ກອງປະຊຸມໃຫຍ່ຜູ້ແທນແນວລາວສ້າງຊາດທົ່ວປະເທດ ຄັ້ງທີ XI

ຂປລ. ກອງປະຊຸມໃຫຍ່ຜູ້ແທນແນວລາວສ້າງຊາດທົ່ວປະເທດຄັ້ງທີ XI ໄຂຂຶ້ນຢ່າງເປັນທາງການໃນວັນທີ 25 ພະຈິກ 2021 ທີ່ຫໍປະຊຸມແຫ່ງຊາດນະຄອນຫລວງວຽງຈັນ, ໂດຍໄດ້ຈັດເປັນສອງຮູບແບບ ຄືຮູບແບບປົກກະຕິຢູ່ນະຄອຫລວງວຽງຈັນ ແລະຮູບແບບທາງໄກ ຢູ່ບັນດາແຂວງທົ່ວປະເທດເນື່ອງຈາກສະພາບການແຜ່ລະບາດຂອງພະຍາດໂຄວິດ-19 ໂດຍການເຂົ້າຮ່ວມຂອງທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະຊາຊົນປະ ຕິວັດລາວ, ປະທານປະເທດ ແຫ່ງ ສປປ ລາວ, ມີບັນດາການນຳພັກ-ລັດ, ອະດີດການນຳຂັ້ນສູງພ້ອມດ້ວຍຜູ້ແທນ ແລະແຂກທີ່ຖືກເຊີນທົ່ວປະເທດທັງໝົດ 581 ຄົນ, ຍິງ 110 ຄົນ.
   ໂອກາດດຽວ ກັນນີ້, ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດໄດ້ລາຍງານວ່າ: ໃນໄລຍະ 1 ປີຜ່ານມາສູນກາງແນວລາວສ້າງຊາດໄດ້ສຳເລັດການດຳເນີນກອງປະຊຸມໃຫຍ່ແນວລາວຂັ້ນແຂວງຕິດພັນກັບການຄົ້ນຄວ້າ, ປະກອບຄຳເຫັນໃສ່ຮ່າງບົດລາຍງານການເມືອງ, ຮ່າງແຜນພັດທະນາ ແລະຮ່າງກົດລະບຽບແນວລາວສ້າງຊາດ,ໄດ້ປະສານສົມທົບກັບອົງການຈັດຕັ້ງພັກ, ລັດ,ອົງການຈັດຕັ້ງມະຫາຊົນ ແລະອົງການປົກຄອງທ້ອງຖິ່ນ ປຸກລະດົມປະຊາຊົນລາວບັນດາເຜົ່າປະກອບສ່ວນການຈັດຕັ້ງປະຕິບັດຂະບວນການແຂ່ງຂັນຮັກຊາດ ແລະພັດທະນາຕິດພັນກັບການຊຸກຍູ້ການຜະລິດ, ການປູກ ຝັງ-ລ້ຽງສັດ, ສ້າງລາຍຮັບເພື່ອແກ້ໄຂຄວາມທຸກຍາກເທື່ອລະກ້າວ, ປຸກລະດົມທົ່ວສັງຄົມທັງພາຍໃນ ແລະຕ່າງປະເທດໃຫ້ການຊ່ວຍເຫລືອຕ້ານພະຍາດໂຄວິດ- 19, ຕ້ານໄພນໍ້າຖ້ວມ,ຕ້ານໄພແຫ້ງແລ້ງ, ໄພໜາວ ແລະອື່ນໆ. ອັນພົ້ນເດັ່ນແມ່ນໄດ້ສ້າງຂະບວນການແຂ່ງຂັນສ້າງຄອບຄົວ ແລະບ້ານສາມັກຄີປອງດອງ ແລະເມືອງສາມັກຄີປອງດອງຕິດພັນກັບການແກ້ໄຂຄວາມທຸກຍາກຂອງປະຊາຊົນລາວບັນດາເຜົ່າເຮັດໃຫ້ມີບັນຍາກາດ ແລະໃບໜ້າໃໝ່ໃນການປະຕິບັດວຽກງານແນວໂຮມຢູ່ຂັ້ນຮາກຖານ. ພ້ອມກັນນີ້, ໄດ້ປຸກລະດົມຈັດຕັ້ງການສະເຫລີມສະຫລອງວັນສຳຄັນຕ່າງໆຂອງພັກ, ຂອງຊາດ ເປັນຕົ້ນວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 65 ປີ, ວັນສ້າງຕັ້ງແນວລາວສ້າງຊາດຄົບຮອບ 70 ປີ, ວັນສະຖາປານາ ສປປ ລາວ ຄົບຮອບ 45 ປີ, ວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 100 ປີ, ຂະບວນການປຸກລະດົມປະຊາຊົນກະກຽມກອງປະຊຸມໃຫຍ່ ຄັ້ງທີ XI ຂອງພັກ, ກະກຽມ ແລະດຳເນີນການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ແລະອື່ນໆ.
