ກວ່າ 20 ພັນແຮງງານຕັດຫຍິບລາວຮັບອຸດໜູນລາຍໄດ້ ຫຼັງຖືກກະທົບໂຄວິດ

    ຜູ້ອອກແຮງງານໃນຂະແໜງຕັດຫຍິບລາວຫຼາຍກວ່າ 20.000 ຄົນ ຢູ່ໃນ ສປປ ລາວ ທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ໄດ້ຮັບຜົນປະໂຫຍດຈາກການອຸດໜູນລາຍໄດ້ສຸກເສີນ ລວມມູນຄ່າ 18,62 ຕື້ກີບ ປະມານ 1,85 ລ້ານໂດລາສະຫະລັດ.
   ໃນວັນທີ 24 ພະຈິກ 2021 ທີ່ນະຄອນຫຼວງວຽງຈັນໄດ້ມີກອງປະຊຸມທາງໄກກ່ຽວກັບພິທີປິດໂຄງການຊ່ວຍເຫຼືອຜູ້ອອກແຮງງານໃນຂະແໜງຕັດຫຍິບທີ່ໄດ້ຮັບຜົນກະທົບຈາກພະຍາດໂຄວິດ- 19 ຢູ່ໃນ ສປປ ລາວ ໂດຍການສະໜັບສະໜຸນຈາກລັດຖະບານເຢຍລະມັນຜ່ານອົງການແຮງງານສາກົນ.
   ໃນພິທີທ່ານ ນາງ ແກ້ວ ຈັນທະວີໄຊ ຫົວໜ້າອົງການປະກັນສັງຄົມແຫ່ງຊາດໄດ້ລາຍງານໃຫ້ຮູ້ວ່າ: ມີຜູ້ອອກແຮງງານໃນຂະແໜງຕັດຫຍິບຈຳນວນ 20.698 ຄົນຈາກໂຮງງານຕັດຫຍິບ 47 ແຫ່ງ ທີ່ໄດ້ຮັບຜົນປະໂຫຍດຈາກໂຄງການດັ່ງກ່າວຕົກເປັນຄົນລະ 9 ແສນກີບ (ປະມານ 85 ໂດລາສະຫະລັດ) ຈ່າຍໃຫ້ເທື່ອດຽວ ແລະໄດ້ມີການຈັດຕັ້ງປະຕິບັດເບີກຈ່າຍນັບແຕ່ເດືອນມີນາຫາເດືອນຕຸລາ 2021 ຈຶ່ງສໍາເລັດ.
   ໂຄງການລິເລີ່ມດັ່ງກ່າວໄດ້ຮັບການສະໜັບສະໜຸນການປົກປ້ອງສັງຄົມຂອງລັດຖະບານໃນການຕອບໂຕ້ກັບການລະບາດຂອງພະຍາດໂຄວິດ-19 ເຊິ່ງໄດ້ມີການສະໜອງເງິນຊ່ວຍເຫຼືອໃຫ້ແກ່ຜູ້ອອກແຮງງານໃນຂະແໜງຕັດຫຍິບ, ລວມທັງຜູ້ທີ່ບໍ່ມີເງື່ອນໄຂໄດ້ຮັບການອຸດໜຸນຈາກລັດຖະບານເນື່ອງຈາກບໍ່ໄດ້ເປັນສະມາຊິກຂອງອົງການປະກັນສັງຄົມ ຫຼືໄດ້ຈ່າຍເງິນສົມທົບຕໍ່າກວ່າ 12 ເດືອນ ໂດຍງົບປະມານທີ່ຖືກນໍາໃຊ້ໃນການຈັດຕັ້ງປະຕິບັດໂຄງການແມ່ນໄດ້ຮັບການຊ່ວຍເຫຼືອຈາກກະຊວງການຮ່ວມມື ແລະ ການພັດທະນາເສດຖະກິດຂອງສະຫະພັນເຢຍລະມັນ (BMZ) ແລະ ການສະໜັບສະໜຸນທາງດ້ານວິຊາການຈາກອົງການແຮງງານສາກົນ (ILO).


