ເລຂາທິການໃຫຍ່ ເນັ້ນຫຼາຍບັນຫາຕໍ່ຜູ້ແທນແນວລາວສ້າງຊາດ

  ວັນທີ 26 ພະຈິກ 2021 ທີ່ຫໍປະຊຸມແຫ່ງຊາດ, ໃນໂອກາດທີ່ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດເຂົ້າຮ່ວມກອງປະຊຸມໃຫຍ່ຜູ້ແທນແນວລາວສ້າງຊາດທົ່ວປະເທດ ຄັ້ງທີ XI ກໍ່ໄດ້ໃຫ້ກຽດກ່າວຕໍ່ກອງປະຊຸມພ້ອມທັງໃຫ້ທິດຊີ້ນໍາຈໍານວນໜຶ່ງຕໍ່ຄະນະກໍາມະການສູນກາງແນວລາວສ້າງຊາດ ສະໄໝທີ XI ໃນການສືບຕໍ່ຈັດຕັ້ງ ແລະເຄື່ອນໄຫວວຽກງານແນວໂຮມໃນຊຸມປີຕໍ່ໜ້າເປັນຕົ້ນ:

1) ສືບຕໍ່ຕັ້ງໜ້າເສີມຂະຫຍາຍບົດບາດຂອງແນວລາວສ້າງຊາດໃນການເຕົ້າໂຮມຄວາມເປັນປຶກແຜ່ນຂອງຊາດ, ເຊີດຊູສະຕິເປັນເຈົ້າ ແລະຄວາມຮັບຜິດຊອບຂອງຄົນລາວຕໍ່ຊາຕາກໍາຂອງປະເທດຊາດ, ການສ້າງຄວາມສາມັກຄີປອງດອງແມ່ນໝາກຫົວໃຈສໍາຄັນເພື່ອຕ້ານ ແລະ ສະກັດກັ້ນຄວາມແຕກແຍກໃນສັງຄົມເພາະວ່າຄວາມແຕກແຍກໃນສັງຄົມມັນເປັນໄພອັນຕະລາຍຕໍ່ສະຖຽນລະພາບຂອງປະເທດຊາດ, ຕໍ່ຜົນປະໂຫຍດອັນຊອບທໍາຂອງປະຊາຊົນ, ການສຶກສາອົບຮົມໃຫ້ປະຊາຊົນລາວທຸກຊົນເຜົ່າມີຄວາມສະໝານສາມັກຄີທີ່ແໜ້ນແກ່ນເພື່ອສ້າງສະຕິຊາດທີ່ເປັນເອກະພາບ, ມີຄວາມຖະໜອມຫອມຮັກ ແລະຊ່ວຍເຫຼືອເຊິ່ງກັນ ແລະກັນ.

2) ສືບຕໍ່ຍົກລະດັບຄວາມສາມາດຂອງຄະນະກໍາມະການແນວລາວສ້າງຊາດຕໍ່ວຽກງານແນວໂຮມເປັນຕົ້ນໃນການນຳພາສຶກສາອົບຮົມ ແລະຍົກລະດັບຄວາມຕື່ນຕົວທາງການເມືອງ, ການເຂົ້າຮ່ວມການຄຸ້ມຄອງ, ການປະຕິບັດກົນໄກທາງການເມືອງ-ສັງຄົມຂອງລະບອບປະຊາທິປະໄຕປະຊາຊົນໃຫ້ເຂັ້ມແຂງ, ຮັບປະກັນສິດເປັນເຈົ້າຂອງປະຊາຊົນ, ຄວາມເປັນປະຊາທິປະໄຕ ແລະຍຸດຕິທຳໃນສັງຄົມບົນພື້ນຖານທຸກໆ ແນວທາງນະໂນບາຍພັກລະບຽບກົດໝາຍຂອງລັດຕ້ອງໃຫ້ປະຊາຊົນຮູ້, ປະຊາຊົນປຶກສາຫາລື, ປະຊາຊົນເຂົ້າຮ່ວມປະຕິບັດ, ປະຊາຊົນກວດກາ ແລະ ປະຊາຊົນໄດ້ຮັບຜົນປະໂຫຍດເຮັດໄດ້ແນວນີ້, ຈຶ່ງເຮັດໃຫ້ການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍໄດ້ຮັບການຈັດຕັ້ງປະຕິບັດຢ່າງຖືກຕ້ອງ, ເກີດໝາກຜົນ ແລະເປັນຮູບປະທໍາຕົວຈິງ; ຕ້ານໄດ້ບັນດາປັດໄຈໜໍ່ແໜງ, ສວຍໃຊ້ສາສະໜາ, ບັນຫາສິດທິມະນຸດ, ບັນຫາປະຊາທິປະໄຕແບບຈອມປອມເຂົ້າມ້າງຄວາມສາມັກຄີປອງດອງຂອງປະຊາຊົນເພື່ອຫັນເອົາແນວຄິດຂອງຄົນລາວເຜົ່າຕ່າງໆ ໄປສູ່ຄວາມແຕກແຍກ, ແບ່ງຊັ້ນວັນນະ, ແບ່ງເຜົ່າ ແລະອື່ນໆ.