   ທ່ານປະທານສູນກາງແນວລາວສ້າງຊາດໄດ້ກ່າວຕື່ມວ່າ: ກອງປະຊຸມໃຫຍ່ຜູ້ແທນແນວລາວສ້າງຊາດທົ່ວປະເທດຄັ້ງນີ້ມີຄວາມໝາຍຄວາມສຳຄັນຫລາຍເຊິ່ງຈະໄດ້ພ້ອມກັນທົບທວນຄືນຜົນຂອງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງແນວລາວສ້າງຊາດໃນໄລຍະ 5 ປີ ຜ່ານມາ,ຈະໄດ້ກຳນົດຄາດໝາຍລວມ, ເນື້ອໃນການຫັນປ່ຽນ ແລະແຜນວຽກຈຸດສຸມໃນ 5 ປີຕໍ່ໜ້າ. ພ້ອມດຽວກັນນີ້, ຈະໄດ້ຄົ້ນຄວ້າ ແລະຮັບຮອງເອົາບົດລາຍງານການເມືອງພາຍໃຕ້ຫົວຂໍ້ “ເສີມຂະຫຍາຍມູນເຊື້ອອັນດີງາມ ຂອງແນວລາວສ້າງຊາດ, ເພີ່ມທະວີຄວາມ ສາມັກຄີເປັນປຶກແຜ່ນຂອງປວງຊົນລາວທັງຊາດ, ເຕົ້າໂຮມກຳລັງແຮງຂອງປະຊາຊົນທຸກຊັ້ນຄົນ, ປະກອບສ່ວນຢ່າງແຂງແຮງເຂົ້າໃນພາລະກິດປົກປັກຮັກສາ-ສ້າງສາປະເທດຊາດ ແລະຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກໃຫ້ບັນລຸຜົນເປັນຈິງ”.             ນອກຈາກນີ້, ກອງປະຊຸມຍັງຈະໄດ້ພິຈາລະນາ ແລະຮັບຮອງເອົາແຜນພັດທະນາອົງການແນວລາວສ້າງຊາດ 5 ປີ (2021-2025), ກົດລະບຽບແນວລາວສ້າງຊາດ ສະໄໝທີ XI ສະບັບປັບປຸງໃໝ່, ຜ່ານບົດສຳຫລວດການນຳພາລວມຂອງຄະນະກຳມະການສູນກາງແນວລາວສ້າງຊາດ ສະໄໝທີ X ແລະຮັບຮອງເອົາໂຄງປະກອບບຸກຄະລາກອນຄະນະກຳມະການສູນກາງແນວລາວສ້າງຊາດ, ທັງຜູ້ປະຈຳການ ແລະ ບໍ່ປະຈຳການ ສະໄໝທີ XI ອີກດ້ວຍ.
ໂອກາດດຽວກັນນີ້, ໃນກອງປະຊຸມຍັງຈະໄດ້ຮັບຟັງການໂອ້ລົມຊີ້ນຳຂອງ ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານ ປະເທດ ແຫ່ງ ສປປ ລາວ ເພື່ອເປັນເຂັມຊີ້ທິດເຍືອງທາງໃຫ້ຄະນະກຳມະການສູນກາງແນວລາວສ້າງຊາດໃນການເສີມຂະຫຍາຍບົດບາດ ແລະສ້າງການຫັນປ່ຽນໃໝ່ກ້າວຂຶ້ນຢ່າງບໍ່ຢຸດຢັ້ງ.

แชร์