ບໍລິສັດ ເມກ ມອບເຄື່ອງຊ່ວຍໂຮງໝໍພາກສະໜາມລ້ານຊ້າງ

ຂ່າວ: ບຸນນິກ

  ວັນທີ 27 ພະຈິກ 2021 ບໍລິສັດ ເມກ ນຳເຂົ້າ-ສົ່ງອອກ ຈຳກັດຜູ້ດຽວໄດ້ເດີນທາງໄປມອບເຄື່ອງຊ່ວຍເຫຼືອປະກອບດ້ວຍຂະໜົມ Kara mucho, ນໍ້າໝາກພ້າວ RU COCO ແລະເຄື່ອງ ດື່ມຄາມູຊີ ລວມມູນຄ່າລວມ 15 ລ້ານກີບ ໃຫ້ແກ່ໂຮງໝໍພາກສະໜາມລ້ານຊ້າງ ນະຄອນຫຼວງວຽງຈັນ ຕາງໜ້າມອບໂດຍທ່ານ ເມກອາຄົມ ສີຫາລາດ  ຜູ້ອໍານວຍການບໍລິສັດ ເມກ ນຳເຂົ້າ-ສົ່ງອອກຈຳກັດຜູ້ດຽວ ແລະຕາງໜ້າຮັບໂດຍທີມແພດພາກສະໜາມລ້ານຊ້າງ.

ສຳລັບການມອບເຄື່ອງຊ່ວຍເຫຼືອໃນຄັ້ງນີ້ກໍ່ເພື່ອເປັນສ່ວນໜຶ່ງໃນການປະກອບສ່ວນເຂົ້າໃນວຽກງານປ້ອງກັນ, ສະກັດກັ້ນ ແລະແກ້ໄຂການແພ່ລະບາດຂອງພະຍາດໂຄວິດ-19 ຢູ່ ສປປ ລາວ ພວກເຮົາຂໍສົ່ງກໍາລັງໃຈໃຫ້ບຸກຄະລາກອນທາງການແພດທຸກສ່ວນທີ່ອົດທົນເສຍສະຫຼະຕໍ່ສູ້ກັບພະຍາດໂຄວິດ-19 ເພື່ອຄົນລາວທຸກຄົນ ແລະຫວັງເປັນຢ່າງຍິ່ງວ່າພວກເຮົາຈະສາມາດຜ່ານວິກິດເທື່ອນີ້ໄປໃຫ້ໄດ້.

ທ່ານ ເມກອາຄົມ ສີຫາລາດ ຜູ້ອໍານວຍການບໍລິສັດ ເມກ ນຳເຂົ້າ-ສົ່ງອອກ ຈຳກັດຜູ້ດຽວ ໄດ້ກ່າວກ່ຽວກັບການມອບເຄື່ອງໃນຄັ້ງນີ້ວ່າ: ດ້ວຍສະຖານະການການແຜ່ລະບາດຂອງໂຄວິດ-19 ຂໍໃຫ້ຄົນລາວທຸກຄົນຮ່ວມໃຈສູ້, ດຳລົງຊີວິດປະຈຳວັນຢ່າງມີສະຕິ, ທາງພວກເຮົາຂໍເປັນໜຶ່ງກຳລັງໃຈໃຫ້ທຸກໆທ່ານເພື່ອໃຫ້ຜ່ານພົ້ນວິກິດຮ້າຍນີ້ໄປນຳກັນ, ພວກເຮົາຂໍມອບຂະໜົມ Karamucho, ນໍ້າໝາກພ້າວ RU COCO  ແລະເຄື່ອງດື່ມ ຄາມູຊີ ເພື່ອເປັນກໍາລັງໃຈໃຫ້ແກ່ຄົນທີ່ກຳລັງປິ່ນປົວໂຄວິດທຸກຄົນ ແລະບຸກຄະລາກອນແພດທີ່ກໍາລັງຕໍ່ສູ້ກັບເຊື້ອພະຍາດນີ້ຢູ່ ແລະຫວັງຢ່າງຍິ່ງວ່າເຄື່ອງທີ່ພວກເຮົານໍາມາຊ່ວຍເຫຼືອນີ້ຈະເກີດປະໂຫຍດສູງສຸດແກ່ທຸກທ່ານ.

แชร์