ຮ່ວມມືຖ່າຍທອດເຕັກໂນໂລຊີ ແລະນະວັດຕະກຳທັນສະໄໝ

ວັນທີ 24 ພະຈິກ 2021 ທີ່ຫ້ອງການສະພາການຄ້າ ແລະອຸດສາຫະກຳ ແຫ່ງຊາດ ໄດ້ມີພິທີເຊັນບົດບັນທຶກຂໍ້ຕົກລົງວ່າດ້ວຍການຮ່ວມມືແລກປ່ຽນຂໍ້ມູນຂ່າວສານ, ຖ່າຍທອດເຕັກໂນໂລຊີ ແລະນະວັດຕະກຳໃໝ່ ເພື່ອສົ່ງເສີມຜູ້ປະກອບກິດຈະການ MSMEs. ລະຫວ່າງ ທ່ານ ສຸມານະ ຈຸລາມະນີ, ຫົວໜ້າກົມເຕັກໂນໂລຊີ ແລະ ນະວັດຕະກຳ, ກະຊວງເຕັກໂນໂລຊີ ແລະການສື່ສານ ແລະທ່ານ ດາວວອນ ພະຈັນທະວົງ ຮອງປະທານສະພາການຄ້າ ແລະອຸດສາຫະກຳແຫ່ງຊາດລາວຂື້ນຢ່າງເປັນທາງການໂດຍມີທ່ານ ປອ ສັນຕິສຸກ ສິມມາລາວົງ, ຮອງລັດຖະມົນຕີກະຊວງເຕັກໂນໂລຊີ ແລະການສື່ສານໃຫ້ກຽດເປັນສັກຂີພະຍານພ້ອມດ້ວຍຄະນະບໍລິຫານ, ຄະນະນຳ ແລະພະນັກງານວິຊາການທັງສອງຝ່າຍເຂົ້າຮ່ວມ.
ຈຸດປະສົງຂອງການຮ່ວມມືໃນຄັ້ງນີ້ແມ່ນເພື່ອແລກປ່ຽນຂໍ້ມູນຂ່າວສານທາງດ້ານວິຊາການ,ເຜີຍແຜ່ນິຕິກຳ ແລະຮ່ວມກັນຖ່າຍທອດຄວາມຮູ້ທາງດ້ານເຕັກໂນໂລຊີ ແລະ ນະວັດຕະກຳຕ່າງໆ ໃນການຊຸກຍູ້ສົ່ງເສີມຜູ້ປະກອບກິດຈະການ ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະກາງໃຫ້ສາມາດເຂົ້າເຖິງເຕັກໂນໂລຊີ ແລະ ນຳໃຊ້ນະວັດຕະກຳໃໝ່ໆເຂົ້າໃນການຄຸ້ມຄອງ ແລະບໍລິຫານທຸລະກິດ.
ບົດບັນທຶກຂໍ້ຕົກລົງສະບັບນີ້ຈະເປັນແນວທາງຮ່ວມກັນໃນການຈັດຕັ້ງຜັນຂະຫຍາຍຍຸດທະສາດວ່າດ້ວຍການພັດທະນາເສດຖະກິດ Digital, ກົດໝາຍວ່າດ້ວຍໂທລະຄົມມະນາຄົມສະບັບປັບປຸງ ແລະກົດໝາຍວ່າດ້ວຍເຕັກໂນໂລຊີລະດັບສູງເຊິ່ງເປັນກົດໝາຍໃໝ່ທີ່ສະພາແຫ່ງຊາດໄດ້ຮັບຮອງໃນກອງປະຊຸມອາທິດທີ່ຜ່ານມານີ້ ແລະ ນິຕິກຳອື່ນໆ ເປັນຕົ້ນແມ່ນກົດໝາຍວ່າດ້ວຍການຖ່າຍທອດເຕັກໂນໂລຊີທີ່ໄດ້ປະກາດໃຊ້ໃນປີ 2017 ບັນດາກົດໝາຍດັ່ງກ່າວແມ່ນຕິດພັນໂດຍກົງກັບຂົງເຂດວຽກງານສົ່ງເສີມ MSMEs ໃຫ້ຫັນເປັນທັນສະໄໝ.
ພາຍໃຕ້ການຊີ້ນຳ ນຳພາຢ່າງໃກ້ຊິດຂອງຄະນະບໍລິຫານ ແລະຄະນະນຳທັງສອງຝ່າຍຈະໄດ້ຕັ້ງຄະນະຮັບຜິດຊອບຮ່ວມກັນໃນການກຳນົດແຜນການເຄື່ອນໄຫວກິດຈະກຳຕ່າງໆໃນຂອບໄລຍະ 3 ປີ ຂ້າງໜ້າຂອງການຈັດຕັ້ງປະຕິບັດບົດບັນທຶກຄວາມເຂົ້າໃຈສະບັບນີ້, ເພື່ອຮັບປະກັນໃຫ້ການຮ່ວມມືປະສົບຜົນສຳເລັດ ແລະນຳເອົາຜົນປະໂຫຍດສູງສຸດມາໃຫ້ແກ່ຜູ້ປະກອບກິດຈະການຈຸນລະວິສາຫະກິດ ແລະວິສາຫະກິດຂະໜາດນ້ອຍ ແລະກາງໃນ ສປປ ລາວ.

แชร์