2 ທະນາຄານເຊັນສັນຍາ ຄູ່ຮ່ວມຍຸດທະສາດບໍລິການຮອບດ້ານ

ວັນທີ 26 ພະຈິກ 2021 ທີ່ສໍານັກງານໃຫຍ່ທະນາຄານພັດທະນາລາວ ໄດ້ມີພິທີເຊັນສັນຍາ “ວ່າດ້ວຍການເປັນຄູ່ຮ່ວມມື, ຄູ່ຮ່ວມຍຸດທະສາດໃນການໃຫ້ບໍລິການຢ່າງຮອບດ້ານລະຫວ່າງທະນາຄານພັດທະນາລາວ ແລະທະນາຄານນະໂຍບາຍ”, ໂດຍການເຂົ້າຮ່ວມຂອງທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ, ທ່ານ ຈັນທະໜອມ ພົມມະນີ ປະທານຄະນະຜູ້ບໍລິຫານງານທະນາຄານພັດທະນາລາວ ແລະທ່ານ ວຸດທິ ເລື່ອນ ວິໄລວົງ ຜູ້ອໍານວຍການທະນາຄານນະໂຍບາຍພ້ອມ ດ້ວຍຄະນະຜູ້ບໍລິຫານງານຂອງທັງສອງຝ່າຍ. 

ຈຸດປະສົງຂອງການເຊັນສັນຍາໃນຄັ້ງນີ້ກໍ່ເພື່ອເປັນການຮ່ວມມື, ສົ່ງເສີມການໃຫ້ບໍລິການທາງດ້ານການທະນາຄານຢ່າງຮອບດ້ານລະຫວ່າງສອງຝ່າຍໂດຍໄດ້ເນັ້ນໃສ່ການສ້າງຄວາມສະດວກສະບາຍຕິດພັນກັບການຊຸກຍູ້ສົ່ງເສີມຊີວິດການເປັນຢູ່ຂອງປະຊາຊົນກໍ່ຄືວຽກງານການປ່ອຍກູ້ຂອງທະນາຄານນະໂຍບາຍ ແລະການຂະຫຍາຍ ການໃຫ້ບໍລິການຢ່າງຮອບດ້ານແລະຄວບຄຸມທຸກຄວາມຕ້ອງການໃນການນໍາໃຊ້ການບໍລິການທະນາຄານໃຫ້ເຂົ້າເຖິງລູກຄ້າໃນທຸກພື້ນທີ່ຂອງທະນາຄານພັດທະນາລາວ.

ທະນາຄານນະໂຍບາຍແມ່ນທະນາຄານສະເພາະກິດລັດທີ່ປະຕິບັດ ແລະດໍາເນີນທຸລະກິດຕາມແນວທາງນະໂຍບາຍຂອງພັກ-ລັດຖະບານໃນການປະກອບສ່ວນແກ້ໄຂຄວາມທຸກຍາກຂອງປະຊາຊົນບັນດາເຜົ່າ, ດຳເນີນງານ ໂດຍບໍ່ສະແຫວງຫາຜົນກຳໄລ, ປະຕິບັດນະໂຍບາຍໃຫ້ສິນເຊື່ອແກ່ຜູ້ທຸກຍາກໃຫ້ມີໂອກາດໄດ້ເຂົ້າເຖິງແຫຼ່ງທຶນຫຼາຍຂຶ້ນ, ໂດຍສະເພາະໃນເມືອງທຸກຍາກຕາມແນວທາງນະໂຍບາຍຂອງພັກ-ລັດຖະບານກຳນົດອອກໃນແຕ່ລະໄລຍະ, ຄຸ້ມຄອງ ແລະນຳໃຊ້ແຫຼ່ງທຶນນະໂຍບາຍເພື່ອແນໃສ່ຫັນປ່ຽນພື້ນຖານເສດຖະກິດທຳມະຊາດໄປສູ່ການຜະລິດເປັນສິນຄ້າໃນຂົງເຂດກະສິກຳ-ປ່າໄມ້, ອຸດສາຫະກຳຂະໜາດນ້ອຍ, ຫັດຖະກຳ ແລະການບໍລິການໃຫ້ມີການຂະຫຍາຍຕົວດ້ວຍການໃຫ້ກູ້ຢືມດອກເບ້ຍນະໂຍບາຍ.