3) ຕ້ອງຍົກສູງບົດບາດຕິດຕາມ,ກວດກາຂອງແນວລາວສ້າງຊາດໃຫ້ແຂງແຮງໂດຍຜ່ານຄໍາເຫັນ-ຄໍາສະເໜີຂອງປະຊາຊົນບັນດາເຜົ່າຕໍ່ການຈັດຕັ້ງປະຕິບັດແນວທາງ, ນະໂຍບາຍຂອງພັກໃນແຕ່ລະໄລຍະທັງຕິດຕາມ, ກວດກາການເຄື່ອນໄຫວຂອງອົງການອໍານາດລັດຂອງສູນກາງ ແລະທ້ອງຖິ່ນ, ເບິ່ງແຍງດູແລ ແລະຕິດຕາມກວດກາການປະຕິບັດໜ້າທີ່ຂອງຜູ້ທີ່ປະຊາຊົນເລືອກມາໃຫ້ເປັນຜູ້ຮັບໃຊ້ຊາດ, ຮັບໃຊ້ປະຊາຊົນນັ້ນວ່າເປັນຜູ້ບໍລິສຸດຜຸດຜ່ອງ ຫຼື ບໍ່, ເປັນຜູ້ຈົ່ງຮັກພັກດີຕໍ່ພັກ, ຕໍ່ປະເທດ ແລະ ມີນໍ້າໃຈຮັບໃຊ້ປະຊາຊົນ ຫຼືບໍ່, ຖ້າເຫັນ ຜູ້ທີ່ດີ, ຜູ້ທີ່ເດັ່ນກໍ່ຕ້ອງສະໜັບສະໜູນ, ອູ້ມຊູຊ່ວຍເຫຼືອ ແລະຖືໄດ້ວ່າເປັນຜູ້ທີ່ປະຊາຊົນໃຫ້ຄວາມເຊື່ອໝັ້ນ, ເຄົາລົບນັບຖື, ແຕ່ຖ້າເຫັນຜູ້ທີ່ອ່ອນກໍ່ຕ້ອງກໍ່ສ້າງຊ່ວຍເຫຼືອຕໍານິຕິຊົມໄດ້, ແຕ່ຖ້າເຫັນຜູ້ກະທໍາຜິດກໍ່ສາມາດສະເໜີໃຫ້ຜູ້ມີໜ້າທີ່, ມີສິດອໍານາດແກ້ໄຂຢ່າງທັນການ, ບໍ່ປະປ່ອຍໃຫ້ເປັນຊ່ອງວ່າງໃຫ້ແກ່ຄົນບໍ່ດີເອົາເປັນຂໍ້ອ້າງເພື່ອສ້າງຄວາມແຕກແຍກໃນສັງຄົມເຮົາ.

