວເຊິ່ງມີຄະນະກຳມະການຄັດເລືອກ, ປະເມີນ, ຮັບຮອງ ແລະ ຢັ້ງຢືນລາງວັນການທ່ອງທ່ຽວແບບຍືນຍົງອາຊຽນ ແລະ ມາດຕະຖານເມືອງທ່ອງທ່ຽວສະອາດອາຊຽນຂັ້ນສູນກາງ ແລະຂັ້ນແຂວງເຂົ້າຮ່ວມ. 

ທ່ານ ນາງ ພອນມະລີ ອິນທະພົມ ຫົວໜ້າກົມພັດທະນາການທ່ອງທ່ຽວ, ກະຊວງຖະແຫຼ່ງຂ່າວ, ວັດທະນະທຳ ແລະທ່ອງທ່ຽວໃນນາມປະທານກອງປະຊຸມເພື່ອຕິດຕາມກວດກາການປັບປຸງ ແລະລາຍງານຜົນການປະເມີນຄັ້ງສຸດທ້າຍ ແລະ ການຈັດຕັ້ງປະຕິບັດແຜນກິດຈະກຳປັບປຸງແຫຼ່ງທ່ອງທ່ຽວຕາດກວາງຊີໃຫ້ໄດ້ຕາມມາດຕະຖານລາງວັນການທ່ອງທ່ຽວແບບຍືນຍົງອາຊຽນ ແລະແຜນກິດຈະກຳປັບປຸງນະຄອນຫຼວງພະບາງໃຫ້ໄດ້ຕາມມາດຕະຖານເມືອງທ່ອງທ່ຽວສະອາດອາຊຽນໃນການສະໝັກຂໍຮັບລາງວັນການທ່ອງທ່ຽວແບບຍືນຍົງອາຊຽນ ແລະມາດຕະຖານເມືອງທ່ອງທ່ຽວສະອາດອາຊຽນທີ່ແຂວງຫຼວງພະບາງເພື່ອໃຫ້ທາງຄະນະກຳມະການຂັ້ນສູນກາງໄດ້ສັງລວມຜົນການປະເມີນ ແລະຄັດເລືອກເຂົ້າສະໝັກຮັບລາງວັນໃນປີ 2022 ນີ້. 

ສຳລັບລາງວັນການທ່ອງທ່ຽວແບບຍືນຍົງອາຊຽນແມ່ນມີເປົ້າຫມາຍເພື່ອສົ່ງເສິມການປົກປັກຮັກສາທຳມະຊາດ, ວັດທະນະທຳ, ສິ່ງແວດລ້ອມ ແລະ ສົ່ງເສີມການທ່ອງທ່ຽວໃຫ້ມີຄວາມຍືນຍົງເຊິ່ງໃນໄລຍະຜ່ານມາແຂວງຫຼວງພະບາງກໍເຄີຍໄດ້ຮັບລາງວັນນີ້ມາແລ້ວ 2 ຄັ້ງ ຄື: ຜະລິດຕະພັນໃນເມືອງແຫຼ່ງທ່ອງທ່ຽວພູສີ (ໃນປີ 2018) ແລະວັດຊຽງທອງ (ປີ 2020) ແລະ ສຳລັບຫົວຂໍ້ປີ 2022 ນີ້ ແມ່ນການທ່ອງທ່ຽວທີ່ປອດໄພ ແລະ ທາງພະແນກ ຖວທຂ ກໍຄືຄະນະ ຮັບຜິດຊອບການປະເມີນຂັ້ນແຂວງເຫັນດີສະເໜີຜະລິດຕະພັນຊົນນະບົດແຫຼ່ງທ່ອງທ່ຽວຕາດກວາງຊີເຂົ້າສະໝັກຮັບລາງວັນເຊິ່ງແມ່ນແຫຼ່ງທ່ອງທ່ຽວທຳມະຊາດລັດຄຸ້ມຄອງແຕ່ໄດ້ມອບໃຫ້ປະຊາຊົນທ້ອງຖິ່ນ, ບ້ານທ່າແປ້ນເປັນຜູ້ຮັບຜິດຊອບໃນການປົກປັກຮັກສາ ແລະບໍລິການນັກທ່ອງທ່ຽວ.

ທັງນີ້ກໍເພື່ອເປັນການພັດທະນາ ແລະປັບປຸແຫຼ່ງທ່ອງທ່ຽວໃຫ້ໄດ້ມາດຕະຖານ, ເປັນທີ່ດຶງດູດນັກທ່ອງທ່ຽວ, ສາມາດກະຈາຍນັກທ່ອງທ່ຽວອອກໄປເຂດນອກນະຄອນ ເພື່ອສົ່ງເສີມການມີສ່ວນຮ່ວມ ແລະສ້າງລາຍໄດ້ໃຫ້ແກ່ຊຸມຊົນທ້ອງຖິ່ນໃຫ້ຫຼາຍຂຶ້ນ.

แชร์