ເຫັນໄດ້ເຖິງຄວາມສຳຄັນທາງດ້ານການໃຫ້ບໍລິການຂອງທັງສອງທະນາຄານ, ເພື່ອໃຫ້ການບໍລິການສາມາດຄວບຄຸມທຸກພື້ນທີ່ ແລະອໍານວຍຄວາມສະດວກສະບາຍໃຫ້ກັບລູກຄ້າຊຶ່ງການຮ່ວມມືກັນໃນຄັ້ງນີ້ກໍ່ເພື່ອແນໃສ່ຕອບສະໜອງຄວາມຕ້ອງການຂອງລູກຄ້າໃນຂອດການບໍລິການທະນາຄານ ແລະຖືເປັນບາດກ້າວໃໝ່ທີ່ສຳຄັນໃນການຮ່ວມທຸລະກິດຂອງທັງສອງພາກສ່ວນບໍ່ວ່າຈະເປັນ: ການໃຫ້ບໍລິການຝາກເງິນຖອນເງິນໃຫ້ແກ່ລູກຄ້າຂອງທະນາຄານພັດທະນາລາວໃນຂອບເຂດທົ່ວປະເທດ, ເພື່ອເປັນການເປີດກວ້າງການເຂົ້າເຖິງການບໍລິການຂອງສອງທະນາຄານລວມເຖິງເປັນການສົ່ງເສີມການນໍາໃຊ້ຜະລິດຕະພັນບັດ ATM ແລະ App ຂອງທະນາຄານພັດທະນາລາວຮ່ວມກັນແທນການນໍາໃຊ້ເງິນສົດອີກດ້ວຍ.

ດັ່ງນັ້ນ, ເພື່ອສືບຕໍ່ເສີມຂະຫຍາຍ ແລະ ພັດທະນາວຽກງານລະຫວ່າງທະນາຄານພັດທະນາລາວ ແລະ ທະນາຄານນະໂຍບາຍໃຫ້ເຂັ້ມແຂງຈຶ່ງໄດ້ເຊັນສັນຍາເປັນຄູ່ຮ່ວມມື, ຄູ່ຮ່ວມຍຸດທະສາດໃນການສະໜອງການບໍລິການຢ່າງຮອບດ້ານເພື່ອສະໜັບສະໜູນຊຸກຍູ້ໃຫ້ວຽກງານທະນາຄານທັງສອງພາກສ່ວນສາມາດເຕີບໃຫຍ່ຂະຫຍາຍຕົວກ້າວໄປສູ່ການບໍລິການທີ່ຄວບຄຸມທຸກພື້ນທີ່ ແລະພຽງພໍຕາມຄວາມຕ້ອງການໃນການນໍາໃຊ້ບໍລິການຂອງລູກຄ້າທົ່ວປະເທດ. ບໍ່ພຽງເທົ່ານັ້ນ, ທະນາຄານພັດທະນາລາວຍັງພ້ອມເປັນສ່ວນໜຶ່ງໃນການປະກອບສ່ວນຕໍ່ທະນາຄານນະໂຍບາຍເພື່ອຊຸກ ຍູ້ໃຫ້ປະຊາຊົນຜູ້ທຸກຍາກໄດ້ເຂົ້າເຖິງແຫຼ່ງທຶນຕາມນະໂຍບາຍຂອງລັດຖະ ບານໃຫ້ຫຼາຍຂຶ້ນແນໃສ່ແກ້ໄຂຊີວິດການເປັນຢູ່ຂອງປະຊາຊົນໃຫ້ດີຂຶ້ນເປັນລໍາດັບ ແລະພັດທະນາເສດຖະກິດ-ສັງຄົມ ຂອງ ສປປ ລາວ ໃຫ້ກ້າວຂຶ້ນຢ່າງໜັກແໜ້ນ, ເຂັ້ມແຂງ ແລະຍືນຍົງ.

 

แชร์