ເປີດໂຄງການສະໜັບສະໜູນສັກວັກແຊງ

ສະຫະລັດອາເມຣິກາ ໄດ້ສະໜັບສະໜູນກະຊວງສາທາລະນະສຸກໃນການບໍລິການວັກຊິນກັນພະຍາດໂຄວິດ-19 ເປັນຈຳນວນເງິນ 2,4 ລ້ານໂດລາ ໂດຍຜ່ານອົງການ USAID ມອບຕໍ່ໃຫ້ອົງການ ອຸຍນິເຊັບ ແລະອົງການອະນາໄມໂລກເພື່ອສ້າງຄວາມເຂັ້ມແຂງໃນວຽກງານການສັກວັກຊິນກັນພະຍາດໂຄວິດ-19 ໃນ ສປປ ລາວ ຊຶ່ງໂຄງການດັ່ງກ່າວໄດ້ເປີດຂຶ້ນຢ່າງເປັນທາງການໃນວັນທີ 29 ພະຈິກນີ້ ທີ່ກະຊວງສາທາລະນະສຸກໂດຍມີທ່ານ ສະໜອງ ທອງຊະນະ ຮອງລັດຖະມົນຕີກະຊວງສາທາລະນະສຸກ, ທ່ານ ປີເຕີ ເຮມອນ ເອກອັກຄະລັດຖະທູດສະຫະລັດອາເມຣິກາປະຈຳ ສປປ ລາວ, ທ່ານ ນາງ ບີອາເຕດາສເທວ ຮອງຜູ້ຕາງໜ້າອົງການອຸຍນິເຊັບປະຈຳ ສປປ ລາວ ແລະ ທ່ານ ຈູນກາວ ວ່າການແທນຜູ້ຕາງໜ້າອົງການອະນາໄມໂລກປະຈໍາ ສປປ ລາວ ແລະພະນັກງານກ່ຽວຂ້ອງເຂົ້າຮ່ວມ.

ທ່ານ ສະໜອງ ທອງຊະນະ ໄດ້ສະແດງຄວາມຂອບໃຈມາຍັງອົງການ USAID ທີ່ໄດ້ໃຫ້ການຊ່ວຍເຫຼືອ ແລະຊົມເຊີຍລັດຖະບານສະຫະລັດອາເມຣິກາ, ອົງການອຸຍນິເຊັບ ແລະອົງການອະນາໄມໂລກທີ່ໄດ້ໃຫ້ການສະໜັບສະໜູນອັນລໍ້າຄ່າແກ່ປະຊາຊົນລາວໃນໄລຍະການລະບາດຂອງພະຍາດໂຄວິດ-19. ທ່ານ ໄດ້ກ່າວວ່າ: “ຍ້ອນວ່າ ສປປ ລາວ ໄດ້ມີການແຜ່ລະບາດໂຄວິດ-19 ໃນຊຸມຊົນຫຼາຍຂຶ້ນ, ສະນັ້ນຈຶ່ງຈໍາເປັນຕ້ອງເສີມສ້າງຄວາມເຂັ້ມແຂງໃນການສັກວັກຊິນຊຶ່ງກໍຄືບຸລິມະສິດອັນດັບໜຶ່ງຂອງ ລັດຖະບານໃນປັດຈຸບັນ. ສະນັ້ນໂຄງການໃໝ່ນີ້ຊຶ່ງໄດ້ຮັບການສະໜັບສະໜູນຈາກສະຫະລັດອາເມຣິກາໂດຍຜ່ານອົງການ USAID ແລະຈັດຕັ້ງປະຕິບັດໂດຍອົງການອຸຍນິເຊັບ ແລະອົງການອະນາໄມໂລກ, ຈະເປັນການປະກອບສ່ວນອັນໃຫຍ່ຫຼວງໃຫ້ແກ່ຄວາມພະຍາຍາມຂອງ ສປປ ລາວ ໃນດ້ານນີ້ ແລະເພື່ອບັນລຸເປົ້າໝາຍການສັກວັກຊິນກັນພະຍາດຂອງ ສປປ ລາວ”.