  ທ່ານ ປະເດີມພອນ ສົນທະນີ, ຮອງລັດຖະມົນຕີກະຊວງແຮງງານ ແລະສະຫວັດດີການສັງຄົມໃນນາມປະທານ, ໄດ້ກ່າວວ່າ:“ຂໍສະແດງຄວາມຂອບໃຈຕໍ່ກັບລັດຖະບານເຢຍລະມັນ ແລະອົງການແຮງງານສາກົນທີ່ໄດ້ໃຫ້ການສະໜັບສະໜຸນງົບປະມານຊ່ວຍເຫຼືອດັ່ງກ່າວເຊິ່ງເຮັດໃຫ້ພວກເຮົາສາມາດສະໜອງການຊ່ວຍໜຸນທີ່ຈຳເປັນໃຫ້ແກ່ຜູ້ອອກແຮງງານໃນຂະແໜງຕັດຫຍິບໃນໄລຍະເວລາທີ່ມີຄວາມຫຍຸ້ງຍາກນີ້. ນອກຈາກນີ້, ໂຄງການຍັງໄດ້ຊ່ວຍສ້າງຄວາມເຂັ້ມແຂງໃຫ້ແກ່ກົນໄກການຈ່າຍເງິນຂອງລະບົບປະກັນສັງຄົມເຮັດໃຫ້ພວກເຮົາສາມາດໂອນເງິນອຸດໜຸນໃຫ້ແກ່ຜູ້ທີ່ໄດ້ຮັບຜົນປະໂຫຍດຈາກໂຄງການທີ່ບໍ່ໄດ້ມີບັນຊີທະນາຄານ”.
   ທ່ານ ນາງ ບຸນປະສົງ ສີຫາລາດ ໜຶ່ງໃນຜູ້ອອກແຮງງານໃນຂະແໜງຕັດຫຍິບໂຮງງານລາວອາປາແລນ, ໄດ້ກ່າວວ່າ: “ພວກເຮົາໄດ້ພົບກັບຄວາມຍຸ້ງຍາກທາງດ້ານເສດຖະກິດ ແລະວຽກຂອງພວກເຮົາກໍບໍ່ໄດ້ເຮັດເປັນປົກກະຕິເຊິ່ງການອຸດໜຸນລາຍຮັບດັ່ງກ່າວນີ້ໄດ້ຊ່ວຍພວກເຮົາກ້າວຂ້າມຄວາມຫຍຸ້ງຍາກໄປໃນໄລຍະໜຶ່ງໃນຊ່ວງຫຍຸ້ງຍາກນີ້”.
   ໂຄງການດັ່ງກ່າວໄດ້ຖືກສ້າງຂຶ້ນໂດຍສອດຄ່ອງກັບມາດຕະຖານສາກົນວ່າດ້ວຍການປະກັນສັງຄົມພ້ອມທັງຄວາມເປັນເຈົ້າການແຫ່ງຊາດ, ການຕິດຕາມກວດກາຮ່ວມລະຫວ່າງລັດຖະບານ, ຕາງໜ້າຜູ້ໃຊ້ແຮງງານ ແລະຕາງໜ້າຜູ້ອອກແຮງງານພ້ອມທັງມີການບໍລິຫານຢ່າງມີຄວາມໂປ່ງໃສ ແລະມີຄວາມຮັບຜິດຊອບ. ສະມາຄົມອຸດສາຫະກຳຕັດຫຍິບລາວ (ALGI) ແລະສູນສະຫະພັນກຳມະບານລາວ (LFT) ໄດ້ມີສ່ວນຮ່ວມສຳຄັນໃນການສ້າງໂຄງການ ແລະໄດ້ສະໜັບສະໜຸນການປະຕິບັດງານຂອງໂຄງການ.