4) ອົງການແນວໂຮມແຕ່ລະຂັ້ນສືບຕໍ່ປັບປຸງແບບແຜນ ແລະ ກົນໄກການເຄື່ອນໄຫວເຮັດວຽກຂອງຕົນໃຫ້ຄ່ອງຕົວ ແລະ ສາມາດຮັບປະກັນປະສິດທິຜົນຂອງການປະຕິບັດໜ້າທີ່ການເມືອງເປັນຕົ້ນກົນໄກການເຄື່ອນໄຫວເຮັດວຽກລະຫວ່າງຄະນະກໍາມະການສູນກາງແນວລາວສ້າງຊາດກັບແນວລາວສ້າງຊາດຂັ້ນທ້ອງຖິ່ນ-ຮາກຖານ; ກົນໄກການເຄື່ອນໄຫວເຮັດວຽກລະຫວ່າງແນວລາວສ້າງຊາດກັບບັນດາອົງການພາຄີອົງການແນວໂຮມແຕ່ລະຂັ້ນສືບຕໍ່ປັບປຸງແບບແຜນ ແລະກົນໄກການເຄື່ອນໄຫວເຮັດວຽກຂອງຕົນໃຫ້ຄ່ອງຕົວ ແລະສາມາດຮັບປະກັນປະສິດທິຜົນຂອງການປະຕິບັດໜ້າທີ່ການເມືອງໂດຍສະເພາະກົນໄກການເຄື່ອນໄຫວເຮັດວຽກລະຫວ່າງຄະນະກໍາມະການສູນກາງແນວລາວສ້າງຊາດກັບແນວລາວສ້າງຊາດຂັ້ນທ້ອງຖິ່ນ-ຮາກຖານ.

5) ຄະນະກໍາມະການສູນກາງແນວລາວສ້າງຊາດຊຸດໃໝ່ທີ່ໄດ້ຮັບຮອງເອົານີ້ເພີ່ມທະວີຄວາມສາມັກຄີພາຍໃນ ແລະເຮັດວຽກຮ່ວມມືສາກົນ ແລະເປີດກວ້າງສາຍພົວພັນການທູດປະຊາຊົນຕາມແນວທາງການຕ່າງປະເທດຂອງພັກ-ລັດເຮົາ, ຮັດແໜ້ນສາຍພົວພັນມິດຕະພາບ ແລະການຮ່ວມມືກັບອົງການແນວໂຮມ ແລະ  ອົງການຈັດຕັ້ງປະຊາຊົນຂອງປະເທດເພື່ອນມິດທີ່ມີມູນເຊື້ອ, ປະເທດເພື່ອນບ້ານໃກ້ຄຽງ, ປະເທດເພື່ອນມິດອື່ນໆ, ອົງການຈັດຕັ້ງສາກົນເພື່ອຍາດແຍ່ງການສະໜັບສະໜູນຊ່ວຍເຫຼືອປະກອບສ່ວນເຂົ້າໃນໂຄງການພັດທະນາເສດຖະກິດ-ສັງຄົມຢູ່ປະເທດເຮົາ, ແນວລາວສ້າງຊາດຕ້ອງສຸມໃສ່ການຄົ້ນຄວ້າ ແລະແລກປ່ຽນບົດຮຽນອັນດີຂອງວຽກງານແນວໂຮມຈາກປະເທດອ້າຍນ້ອງເພື່ອສືບຕໍ່ປບັປຸງດ້ານການຈັດຕັ້ງ, ເນື້ອໃນ ແລະຮູບການເຄື່ອນໄຫວຕົວຈິງຂອງແນວລາວສ້າງຊາດໃຫ້ສອດຄ່ອງກັບສະພາບ ຈຸດພິເສດຂອງວຽກງານນີ້ໃນເງື່ອນໄຂໃໝ່ບົນຈິດໃຈສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະຮອບດ້ານເພື່ອຮັບປະກັນປະສິດທິຜົນໃນການເຄື່ອນໄຫວໃຫ້ສູງຂຶ້ນເລື້ອຍໆ.

6) ສືບຕໍ່ສ້າງເງື່ອນໄຂ ແລະຊຸກຍູ້ສິ່ງອໍານວຍຄວາມສະດວກຕ່າງໆໃຫ້ແກ່ພີ່ນ້ອງເຊື້ອສາຍລາວທີ່ຢູ່ຕ່າງປະເທດທີ່ຍັງຮັກເຊື້ອແພງຊາດໄດ້ອວ່າຍໜ້າມາຫາປະເທດຊາດທີ່ເປັນບ້ານເກີດເມືອງນອນຂອງຕົນເພື່ອຮ່ວມກັນສ້າງສາພັດທະນາປະເທດເທົ່າທີ່ມີເງື່ອນໄຂ ແລະ ຄວາມສາມາດຂອງຕົນເພື່ອຮ່ວມກັບປະຊາຊົນພາຍໃນປະເທດ ສ້າງສາພັດທະນາຊາດບ້ານເມືອງໃຫ້ຈະເລີນຮຸ່ງເຮືອງສືບຕໍ່ໄປ.

แชร์