ທ່ານ ປີເຕີ ເຮມອນ ເອກອັກຄະລັດຖະທູດສະຫະລັດອາເມຣິກາປະຈຳ ສປປ ລາວ ໄດ້ສະແດງຄວາມຊົມເຊີຍຕໍ່ລັດຖະບານແຫ່ງ ສປປ ລາວ ໃນຄວາມພະຍາຍາມຮັກສາຄວາມປອດໄພຂອງປະຊາຊົນລາວພ້ອມທັງຍົກໃຫ້ເຫັນຜົນສຳເລັດລະຫວ່າງສະຫະລັດອາເມຣິກາ, ສປປ ລາວ, ອົງການອະນາໄມໂລກ ແລະອົງການອຸຍນິເຊັບ. “ການຊ່ວຍເຫຼືອຄັ້ງໃໝ່ນີ້ໄດ້ສະທ້ອນໃຫ້ເຫັນເຖິງການເປັນຄູ່ຮ່ວມງານທີ່ແໜ້ນແຟ້ນລະຫວ່າງລັດຖະບານ ແລະປະຊາຊົນຂອງສະຫະລັດອາເມຣິກາ ແລະ ສປປ ລາວ. ມາຮອດປັດຈຸບັນ, ສະຫະລັດອາເມຣິກາໄດ້ໃຫ້ການສະໜັບສະໜູນທຶນຈຳນວນທັງໝົດ 13 ລ້ານກວ່າໂດລາ ແກ່ ສປປ ລາວ ເພື່ອຮັບມືກັບພະຍາດໂຄວິດ-19. ນອກຈາກວຽກງານສາທາລະນະສຸກແລ້ວ, ສະຫະລັດອາເມຣິກາຈະສືບຕໍ່ໃຫ້ການຊ່ວຍເຫຼືອແກ່ ສປປ ລາວ ເພື່ອແກ້ໄຂຜົນກະທົບຈາກພະຍາດໂຄວິດ-19 ຕໍ່ລະບົບການສຶກສາ, ເສດຖະກິດ ແລະລະບຽບກົດໝາຍ. ການຊ່ວຍເຫຼືອທັງໝົດແມ່ນເພື່ອຊ່ວຍໃຫ້ ສປປ ລາວ ສາມາດຟື້ນຕົວຄືນ.” ທຶນຈຳນວນ 1 ລ້ານໂດລາຂອງຈໍານວນທຶນທັງໝົດຈາກອົງການ USAID ນັ້ນແມ່ນຈະປະກອບສ່ວນເຂົ້າໃນການຊ່ວຍເຫຼືອອົງການອະນາໄມໂລກເພື່ອສ້າງຄວາມເຂັ້ມແຂງໃຫ້ແກ່ລະບົບສາທາລະນະສຸກເພື່ອຮັບປະກັນການສັກວັກຊິນທີ່ປອດໄພສຳລັບປະຊາຊົນລາວການຊ່ວຍເຫຼືອຄັ້ງນີ້ແມ່ນເພື່ອແນໃສ່ການສະໜັບສະໜູນວຽກງານການສັກວັກຊິນປ້ອງກັນພະຍາດໂຄວິດ-19 ໃນ ສປປ ລາວ ໂດຍການເພີ່ມທະວີລະບຽບການເພື່ອຮັບປະກັນການຈັດຕັ້ງປະຕິບັດສິດອະນຸຍາດການນຳໃຊ້ແບບສຸກເສີນ (emergency use authorization) ຂອງວັກຊິນຕ່າງໆ, ສະໜັບສະໜູນການຈັດຊື້ວັດສະດຸ ແລະອຸປະກອນເພື່ອຊ່ວຍຕິດຕາມ ແລະແກ້ໄຂອາການຜົນຂ້າງຄຽງພາຍຫຼັງການສັກວັກ ຊິນ. ນອກນັ້ນ, ການຈັດຕັ້ງປະຕິບັດໂຄງການຂອງອົງການອະນາໄມໂລກຍັງຈະເນັ້ນໃສ່ການພັດທະນາອຸປະກອນການສຶກສາ ແລະການຈັດການຝຶກອົບຮົມໃຫ້ແກ່ພະນັກງານສາທາລະນະສຸກພ້ອມທັງປັບປຸງຄຸນນະພາບ ແລະການເຂົ້າເຖິງຂໍ້ມູນສໍາລັບການວາງແຜນກ່ຽວກັບການສັກວັກຊິນກັນພະຍາດໂຄວິດ-19 ເພື່ອຊ່ວຍໃຫ້ສາມາດເຂົ້າເຖິງປະຊາຊົນໃນເຂດຫ່າງໄກສອກຫຼີກທີ່ຢູ່ໃນກຸ່ມສ່ຽງເພື່ອໃຫ້ໄດ້ຮັບການສັກຢາວັກຊິນ.

แชร์