    ທ່ານ ແກຣມບັກລີ ຜູ້ອຳນວຍການຫ້ອງການອົງການແຮງງານສາກົນປະຈຳປະເທດໄທ, ກຳປູເຈຍ ແລະ ສປປ ລາວ ກ່າວວ່າ: “ພວກເຮົາມີຄວາມດີໃຈເປັນຢ່າງຍິ່ງທີ່ໄດ້ເຫັນການອຸດໜຸນຄັ້ງນີ້ຊ່ວຍຜູ້ອອກແຮງງານ ແລະທຸລະກິດໃຫ້ສາມາດຢູ່ລອດໃນໄລຍະເວລາທີ່ມີຄວາມຫຍຸ້ງຍາກ, ທີ່ສໍາຄັນການອຸດໜູນນີ້ຍັງໄດ້ກວມເອົາຜູ້ທີ່ບໍ່ໄດ້ຖືກເງື່ອນໄຂໄດ້ຮັບການອຸດໜຸນວ່າງງານເຊັນດຽວກັນ ແລະທຸກພາກສ່ວນໄດ້ສຸມທຸກຄວາມພະຍາຍາມໃນທຸກດ້ານເພື່ອຮັບປະກັນບໍ່ໃຫ້ປະຖິ້ມໃຜໄວ້ທາງຫຼັງ”.
    ສໍາລັບໂຄງການດັ່ງກ່າວແມ່ນໄດ້ຮັບການຈັດຕັ້ງປະຕິບັດໂດຍການນຳໃຊ້ລະບົບທີ່ຈັດຕັ້ງປະຕິບັດຢູ່ແລ້ວຂອງອົງການປະກັນສັງຄົມແຫ່ງຊາດ, ເຊິ່ງໄດ້ຊ່ວຍຫຼຸດຜ່ອນຄ່າໃຊ້ຈ່າຍດ້ານບໍລິຫານ ແລະ ເລັ່ງລັດການຈັດຕັ້ງປະຕິບັດ, ໃນຂະນະດຽວກັນກໍເປັນການຜ່ອນຄາຍຄວາມເຄັ່ງຕຶງດ້ານການເງິນໃຫ້ກັບການໃຫ້ອຸດໜູນວ່າງງານພາຍໃນປະເທດ.
   ໃນການຈັດຕັ້ງປະຕິບັດໂຄງການ, ອົງການປະກັນສັງຄົມໄດ້ດຳເນີນການທົດລອງວິທີການຈ່າຍເງິນແບບໃໝ່ໂດຍການຈ່າຍເງິນໃຫ້ຜູ້ໄດ້ຮັບອຸດໜູນຜ່ານທາງອີເລັກໂທຣນິກໂດຍຜ່ານເຄືອຂ່າຍໂທລະສັບມືຖືໃນທ້ອງຖິ່ນຮັບປະກັນດ້ານການໂອນເງິນສໍາລັບຜູ້ອອກແຮງງານໃນຂະແໜງການຕັດຫຍິບໂດຍສະເພາະຜູ້ທີ່ບໍ່ມີບັນຊີທະນາຄານ.


   ນອກຈາກນີ້, ໂດຍຜ່ານໂຄງການ ILO Vision Zero Fund ໂຄງການຍັງໄດ້ໃຫ້ການສະໜັບສະໜຸນກັບສະມາຄົມອຸດສາຫະກຳຕັດຫຍິບລາວເພື່ອສ້າງຄວາມເຂັ້ມແຂງທາງດ້ານມາດຕະການຄວາມປອດໄພ ແລະ ສຸຂະພາບໃນການເຮັດວຽກຢູ່ໃນໂຮງງານຕັດຫຍິບ ແລະ ຫໍພັກພະນັກງານພ້ອມທັງສະໜອງອຸປະກອນປ້ອງກັນ ແລະອຸປະກອນທຳຄວາມສະອາດເພື່ອປ້ອງກັນພະຍາດໂຄວິດ-19 ລວມທັງສະຖານທີ່ກັກໂຕເພີ່ມຕື່ມສຳລັບຜູ້ອອກແຮງງານໃນຂະແໜງການນີ້.

แชร์